Kẹ Uyere re Whọ Wereva

CALGARY HERALD, obe-usi Canada jọ o ta nọ: “Owojẹ uyere nọ a rẹ kẹ yọ abọjọ uruemu ohwo-akpọ.” Herald na ọ wariẹ eme emọ ikpe izii jọ nọ e rrọ isukulu epramare enọ iticha rai ọ ta kẹ nọ a kere kpahe eware kpobi nọ a rẹ rọ fiki rai kẹ uyere. Ọmọ jọ ọ ta nọ ọ rẹ kẹ uyere fiki uviuwou riẹ ‘keme a rẹrote ei.’ Ọmọtẹ ọmaha jọ ọ kẹ uyere fiki uviuwou riẹ re, ọ ta nọ: “A ru omẹ wo ufuoma, omakpokpọ, rẹrote omẹ, you omẹ, ko omẹ, yọ o gbẹ rọ fiki ọsẹ gbe oni mẹ hẹ, mẹ hae te jọ evaọ otọakpọ nana ha.”

Ababọ uyere o kẹ u re su kpohọ ababọ edẹro egaga. Wọhọ epanọ ọgbaeriariẹ avọ owuhrẹ-egagọ nọ a re se J. I. Packer ọ ta, “a ma omai re ma rria evaọ ẹrorọsuọ Ọghẹnẹ gbe ẹrorọsuọ ohwohwo.” Onana o kareghẹhọ omai ohrẹ areghẹ Ebaibol na nọ a kẹ ikpe-udhusoi buobu nọ e vrẹ no, onọ o ta nọ: “Wha hẹ kẹ uyere.” (Ahwo Kọlọsi 3:15) Eme ọ uyere nọ i no udu ze nọ a rẹ ta kẹ amọfa i re fiobọhọ bọ usu ga.

Ofariẹ, nọ ma tẹ be kẹ uyere je bi riwi ohwohwo ghaghae, yọ ma bi dhesẹ uyere mai kẹ Jihova re, yọ o re muẹrohọ onana. Ebaibol na ọ ta nọ: “Ibiaro ỌNOWO na e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” (2 Iruẹru-Ivie 16:9) Ọghẹnẹ ọ k’omai imuẹro nnọ ọ rẹ kareghẹhọ je riwi uyoyou nọ ahwo-akpọ a dhesẹ kẹ odẹ riẹ ghaghae. (Ahwo Hibru 6:10) Ẹhẹ, ma wo emamọ ẹjiroro nọ ma rẹ rọ kẹ uyere keme okwakwa Ọghẹnẹ onana, nọ ma te bi dhesẹ iẹe kẹdẹ kẹdẹ, o rẹ were Jihova je fiba evawere mai. O nwane wọhọ epanọ Ite 15:13 o ta: “Evaiwoma e rẹ wha ovao osasa tha.”