Eware nọ E rẹ Raha Ire

EVAỌ etoke Ebaibol, a je riwi ire wọhọ ekwakwa eghaghae. Wọhọ oriruo, okenọ Abraham ọ dẹ oria ukio kẹ aye oyoyou riẹ, Sera, a jọ okerefihotọ edadẹ na fodẹ ire kugbe otọ nọ a be zẹ na.—Emuhọ 23:15-18.

Epọvo na re nẹnẹ, a riwi ire ghaghae gaga, yọ evaọ akpọ-soso a be t’ẹme gaga kpahe ẹrawo ewhawho. Obe na State of the World 1998, o ta nọ: “Dede nọ ahwo buobu evaọ erẹwho ofẹ ẹkpẹlobọ-ọre a be vioja nọ a tẹ ruẹ ewhawho nọ a bi kpe no evaọ ofẹ erẹwho ahwo obiebi, ẹsejọhọ a riẹ hẹ inọ ewhawho nọ e rọ orẹwho rai họ enọ a be mai kpe jẹ raha.” Eware vẹ e be mae raha ewhawho evaọ erẹwho ofẹ ẹkpẹlobọ-ọre Europe gbe North America? Ahwo buobu a be riobọhọ ewhawho nọ a bi kpe, rekọ eware efa e riẹ nọ e be raha ire ototọ, n’obe ruọ obe, wọhọ odẹme. Eware vẹ ye? Enua ofou gbe oso asidi. Ekwakwa enua enana e rẹ sae raha ire ẹmẹrera, ru ai kpomafihọ kẹ ẹyao.

Evaọ ikpe buobu, ahwo nọ a rẹ rẹrote okegbe gbe amọfa nọ a wo ọdawẹ a vẹvẹ unu no kpahe ẹgwọlọ nọ a rẹ rọ thọ ona-okegbe otọakpọ na. Evaọ etoke ikpe ọ 1980 na, nọ ekiotọ-eriariẹ evaọ Germany a wuhrẹ kpahe okpomahọ enua ofou gbe oso asidi evaọ okegbe na no, a ku rie họ nọ: ‘A gbe ru oware jọ kpahe iẹe he, oware wọhọ ukpe 2000, ifoto gbe ividio anwae ọvo ahwo a te jọ ruẹ ewhawho.’ O rrọ oware evawere inọ, ogaga orukpokpọ otọakpọ na o ga te epanọ o sae rọ za ọraha buobu nọ a ta kpahe na dhe no.

Dede na, evaọ ekuhọ riẹ, Ọghẹnẹ họ ọnọ o ti ru abọ nọ ọ mae rro re ọ sẹro ona-okegbe mai. “Evaọ oria ukpehru [riẹ o bi jo] ku ame ku igbehru kpobi” yọ o bi “ru ebe re e ruẹse ro kẹ ithuru na, jegbọ ekakọ re ohwo ọ kọ.” Yọ ọ yeyaa no nọ ọ te ‘raha enọ e be raha otọakpọ na.’ (Olezi 104:13, 14; Eviavia 11:18) Ẹvẹ u ti gbunu te evaọ okenọ ahwo akpọ a te reawere akpọ nọ ọ kare enua bẹdẹ bẹdẹ!—Olezi 37:9-11.