Obokparọ Evaọ Okọto Uzi Ukpehru Orẹwho

ISẸRI JIHOVA nọ e rọ Germany a wo obokparọ ulogbo evaọ Okọto Uzi Ukpehru Orẹwho na nọ o rrọ Karlsruhe. Fikiere a tẹ j’owọ ulogbo rọ kpahe evuhumuo rai wọhọ egagọ nọ uzi u kuenu kẹ.

Isẹri Jihova e jọ Germany ta usiuwoma vrẹ ikpe 100 no. A zọ vrẹ ukpokpoma ogaga evaọ otọ esuo-evega ivẹ erọ ikpe-udhusoi avọ 20 na—Esuo-Ọgbahọ Orẹwho gbe Esuo-Ewokugbe. Anwọ 1990, Isẹri na e daoma no re a wo evuhumuo uzi wọhọ egagọ nọ uzi u kuenu kẹ. Nọ a bru oziẹ edhọ okọto ivẹ kẹ ae je bru kpe ai evaọ ọvo jọ, Isẹri na e tẹ kpare ẹdhọ na kpohọ Okọto Uzi Ukpehru Orẹwho na, onọ u whowho oziẹ-obro riẹ evaọ December 19, 2000.

Oziẹbro Ọrọwokugbe kẹ Isẹri Jihova

Ibruoziẹ ihrẹ na kpobi nọ e rọ okọto na a bru kẹ Isẹri na. Ibruoziẹ na e rẹriẹ oziẹ nọ Okọto Ukpehru Esuo-Orẹwho na u bru evaọ 1997 jẹ hrẹ okọto na re a wariẹ roro kpahe ẹme Isẹri na.

Okọto Uzi Ukpehru Orẹwho na o tẹ rehọ uvẹ na rọ t’ẹme kpahe usu nọ o rrọ udevie Esuo-Ubrotọ na gbe utu egagọ. Oware ọsosuọ nọ a rẹ rọ riẹ edikihẹ egagọ “họ orọnikọ ẹrọwọ riẹ hẹ, rekọ uruemu riẹ.”

Okọto na u te je muẹrohọ nnọ okenọ Isẹri na i te bi dhesẹ “seomaba-edhehọ orọ Ileleikristi,” orọnikọ a be “wọso ehri-uzi esuo-omoma ha” yọ orọnikọ a be “gwọlọ rehọ oghẹrẹ egọmeti ọfa ro nwene esuo-omoma ha.” Fikiere, oma nọ a re dhehọ ivotu esuo-ohrowo ho o rẹ jọ oware nọ a rẹ rọ whaha Isẹri na udu ayare rai rọkẹ evuhumu uzi hi.—Jọn 18:36; Ahwo Rom 13:1.

Okọto na u te je muẹrohọ nọ ohwo nọ o wo ẹrọwọ—makọ Osẹri hayo ohwo egagọ ọfa jọ—ọ rẹ sae ruẹ omariẹ ẹsejọ evaọ uyero nọ ẹgwọlọ Esuo-Ubrotọ na o jẹ wọso itee ẹrọwọ riẹ. Otẹrọnọ ohwo na ọ nya lele iroro-oziẹbro riẹ ẹkwoma “ẹmeoyo kẹ ehri-izi ẹrọwọ egagọ vi erọ uzi na,” Esuo-Ubrotọ na ọ rẹ sai rri onana wọhọ oware no u kiehọ jẹ rrọ abọjọ ufuoma egagọ.—Iruẹru 5:29.

Ebe-usi buobu i kporo oziẹ-obro okọto na. O jọ bẹbẹ re a ruẹ obe-usi jọ evaọ Germany nọ o wha iyẹrẹ ẹdhọ na ha. Iwou etẹlivisiọne gbe irediyo buobu i whowho iyẹrẹ hayo ekiẹriwo kpahe ẹdhọ na. A ti whowho odẹ Jihova kẹre te enẹ ẹdẹọvo evaọ Germany he.

[Ọnọ o wo uwoho nọ o rrọ ẹwẹ-obe avọ 31]

AP Photo/Daniel Maurer