“Evaọ Elo Ra Ma Jẹ Ruẹ Elo”

ẸSIBUOBU ma re rri elo vo bẹsenọ a rẹ rehọ ikpẹ no nọ okegbe mai na kpobi o re ro muebi. Ma rẹ wereva inọ, “ehri elo” odhiwu mai na—ọre na—o re fuẹ hẹ. Yọ avọ obufihọ elo ọre na, ma rẹ sae ruẹ ude, re emu, wẹ, jẹ rria.

Nọ elo ọ r’oja kẹ uzuazọ na, u re gb’omai unu hu nọ ma tẹ jọ obe Emuhọ se nọ elo ọ roma via evaọ ẹdẹ emama ọsosuọ. “Ọghẹnẹ ọ tẹ ta nọ: ‘Jọ elo ọ ze.’ Elo ọ tẹ ze.” (Emuhọ 1:3, NW ) N’otọ ze, ezae egba-egagọ wọhọ Devidi Ovie na a vuhu Jihova mu wọhọ ehri uzuazọ gbe elo. Devidi o kere nọ: “Keme who wo eyeri azọ; evaọ elo ra ma jẹ ruẹ elo.”—Olezi 36:9.

Eme ọ Devidi na e rrọ uzẹme evaọ eriwo gheghe gbe edhere ẹwoho. Encyclopædia Britannica o dhesẹ nọ: “Fiki elo ma be rọ ruẹ ude.” O te fibae nọ: “Evuẹ buobu e rẹ rọ ẹkwoma ibiaro na ruọ ẹvori ohwo-akpọ vi ẹkwoma ekwakwa ugboma efa kpobi.” Nọ eware buobu nọ ma wuhrẹ e roma hwa okẹ ude-oruẹ na—onọ o gwọlọ elo re ma ruẹ ziezi na—a jọ Ikereakere na rọ elo ruiruo evaọ edhere ẹwoho.

Fikiere, Jesu ọ ta kẹ ilele riẹ nọ: “Mẹ họ elo akpọ na; ọnọ o lele omẹ ọ rẹ nya evaọ ebi hi, rekọ o re wo elo uzuazọ.” (Jọn 8:12) Elo ẹwoho nọ Jesu ọ ta kpahe na họ ovuẹ uzẹme nọ o whowho, onọ o rẹ sai lo fihọ iroro gbe idu enọ e be gaviezọ kẹe. Nọ ikpe buobu erọ ebi abọ-ẹzi nọ a jọ e vrẹ no, enẹna ilele Jesu a rẹ sai wo otoriẹ ẹjiroro Ọghẹnẹ kẹ ahwo-akpọ gbe ẹruore Uvie na. Onana o ghine jọ “elo uzuazọ,” keme ẹriẹ oyena o rẹ sai su kpohọ uzuazọ ebẹdẹ bẹdẹ. Jesu ọ jọ olẹ ta kẹ Ọsẹ obọ odhiwu riẹ nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Ajọ ma rri elo abọ-ẹzi nana vo vievie he!