Ukoko Akpọ-Soso A be Rẹrote Ohwohwo
ERIA kpobi nọ ubiẹro na o rẹ ruẹ thabọ te, ahwo a rrọ etẹe. Ibuobu e kpako no, ejọ rai e be mọ te epanọ a be rọ rehọ udugaga nya. Eyae nọ i dihọ te eyẹ no gbe emoha nọ e rọo no avọ emọ nọ a bi si lele oma e riẹ. Aikpobi na yọ ahwo nọ a dhẹ no orẹwho rai—ezae, eyae, gbe emọ—enọ ẹmo omoma, okpẹtu nọ ohwo ọ so ho, hayo iyero efa i le no iwou rai no a be gwọlọ adhẹzọ evaọ erẹwho ekẹloma. Ejọ e dhẹ no iwou rai unuẹse buobu no. Okenọ ozighi omoma hayo okpẹtu nọ ohwo ọ so ho ọ tẹ kake romavia, a rẹ wọ umutho ekwakwa eyero uwou jọ, koko emọ rai họ, a vẹ dhẹ kpohọ oria ufuoma. Nọ uyero na u te kiehọ no, ibuobu nọ e dhẹ no ẹwho rai a ve zihe ze te wariẹ bọ iwou rai je mu uzuazọ họ.
Anwọ ikpe buobu na, Central African Republic ọ kuvẹ kẹ ahwo nọ a dhẹ no erẹwho buobu ze re a rueva orẹwho na. Kẹle na, o gba idu ahwo buobu họ, kugbe Isẹri Jihova buobu, re a dhẹ no Democratic Republic of Congo nọ ẹmo ọ rrọ kpohọ Central African Republic nọ a sae jọ ruẹ umutho ufuoma jọ.
Inievo na I Fiobọhọ
Isẹri nọ e rọ Central African Republic na a rehọ e riẹ wọhọ uvẹ-ọghọ re a ru ọruẹrẹfihotọ kẹ obufihọ. A ruẹrẹ iwou họ kẹ inievo Ileleikristi nọ e be nyaze. Oke ọsosuọ, a jẹ hae rehọ ibrikpẹ evaọ iwou ahwo, rekọ nọ unu ahwo na u bi vihọ na, o tẹ rrọ vevẹ nọ a gwọlọ eruẹrẹfihotọ ofiba efa. A zihe Egwa Uvie jọ kpohọ iwou nọ a rẹ rria. Isẹri otẹwho na e fialoma ze re a ruiruo ro fi ibrikpẹ efa họ, fi ekpọ ame họ, jẹ ralọ otọ iwou na re i kiehọ ahwo nọ a te jarae eva oma. Ahwo nọ a dhẹ no orẹwho rai ze na a je lele inievo otẹwho na bọ iwou ubroke enana. A ru ọruẹrẹfihotọ iwuhrẹ Ileleikristi na kpobi evaọ ẹvẹrẹ Lingala re a sae kẹ ahwo nọ a be dhẹ ze na emu abọ-ẹzi nọ ọ rẹ kẹ uzuazọ. Okugbe ọkpekpe nọ ọ jọ udevie Isẹri otẹwho na gbe erara rai u dhesẹ nọ okugbe-inievo akpọ-soso o muẹro.
Orọnikọ ẹsikpobi ahwo uviuwou ovo a jẹ hai ro te etẹe ususu hu. Ẹsejọ, ahwo uviuwou nọ e vahabọ a rẹ wariẹ kuomagbe evaọ oria nọ a dhẹ kpohọ na. A fi edẹ ahwo nọ a te etẹe no omakọkọ họ Ọgwa Uvie ọvuọvo. A te ru ọruẹrẹfihotọ re a gwọlọ ahwo nọ a te ruẹ hẹ. Uwou ogha nọ o be rẹrote iruo Isẹri Jihova evaọ orẹwho na u je vi imoto esa kẹdẹ kẹdẹ re u fiobọhọ kẹ Isẹri nọ e gbẹ rọ edhere jegbe re a rọ gwọlọ ohwo kpobi nọ a te ruẹ hẹ. A re vuhu imoto enana ẹkwoma oka ulogbo nọ a kere fihọ ae, “WATCH TOWER—Jehovah’s Witnesses.”
Dai roro oghọghọ nọ o jariẹ evaọ okenọ utu emọ ihrẹ jọ nọ e vahabọ no siọ esẹ gbe ini rai ba vẹre a ruẹ omoto Isẹri Jihova na. A tẹ dhẹ kpatakpata kẹle omoto na a te dhesẹ oma rai nọ ae Isẹri. Inievo na i te fiobọhọ kẹ ae rueva omoto na jẹ wọ ae kpohọ Ọgwa Uvie jọ nọ a jọ wariẹ kuomagbe iviuwou rai.
Eme o fiobọhọ kẹ Ileleikristi oruọzewọ enana yerikugbe uyero utioye na, orọnikọ ẹsiẹvo ho, rekọ unuẹse buobu? A wo imuẹro egaga inọ ma be rria edẹ urere na wọhọ epanọ a ruẹaro riẹ evaọ Ikereakere Efuafo na.—2 Timoti 3:1-5; Eviavia 6:3-8.
Fikiere, a riẹ nọ Jihova Ọghẹnẹ o ti si ẹmo, omukpahe, gbe ozighi no kẹle. Ẹbẹbẹ ahwo nọ a rẹ dhẹ no orẹwho rai o te jọ oware anwae. Bọo oke oyena, nya lele ohrẹ Pọl ukọ na nọ o rrọ 1 Ahwo Kọrint 12:14-26 na, Isẹri Jihova e be daoma re a rẹrote ohwohwo. Dede nọ ithẹ, iwhru, evẹrẹ, gbe ugbothabọ e hẹriẹ e rae no ohwohwo, a wo ọdawẹ kẹ ohwohwo, fikiere a rẹ j’owọ vẹrẹ vẹrẹ evaọ okenọ ọjọ o te wo ẹbẹbẹ.—Jemis 1:22-27.
[Udhesẹ-oria nọ o rrọ ẹwẹ-obe avọ 30]
AFRICA
Central African Republic
Democratic Republic of Congo
[Ọnọ o wo uwoho]
Mountain High Maps® Copyright © 1997 Digital Wisdom, Inc.
[Iwoho nọ e rrọ ẹwẹ-obe avọ 30]
A zihe Egwa Uvie esa ruọ oria nọ a re jo dede ahwo rehọ
[Uwoho nọ o rrọ ẹwẹ-obe avọ 31]
A nwane ruẹrẹ eria emu othere họ kpatakpata
[Uwoho nọ o rrọ ẹwẹ-obe avọ 31]
Ibuobu e gbẹ be nyaze
[Uwoho nọ o rrọ ẹwẹ-obe avọ 31]
A yẹ rai obọ rekiyọ a zihe ro ahwo nọ e dhẹ no orẹwho rai no