Esẹgbini—Wha Ru Ẹgwọlọ Emọ Rai Gba!

EMỌ e gwọlọ ọkpọvio gbe ọwhọkuo oyoyou, maero mi esẹ-gbe-ini rai. Evaọ abọ nana, owuhrẹ Brazil jọ, Tania Zagury, ọ ta nọ: “Ẹkoma ọmọ kpobi họ re ọ gwọlọ omawere. U fo re a fi iwhru họ. Ọsẹ gbe oni na a re ru onana. A gbe ru ei hi, emọ na e rẹ vae abọ.”

Ghele na, obọ nọ a be lọhọ vrẹta evaọ ekwotọ buobu nọ i rri ufuoma omobọ ohwo ghaghae na o sai ru ei bẹbẹ re a lele ohrẹ obehru na. Kọ diẹse esẹgbini e sai kpohọ kẹ obufihọ? Esẹgbini nọ e be dhozọ Ọghẹnẹ a re vuhumu nnọ emọ rai yọ “ukuoriọ gbe okẹ nọ u no obọ Ọnowo ze.” (Olezi 127:3) Fikiere, a re rri kpohọ Ẹme Ọghẹnẹ, Ebaibol na, kẹ ọkpọvio evaọ ẹyọrọ emọ rai. Wọhọ oriruo, Itẹ 13:24 o ta nọ: “Ohwo nọ ọmọ ọfa ọ rẹ zoziẹ aro yọ o mukpahe iẹe, rekọ ọnọ o you ọmọ riẹ ọ rẹ whọku ei kẹse kẹse.”

Fikinọ Ebaibol ọ fodẹ “ọmọ ọfa” o nwani dhesẹ nọ ukpe ugbobọ ọvo a rẹ rọ kpọ emọ vi hi; u dikihẹ kẹ epanọ a rẹ rọ kpọ ọmọ họ, oghẹrẹ kpobi nọ a ro ru ei. Evaọ uzẹme, ẹsibuobu ẹmeunu ọvo o rẹ gwọlọ re a kpọ ọmọ fihọ edhere. Itẹ 29:17 o ta nọ: “Whọku ọmọ ra, ọ rẹte kẹ owhẹ eriosehọ; o reti ru eva were owhẹ.”

Emọ e gwọlọ ọwhọkuo uyoyou re a si iruemu ethọthọ n’oma. Ọkpọvio ọgaga ẹwo otiọye na ọ rẹ kẹ imuẹro inọ ọsẹ hayo oni na ọ be daezọ ọmọ na. (Itẹ 22:6) Fikiere, esẹgbini, wha kru udu ga! Ẹkwoma elele uvi ohrẹ Ebaibol na, wha ti ru Jihova Ọghẹnẹ eva were wha ve je wo adhẹẹ evaọ obọ emọ rai.