A Wo Ẹkẹ Areghẹ Rai Re

“EKPAKO i wo areghẹ, rekọ emaha i wo ẹkẹ areghẹ rai re,” ere itẹ Nigeria jọ o ta. Edwin, ọkpako Oleleikristi jọ evaọ Nigeria, ọ ruẹ uzẹme ẹme nana.

Ẹdẹjọ, Edwin ọ jọ otọ agbara evaọ uwou riẹ ruẹ etehe ayọno.

Edwin ọ tẹ nọ emọ esa riẹ nọ: “Ono o wo etehe nana?”

Emmanuel, ọnọ ọ rrọ ikpe eree, ọ tẹ kpunu nọ: “Ọmẹ.” O te fibae vẹrẹ vẹrẹ nnọ etehe ayọno ọnana nọ o mu ekagba no nọ a bru eghogho fihọ ehru riẹ na ọ rrọ kẹ unevaze rọkẹ iruo akpọ-soso erọ Isẹri Jihova. O ru rie vẹ nọ: “Nọ me bi kpohọ Ọgwa Uvie kẹdẹ kẹdẹ hẹ na, me te ru etehe nana re mẹ hai fi ugho nọ mẹ rọ dẹ oware kiọkọ fihọ iẹe.”

Ọsẹ Emmanuel o wo etehe jọ evaọ uwou na nọ ọ rẹ rọ rawo ugho nọ a re ro kpohọ okokohọ ubrotọ ẹgbukpe na. Rekọ fiki ẹbẹbẹ jọ evaọ uviuwou na, a raha ugho nọ o jọ etehe na no. Re ọ ruẹ nọ a rehọ ugho nọ ọ be zọhọ na ru oware ofa ha, Emmanuel ọ tẹ rehọ ugbogbo jọ bru odhogu re ọ tehe iẹe ruru. Nọ odhogu na ọ riẹ ẹjiroro nọ o bi ro ru ugbogbo na, ọ tẹ rehọ eyọno jọ nọ o ro ruiruo kiọkọ ku etehe kẹ Emmanuel. Michael, oniọvo Emmanuel nọ ọ rrọ ikpe isoi, ọ tẹ jẹ yare nọ a ru etehe kẹe re.

Avọ igbunu fiki oware nọ emọ na a ru, Edwin ọ tẹ nọ ae oware nọ a ro ku itehe na. Michael ọ tẹ kuyo nọ: “Mẹ gwọlọ ru unevaze!”

Ababọ ẹriẹ nọ ọsẹ gbe oni rai a riẹ, Emmanuel, Michael, gbe Uche, oniọvo-ọmọtẹ ikpe izii rai, a be hae si ugho no ugho emu uvo rai no fihọ itehe na. Ono ọ kẹ rai iroro yena? Nọ emọ na e nwane kpako te epanọ a sai ro kru ugho no, ọsẹ gbe oni rai a wuhrẹ i rai re a hai fi ugho họ etehe unevaze na eva Ọgwa Uvie na. Avro ọ riẹ hẹ inọ emọ na a rehọ uwuhrẹ na t’udu ziezi.

Nọ itehe na e vọ no, a te bru rai rovie. Igho nọ e jọ itehe na họ ₦347—yọ okolo ugho ho evaọ orẹwho nọ ahwo buobu a bi jo wo vrẹ ₦3,000 ho evaọ k’amara k’amara. Azọhọ unevaze otiọye na o bi fiobọhọ evaọ iruo usiuwoma ota Isẹri Jihova nọ a be jọ akpọ-soso ru enẹna evaọ ekwotọ 235.