Okpẹwho Nọ Ọ Rrọ Ehru Ugbehru

“WHAI họ elo rọkẹ akpọ na, Ẹwho nọ ọ rọ ehru ugbehru a sai si ei no ho,” ere Jesu ọ ta kẹ ilele riẹ evaọ Ovuẹ obọ Ugbehru riẹ nọ o viodẹ gaga na.—Matiu 5:14.

A bọ ewho Judia gbe Galili buobu fihọ ehru igbehru viukpọ ikiekpotọ. Fiki omofọwẹ a jẹ mae rọ salọ ehru igbehru na. U te no egbaẹmo nọ e rẹ wọ ohọre ze no, ogbotu ọraha a jẹ hae wọ ọraha ziọ ewho Izrẹl. (2 Ivie 5:2; 24:2) Ahwo uduowha a rẹ sae thọ iwou nọ a bọ kẹle ohwohwo evaọ ehru ugbehru vi ẹwho ukiekpotọ, onọ o rẹ gwọlọ igbẹhẹ ilogbo kẹ uketha.

Nọ o rọnọ a jẹ hae rọ ọda ọfuafo ralọ iwou ahwo Ju na, o jọ lọlọhọ re a ruẹ iwou enana evaọ ugbothabọ. (Iruẹru 23:3) Evaọ otọ ọre ọnwranwra ọrọ Palẹstain na, ewho igbehru enana e jẹ hai lo, wọhọ epanọ ewho Mediterenia nọ a bọ oghẹrẹ ovo na i re lo nẹnẹ na.

Jesu ọ rehọ ewho Galili gbe erọ Judia enana ro wuhrẹ ilele riẹ iruo Oleleikristi uzẹme. Ọ ta kẹ ae nọ: “Ere ru re elo rai o lo iraro ahwo, re a ruẹ iruo iwoma rai, a jiri Ọsẹ rai nọ ọ rọ obọ odhiwu.” (Matiu 5:16) Dede nọ Ileleikristi a re ruiruo ezi re ahwo a ruẹsi jiri ai hi, ahwo a re muẹrohọ uruemu ezi rai.—Matiu 6:1.

A rẹ mae ruẹ uruemu ezi utioye na eva ikokohọ ubrotọ erọ Isẹri Jihova. Obeusi jọ evaọ Spen, nọ o ta kpahe okokohọ jọ kẹle, o niyẹrẹ nọ: “Nọ isiuru kpahe eme egagọ i bi fu no evaọ egagọ efa na, onana o rrọ ere he kugbe Isẹri Jihova. Fikinọ a gwọlọ re aghare Ebaibol na o kiekpo ho, a bi fi Ẹme Ọghẹnẹ h’iruo.”

Thomas, ọsẹro ogege jọ nọ Isẹri na a re jo ru okokohọ ẹsikpobi evaọ ofẹ ẹkpẹlobọ-ukiediwo-ọre Spen, ọ rẹ wereva inọ ọ be jọ kugbe ahwo nọ i bi fi Ẹme Ọghẹnẹ h’iruo. Ọ kpako te ohwo nọ ọ rẹ se iruo ba no, rekọ o go oke eriosehọ riẹ n’iruo kparo eka buobu re ọ sae jariẹ evaọ etoke okokohọ ubrotọ Isẹri Jihova. Okenọ ahwo okokohọ na buobu, kugbe emaha, a nyabru rie re a yere iei fiki obufihọ riẹ evaọ ikpe na kpobi jẹ be l’ẹrro kẹe re eware i kiehọ kẹe evaọ etoke arutore riẹ, ọ tẹ va ruọ oviẹ. Ọ ta nọ: “Ẹriẹ nọ mẹ riẹ owhai na yọ oware uwoma nọ o via k’omẹ no evaọ uzuazọ mẹ.”

Okpẹwho nọ ọ rrọ ehru ugbehru o re si iroro oriughe rehọ keme whọ rẹ rue riẹ vevẹ gbe fikinọ iwou efuafo nọ e riẹ i re ke evaọ elo ọre na. Epọvo na, a rẹ jọ oma Ileleikristi ruẹ ohẹriẹ uvevẹ keme a be daoma lele itee ikpehru Ikereakere erọ oruọzewọ, ẹfuọ uruemu, gbe ohrọoriọ.

Fibae, Ileleikristi a bi dhesẹ elo uzẹme na ẹkwoma iruẹru usiuwoma ota rai. Pọl ukọ na ọ ta kpahe Ileleikristi ikpe-udhusoi ọsosuọ na nọ: “Fikiere nọ oma wo iruo enana no, fiki epaọ ohrọ Ọghẹnẹ nọ u te omai obọ no, ma gbe wo ozọ họ; . . . rekọ fiki odhesẹvia uzẹme na ma re ro dhesẹ oma mai kẹ iroro ohwo kpobi eva aro Ọghẹnẹ.” (2 Ahwo Kọrint 4:1, 2) Dede nọ a nyaku ọkparesuọ evaọ oria kpobi nọ a jọ ta usiuwoma, Jihova ọ ghale odibọgba rai te epanọ evaọ ukpe 60 C.E., Pọl ọ sai ro kere nnọ a whowho emamọ usi na kẹ “enọ a ma kpobi evaọ akpọ na” no.—Ahwo Kọlọsi 1:23.

Nẹnẹ, Isẹri Jihova a se owha-iruo rai re a ru ‘re elo rai o lo eva iraro ahwo’ gboja gaga, wọhọ epanọ Jesu o j’uzi riẹ na. Ẹkwoma ẹmeunu gbe ebe nọ a bi kporo, Isẹri Jihova a bi whowho emamọ usi Uvie na evaọ ekwotọ 235 nya akpọ na wariẹ. Re elo Ebaibol na ọ sai te ahwo buobu, a kporo ebe Ebaibol evaọ evẹrẹ 370 no.—Matiu 24:14; Eviavia 14:6, 7.

Evaọ eria buobu, Isẹri na a rehọ use-abọ na no re a wuhrẹ evẹrẹ ahwo nọ e kwa no erẹwho nọ a jọ whaha iruo usiuwoma ota na enẹna hayo evaọ anwẹdẹ ze. Wọhọ oriruo, ahwo buobu a bi zurie no China gbe Russia ze ruọ ikpewho ilogbo buobu evaọ North America. Isẹri ẹwho na a daoma no wuhrẹ evẹrẹ China, Russia, gbe evẹrẹ efa re a sae ta usiuwoma kẹ erara na. Evaọ uzẹme, a bi wuhrẹ ahwo evẹrẹ efa vẹrẹ vẹrẹ re a sae ta usiuwoma na kẹ amọfa buobu nọ udhu na o “fano kẹ evuo” na.—Jọn 4:35.

Aizaya ọruẹaro na ọ ruẹaro nọ: “Edẹ e te tha nọ a rẹ te rehọ ugbehru-itho uwou ỌNOWO na viẹ kerọ igbehru-itho nọ i kpehru thesiwa, nọ u re ti kpehru vi igbehru kpobi. Erẹwho na kpobi e vẹ te dhẹ kpohọ iẹe.” Te eva uruemu rai gbe odibọgba rai, Isẹri Jihova a bi fiobọhọ kẹ ahwo evaọ oria kpobi re a nyaze “ugbehru-itho uwou ỌNOWO na” re a wuhrẹ ae kpahe idhere Ọghẹnẹ je wuhrẹ re a nya evaọ eda idhere Ọghẹnẹ. (Aizaya 2:2, 3) Iyẹrẹ evawere riẹ họ, wọhọ epanọ Jesu ọ ta riẹ, a bi kuobọgbe ‘jiri Ọsẹ obọ odhiwu rai,’ Jihova Ọghẹnẹ.—Matiu 5:16; 1 Pita 2:12.