“Ru re Elo Rai O Lo”
1. Uvẹ-ọghọ vẹ ma wo, kọ ẹvẹ ma re ru ei?
1 No ohiohiẹ rite owọwọ, elo ọnwranwra ọre na ọ be wha ujiro se Jihova Ọghẹnẹ. Rekọ elo nọ Jesu ọ ta kẹ ilele riẹ inọ a lo u wo ohẹriẹ, oyehọ “elo uzuazọ.” (Jọn 8:12) Uvẹ-ọghọ ulogbo o rrọ nọ ma ro wo elo abọ-ẹzi nana onọ u si ewha-iruo ilogbo lele oma. Jesu ọ ta nọ: “Ru re elo [ra] o lo iraro ahwo,” re amọfa a wo erere noi ze. (Mat. 5:16) O r’oja gaga enẹna vi epaọ anwẹdẹ re ma ru elo mai lo via evaọ ebi ọlala abọ-ẹzi nọ ọ rrọ akpọ na. Ẹvẹ ma sai ro ru elo mai lo via wọhọ epanọ Kristi o ru?
2. Ẹvẹ Jesu o ro dhesẹ epanọ u wuzou te re a ta ẹme Ọghẹnẹ kẹ amọfa?
2 Ẹkwoma Usiuwoma Ota: Jesu ọ rehọ oke, ẹgba, gbe eyero riẹ ro ru elo uzẹme na te ahwo obọ evaọ obọ iwou rai, evaọ ẹgbede, eva ehru igbehru gbe eria kpobi nọ a rẹ jọ ruẹ ahwo. Ọ riẹ nọ onana o rẹ wha irere ebẹdẹ bẹdẹ se ahwo. (Jọn 12:46) Re elo uzẹme na o sai gbe te amọfa buobu, o wuhrẹ ilele riẹ re a jọ “elo rọkẹ akpọ na.” (Mat. 5:14) A re ru elo rai lo ẹkwoma eware iwoma nọ a re ru kẹ amọfa gbe ẹme Ọghẹnẹ nọ a rẹ ta kẹ ae.
3. Ẹvẹ ma sai ro dhesẹ uvi edẹro kẹ elo uzẹme na?
3 O rrọ ahwo Ọghẹnẹ oja gaga re a “nya wọhọ emọ elo,” yọ a rẹ ta usiuwoma eva oria kpobi nọ a rẹ jọ ruẹ ahwo. (Ẹf. 5:8) Ebaibol na nọ who re se evaọ obọ iruo hayo obọ isukulu evaọ oke ibreki o rẹ sai rovie uvẹ usiuwoma ota fihọ. Ere oruo u fi obọ họ kẹ oniọvo-ọmọtẹ ọmaha mai jọ mu obe-uwuhrẹ Ebaibol họ je fi ebe họ ada rọkẹ emọ eklase riẹ nọ i bu te 12.
4. Fikieme ‘elo mai nọ ma re ru re u lo’ o rọ kere te emamọ uruemu?
4 Ẹkwoma Iruo Iwoma: Abọ ọfa nọ ma re jo ru elo mai lo họ evaọ uruemu mai kẹdẹ kẹdẹ. (Ẹf. 5:9) Amọfa a re muẹrohọ uruemu uwoma mai evaọ oria iruo, obọ isukulu, gbe eria efa, yọ onana u re rovie uvẹ nọ ma rẹ rọ ta ẹme Ọghẹnẹ kẹ amọfa. (1 Pita 2:12) Wọhọ oriruo, emamọ uruemu ọmọzae ikpe isoi jọ o lẹliẹ iticha riẹ rehọ ifonu se ọsẹgboni riẹ. Ọ ta nọ, “Mẹ re ruẹ ọmọ nọ o wo emamọ uruemu te enẹ hẹ!” Ẹhẹ, odibọgba mai gbe uruemu uwoma mai u re si ahwo ziọ “elo uzuazọ” na jẹ wha ujiro se Ọghẹnẹ mai.