“Ru Re Elo Rai O Lo”
1 Akpọ nọ ọ wariẹ omai họ na ọ rọ ebi evaọ abọ uruemu gbe abọ-ẹzi. Elo uzẹme na ọ rẹ fere “iruo ebi nọ e rẹ mọ ibi hi” via re ma sae whaha itho ezoruẹ uwhu enana. Fikiere, Pọl ukọ na ọ tuduhọ Ileleikristi awọ nọ: “[Wha] nya wọhọ emọ elo.”—Ẹf. 5:8, 11.
2 “Ubi elo na” u wo ohẹriẹ gaga no ebi akpọ na. (Ẹf. 5:9) Re ma mọ ubi nana o gwọlọ nọ ma rẹ jọ uvi iriruo evaọ uzuazọ Oleleikristi, eghẹrẹ ahwo nọ Jesu ọ rẹ jẹrehọ. Ma re je dhesẹ ekwakwa wọhọ unevaze, oruọzewọ, gbe ajọwha kẹ uzẹme na. O gwọlọ nọ ma rẹ mọ ubi nana evaọ uzuazọ ekẹdẹ kẹdẹ mai gbe evaọ odibọgba mai.
3 Rehọ Uvẹ Kpobi Lo: Jesu ọ ta kẹ ilele riẹ nọ: “[Wha] ru re elo rai o lo iraro ahwo.” (Mat. 5:16) Evaọ aruorokele Jesu, ma re dhesẹ elo Jihova ẹkwoma usiuwoma ota kpahe Uvie Ọghẹnẹ gbe ẹjiroro riẹ. Ma re lo wọhọ ikpẹ evaọ okenọ ma te weze kpohọ iwou ahwo gbe okenọ ma tẹ be vaha uzẹme na eva oria iruo, eva isukulu, eva udevie erivẹ mai, hayo oria kpobi nọ ma jo wo uvẹ na.—Fil. 2:15.
4 Jesu ọ ta nọ ejọ i ti mukpahe elo na. ( Jọn 3:20) Fikiere, u re ru omai whrehe he nọ ibuobu e tẹ se nọ “elo oruaro usiuwoma Kristi” u lo kẹ ae he. (2 Kọr. 4:4) Jihova ọ rẹ ruẹ idu ahwo-akpọ yọ ọ gwọlọ ahwo nọ a kare ẹrẹreokie evaọ udevie ahwo riẹ hẹ.
5 Nọ ma tẹ be nya lele idhere Jihova jẹ be reawere elo abọ-ẹzi, ma rẹ sai dhesẹ iẹe kẹ amọfa. Otẹrọnọ a vuhumu ẹkwoma uruemu mai nnọ ma “wo elo uzuazọ” na, o sae te kẹ ae ọwhọ re a ru inwene nọ i fo re a zihe ro ewhowha elo.—Jọn 8:12.
6 Ẹkwoma eruo re elo mai o lo, ma rẹ wha ujiro se Ọnọma omai je fiobọhọ kẹ ahwo oruọzewọ re a riẹe je wo ẹruore uzuazọ ebẹdẹ bẹdẹ na. (1 Pita 2:12) Nọ o rọnọ ma wo elo na, joma rehọ iẹe fiobọhọ kẹ amọfa ruẹ edhere rono ebi abọ-ẹzi ze je ru iruo elo na.