“Me Duku Eware Kpobi nọ Mẹ Gwọlọ”

WORLD Health Organization (Ukoko Omokpokpọ Akpọ-Soso) o nẹ iyẹrẹ nnọ, ọkora o bi kpomahọ ahwo nọ a bu vrẹ ima 120 enẹna wariẹ akpọ soso họ. Ahwo nọ a bu te ima ọvo a bi zo whu kukpe kukpe yọ ima 10 rite 20 a be hae jẹ owọ ezo. Didi obufihọ o rrọ kẹ enọ e rrọ ọkora? Usiwo imu o rẹ sai ru ẹbẹbẹ na kpotọ, yọ obufihọ iroro nọ amọfa a rẹ kẹ o rrọ oja. Ofariẹ, ejọ nọ e rrọ ẹbẹbẹ otiọye na, a duku obufihọ ofa no evaọ ebe nọ Isẹri Jihova i kporo no Ebaibol ze nọ e rẹ ke uvi ohrẹ, wọhọ epanọ ileta nọ a kere no France ze nọ e rrọ obotọ na i dhesẹ na.

“Omoke jọ nọ u kpemu, uzuazọ u fuo-omẹ enu. Mẹ lẹ se Ọghẹnẹ re ọ rehọ uzuazọ mẹ. O tubẹ wọhọ ẹsenọ me whu no evaọ obeva dede. Be gwọlọ ọkpọvio, mẹ tẹ lẹ se Jihova. Mẹ jiroro nọ me re se 2002 Yearbook of Jehovah’s Witnesses, yọ me se rie re evaọ edẹ esa. U ghine fi obọ họ kẹ omẹ ziezi jẹ bọ ẹrọwọ mẹ ga.

“Me ru ekiakiẹ jọ evaọ emagazini Uwou-Eroro gbe Awake! na, u gbomẹ unu kẹhẹ! Mẹ be hai se emagazini nana kẹse kẹse anwọ ikpe 15 ze na, rekọ me vuhu epanọ izoẹme na i siuru jẹ kẹ ọbọga te he. E vọ avọ uyoyou—okwakwa nọ a rẹ kaki duku evaọ edẹ mai nana ha. Me duku eware kpobi nọ mẹ gwọlọ.”

Ebaibol na ọ ta nnọ: “Ọnowo ọ kẹle enọ i wo eva owhrori, o je siwi enọ a nwẹ eva ẹzi.” (Olezi 34:18) Ababọ avro, enọ i “wo eva owhrori” hayo enọ a “nwẹ eva ẹzi” a rẹ sai duku uduotahawọ avọ ẹruore obaro evaọ Ebaibol na. Isẹri Jihova a be ghale ebe nọ a kporo no Ebaibol ze bi ro fi obọ họ kẹ enọ e gwọlọ wo erere no ehri omosasọ yena nọ Ọghẹnẹ ọ kẹ ẹgba na ze.