Kọ Uvuhu U Ti Kuhọ Ẹdẹjọ?

SOLOMỌN Ovie owareghẹ Izrẹl anwae na ọ ta nọ: “Mẹ tẹ ruẹ irui e nọ a kienyẹ, a wo ohwo nọ ọ rẹ sasa ae oma ha! Enọ ikienyẹ ae na ae a wo ogaga, a wo ohwo ọvo nọ ọ rẹ sasa ae oma ha.” (Ọtausiwoma Na 4:1) Ababọ avro, ibuobu enọ a kienyẹ nọ Solomọn o wo họ iroro na a jọ iyogbe re.

Orọnikọ epanọ ugho o kare ohwo obọ te ọvo họ uvuhu hu. Wọhọ epaọ iyẹrẹ jọ nọ Ebanke Akpọ-Soso o kẹ evaọ June 2002, “a ta inọ evaọ 1998, bu vrẹ ahwo ima-odu ọvo (1,200,000,000) evaọ akpọ na soso a je wo te ₦130.00 evaọ okpẹdoke he . . . yọ enwenọ ahwo ima-odu esa (2,800,000,000) a je wo kawo vi ₦260 evaọ okpẹdoke.” Ebanke na i muẹrohọ inọ dede nọ unu ahwo na u kpotọ vi enọ e vrẹ no, “i gbe kpehru hrọ ghele rọ kẹ uye-oruẹ ohwo-akpọ.”

Kọ uvuhu u ti kuhọ ẹdẹjọ? Jesu Kristi ọ ta kẹ ilele riẹ nọ: “[Whai] avọ iyogbere wha gbẹ rọ kẹse kẹse.” (Jọn 12:8) Kọ onana u dhesẹ nnọ uvuhu gbe akọriọ riẹ e te jariẹ bẹdẹ? Ijo, keme dede nọ Jesu ọ y’eyaa kẹ ilele riẹ inọ aikpobi a te nwane jọ edafe he, ma rẹ nwani ku ei họ no eme riẹ ze he inọ uvumọ ẹruore ọ riẹ kẹ iyogbere na ha.

Dede nọ omodawọ ahwo-akpọ gbe eyaa rai re a si uvuhu no i bi kie wariama, Ẹme Ọghẹnẹ, Ebaibol na, ọ k’omai imuẹro inọ kẹle na uvumọ ohwo ọ gbẹ tẹ jọ oyogbe he. Evaọ uzẹme, Jesu o whowho “emamọ usi kẹ iruori.” (Luk 4:18) Emamọ usi na o kẹre te eyaa na inọ a ti si uvuhu n’otọ. Onana o te via evaọ okenọ Uvie Ọghẹnẹ o tẹ rehọ iyero ikiẹrẹe ziọ otọakpọ na no.

Dai rri epanọ akpọ na o ti wo ohẹriẹ te! Ovie obọ Odhiwu na, Jesu Kristi, ‘ọ te re ohrọ eyẹlẹ gbe iruori je siwi uzuazọ iruori.’ Uzẹme riẹ họ, o ti “siwi uzuazọ rai no okienyẹ avọ ozighi.”—Olezi 72:13, 14.

Kpahe oke oyena, Maeka 4:4 o ta nọ: “Ohwo kpobi ọ rẹ te keria otọ ekakọ gbe otọ ure fig riẹ, ozọ ohwo ọvo u gbe ti mu ai hi; keme ỌNOWO ogbaẹmo na ọ rọ unu riẹ ta no.” Uvie Ọghẹnẹ u ti ku ebẹbẹ kpobi nọ i bi te ahwo-akpọ họ, je tube si ẹyao gbe uwhu no. Ọghẹnẹ ọ te “lọ uwhu no ri bẹdẹ, Ọnowo na ỌGHẸNẸ o veti ririe irui oviẹ no aro rai.”—Aizaya 25:8.

Whọ rẹ sai fi eva họ eyaa enana keme ẹzi Ọghẹnẹ a ro kere ai. Eme whọ gbẹ kiẹ imuẹro nọ i dhesẹ nnọ a rẹ sai fi eva họ eruẹaruẹ Ebaibol na riwi hi?

[Ọnọ o wo uwoho nọ o rrọ ẹwẹ-obe avọ 31]

FAO photo/M. Marzot