“Me Duku Egbẹnyusu, Uyoyou, gbe Ọdawẹ”

“FIKI onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Evaọ orugba eme ọ Jesu na, uyoyou o jọ oka ọrọ okugbe-inievo Ileleikristi ọsosuọ na. Okenọ Kristi o whu vrẹ ikpe udhusoi no, Tertullian ọ wariẹ eme ahwo obọ otafe ta nọ: ‘Rri epanọ a you ohwohwo te gbe epanọ a ruẹrẹ oma kpahe re a whu kẹ ohwohwo.’

Kọ a sae gbẹ jọ akpọ na ruẹ oghẹrẹ uyoyou oyena? Ee. Wọhọ oriruo, roro kpahe ileta jọ nọ i te uwou ogha Isẹri Jihova evaọ Brazil obọ. Marília, aye nọ o kere ileta na, ọ ta nọ:

“Okenọ ma jẹ rria Villa Mercedes, Argentina, ọnyokpa-enwa ọgaga jọ o te kru oni mẹ, ọnọ ọ rrọ omọvo Isẹri Jihova, o tẹ lẹliẹ okie ki ei no eku duotọ. Evaọ emerae eree ọsosuọ ẹyao riẹ na, Isẹri na nọ e jọ Villa Mercedes họ enọ e rehọ uyoyou avọ ororokẹ sẹro riẹ. A je ru eware kpobi kẹe, ru uwou riẹ fo je there emu kẹe. Makọ okenọ ọ jọ ẹsipito, ohwo jọ ọ jẹ hae jọ kugbe oni mẹ ẹsikpobi, t’aso t’uvo.

“Mẹ avọ oni mẹ ma zihe ziọ Brazil no anwẹdẹ, oria nọ ẹyao riẹ o bi jo kpo ẹmẹrera. Isẹri nọ e rrọ oria nọ ma be rria enẹna a be dawo ẹgba rai kpobi re a fi obọ họ kẹ oni mẹ wo oma riẹ zihe ze.”

Marília o ku ileta riẹ họ enẹ: “Uzẹme riẹ họ mẹ yọ Osẹri hi, rekọ me duku egbẹnyusu, uyoyou, gbe ọdawẹ evaọ udevie Isẹri na.”

Ẹhẹ, ahwo jọ a gbẹ riẹ enọ i bi dhesẹ uvi uyoyou Ileleikristi. Evaọ ere oruo, a bi dhesẹ ẹgba nọ iwuhrẹ Jesu e rẹ sai wo evaọ izuazọ mai.