Eme Họ Emu Owọwọ Na?

EME ọ rẹ ze owhẹ iroro nọ who te yo ẹme na “emu owọwọ”? Ahwo buobu a re roro kpahe uwoho uwowoma nọ Leonardo da Vinci (ọnọ ọ rria no 1452-1519) ọ ralọ fihọ Milan, Italy. Uzẹme riẹ họ Emu Owọwọ na yọ uzoẹme nọ ikere-ebe, ewena-uwoho, gbe egba-ile a ta kpahe gaga no anwọ ikpe-udhusoi buobu ze.

Ghinọ eme họ Emu Owọwọ na, kọ otofa vẹ u wo kẹ ahwo nọ a be rria ikpe-udhusoi avọ 21 na? Ebe-ofeme e te vuẹ owhẹ nnọ Emu Owọwọ na, onọ a re je se Emu Owọwọ Olori na, yọ emu nọ Jesu Kristi ọ re kugbe ikọ riẹ evaọ owọwọ urere taure o te ti whu uwhu idheidhe riẹ. Fikinọ o jọ emu owọwọ urere nọ Jesu ọ re kugbe ilele ẹrọwọ riẹ, a se rie n’otọ ze wọhọ Emu Owọwọ na. Yọ fikinọ Jesu Kristi Olori na omariẹ o mu rie họ, u kiehọ re a sei Emu Owọwọ Olori na.

Anwọ ikpe buobu ze na, ibuobu e be rehọ izuazọ rai dheidhe kẹ ute nọ a roro nọ u fo ele. Iwhu enana jọ e kẹ ahwo jọ erere no evaọ etoke jọ. Dede na, nọ a tẹ rehọ ae wawo orọ Jesu, makọ oghẹrẹ nọ iwhu oma-urodheidhe enana jọ i fo ejiro te kẹhẹ, ọvuọvo rai ọ ghare te uwhu Jesu Kristi vievie he. Ofariẹ, uwhu ovuovo nọ ohwo o re whu evaọ akpọ ugbarugba nana nọ o rẹ sai kpomahọ ahwo wariẹ akpọ na họ o riẹ hẹ. Fikieme?

Re ma kẹ uyo onọ yena je fi obọ họ kẹ owhẹ riẹ epanọ Emu Owọwọ Olori na ọ ghare te k’owhẹ, ma zizie owhẹ re who se uzoẹme nọ o r’aro na.