Uyoyou O r’Oja

MAKỌ oghẹrẹ kpobi nọ ohwo ọ kpako te, uruemu-ẹwho, ẹvẹrẹ, hayo ovioma riẹ, ahwo-akpọ kpobi a gwọlọ uyoyou. A gbe ru ẹgwọlọ yena gba ha, a rẹ wereva ha. Ọkiotọ usiwo-imu jọ o kere nnọ: “Uyoyou avọ usu okpekpe họ ehri oware nọ o rẹ lẹliẹ ohwo mọ je ru ohwo sasa, oware nọ o rẹ wha ọkora ze je ru ohwo wereva, oware nọ o rẹ lẹliẹ omai ruẹ uye je su kpohọ usiwo. O hae jọ nọ oghẹrẹ umu okpokpọ jọ o rẹ sai ru iruo itieye, enwenọ edọkita kpobi nọ e rrọ orẹwho na e hae rehọ iẹe kẹ otu nọ a bi siwi. O rẹ jọ oware othọthọ re edọkita ọ siọ umu utioye na ba ẹrọkẹ ahwo.”

Ghele na, uyerakpọ ọgbọna, maero ekwakwa awhusi riẹ gbe ahwo nọ a riẹ odẹ, ẹsibuobu a re fi ẹgba họ efe, ogaga, okpodẹ, gbe owezẹ ezae avọ eyae vi ẹgwọlọ nọ ohwo-akpọ o wo rọkẹ usu uyoyou nọ o rẹ jọ sasasa. Iwuhrẹ buobu a re fi ẹgba họ itee gbe ilale akpọ, bi dhesẹ nọ okenọ ohwo o te wo eware enana ọvo a rẹ rọ ta nọ ọ kparobọ. Uzẹme, ewuhrẹ-obe-oriẹ gbe ẹbọ ona e r’oja, dede na, kọ a rẹ rehọ fiki ere ọvo le ae te epanọ ohwo o gbe ro wo uvẹ kẹ uviuwou gbe egbẹnyusu riẹ hẹ? Okere-ebe oke anwae jọ nọ ọ riẹ obe ziezi nọ ọ nabi muẹrohọ ẹkoma ohwo-akpọ ọ rehọ ohwo nọ o wo ekẹ buobu rekinọ o wo uyoyou hu dhesẹ “ẹroo nọ o re do, hayo edo ẹgogo odhogu.” (1 Ahwo Kọrint 13:1) Ahwo tiọye na a rẹ sai fe, tube viodẹ, rekọ a rẹ ghinẹ were eva ha.

Jesu Kristi nọ o wo uvi uyoyou gbe otoriẹ udidi kpahe ahwo-akpọ, o fi uyoyou kẹ Ọghẹnẹ jẹ rọkẹ erivẹ họ ugogo ẹme uwuhrẹ riẹ. Ọ ta nnọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra. . . . You omọfa epanọ who you oma ra.” (Matiu 22:37-39) Ahwo nọ a ru lele eme enana ọvo a rẹ sae ghinẹ jọ ilele Jesu. Oyejabọ nọ ọ rọ ta inọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:35.

Nọ o rrọ ere na, ẹvẹ ohwo ọ sai ro wo uyoyou evaọ akpọ inẹnẹ? Kọ ẹvẹ eyewọ e sai ro wuhrẹ emọ rai kpahe uyoyou? Uzoẹme n’otha na o te t’ẹme kpahe enọ enana.

[Iwoho nọ e rrọ ẹwẹ-obe avọ 3]

O rrọ use-abọ re a dhesẹ uyoyou evaọ akpọ nọ oriobọ ọ da fia