Oghẹrẹ Uyoyou nọ O Mae Rro Kpaobọ

A REHỌ “uyoyou” fa ẹme Griki nọ a re se a·gaʹpe na ẹsibuobu evaọ Ikereakere Griki Ileleikristi hayo Ọvọ Ọkpokpọ na.

Nọ u je fi elo họ otofa ẹme ọyena, obe ọ Insight on the Scripturesa o ta nnọ: “[A·gaʹpe] orọnikọ ọwhọ iroro nọ ọ rẹ dhẹ ro ohwo oma fiki usu nọ ohwo o wo kugbe omọfa ha, wọhọ epanọ a be hae rehọ iẹe, ukpoye o rrọ uyoyou uruemu ezi hayo orọ ọriakugbe nọ ohwo ọ rẹ rehọ aruro jẹrehọ wọhọ ehri-uzi nọ u te ohwo eruo, gbe onọ u kiehọ, nọ o rẹ ghinẹ gwọlọ ewoma ọrivẹ eva oware nọ u kiete. (Uyoyou) a·gaʹpe u re fi egrẹ kparobọ, o rẹ kẹ egrẹ uvẹ hẹ re u ru ohwo gbabọ kẹ emamọ ehri-uzi, re o ru ohwo kele.”

A·gaʹpe o sai je kugbe ọdawẹ odidi nọ ohwo o re wo. Pita ukọ na ọ kẹ ohrẹ nọ: ‘Whai ohwo ọ rọ uyoyou nọ o rẹ hiẹ hẹ [a·gaʹpe] you ohwo.’ (1 Pita 4:8) Fikiere, a sae ta nọ a·gaʹpe o re no udu kpobi gbe iroro ohwo ze. Fikieme who gbe roro kpahe ikereakere jọ nọ i dhesẹ ẹgba gbe epanọ uyoyou ulogbo nana o kẹre te he? Eria ikereakere nana e rẹ sai fi obọ họ: Matiu 5:43-47; Jọn 15:12, 13; Ahwo Rom 13:8-10; Ahwo Ẹfẹsọs 5:2, 25, 28; 1 Jọn 3:15-18; 4:16-21.

[Oruvẹ-obotọ]