Iwhowho Uvie A N’iyẹrẹ

Emamọ Iyẹrẹ nọ I no Odiri avọ Akothiho Ze

JESU KRISTI ọ ruẹaro nọ evaọ edẹ urere na, “uyoyou ahwo buobu u re ti kiekpo.” Fiki onana, evaọ abọ akpọ na buobu nẹnẹ, ahwo buobu a wo osegboja kẹ emamọ usi Uvie na ha. Ahwo jọ a be tubẹ rehọ ubiẹro ẹkoko rri egagọ dede.—Matiu 24:12, 14.

O make rrọ ere na, avọ ẹrọwọ gbe odiri, iwhowho Uvie a bi fi ẹbẹbẹ na kparobọ, wọhọ epanọ iyẹrẹ obotọ nọ i no obọ Czech Republic ze i dhesẹ na.

Isẹri ivẹ jọ a fi ẹme se aye jọ nọ ọ kare ẹthẹ gboma. U kri hi, ẹthẹ na o te rovie họ emu omojọ, aye na o te vi obọ ze mi emagazini Uwou-Eroro Na gbe Awake! nọ Isẹri na a jẹ rọ kẹe. A te yo urru nọ o ta nọ “me yere owhai,” ẹthẹ na o te sihọ. Isẹri na a tẹ be ta kẹ omoma rai nọ: “Kọ ma wariẹ zihe?” Ọvo rai jọ, ọkobaro, hayo ọgbodibo oke-kpobi, o te zihe, rekọ oware ovo na o via, yọ enẹ ọvo o via evaọ ẹgbukpe ọsoso.

Nọ ọ jẹ iroro nnọ ọ te rehọ oghẹrẹ ofa ro te aye na oma no, ọkobaro na ọ tẹ lẹ se Jihova kẹ obufihọ. Oke ofa nọ ọ kẹe emagazini, ọ tẹ rehọ oma ogbẹnyusu nọ aye na nọ: “Whọ sasa? Kọ ẹvẹ who wo erere no emagazini na ze te?” Oke ọsosuọ aye na ọ kpunu hu, rekọ nọ o zihe te unuẹse jọ no, aye na o te mu oma họ ẹsasa. Ẹsiẹvo jọ, o rovie ẹthẹ na fihọ gbaladha, rekọ a ta ẹme na theri hi.

Fikinọ aye na ọ be rọwo ta ẹme tere evaọ unuẹthẹ hẹ, ọkobaro na o te dhugbe kere ileta sei kpahe ẹjiroro iweze na gbe epanọ o re ro ru uwuhrẹ Ebaibol kugbei. Ukuhọ riẹ, nọ ọkobaro na o ti wo odiri te ukpe ovo gbe ubro no, o te mu uwuhrẹ Ebaibol họ kugbe aye na. U gbe oniọvo na unu jẹ ta udu họ iẹe awọ nọ aye na ọ ta kẹe uwhremu na nọ: “Mẹ rọwo Ọghẹnẹ no anwọ okenọ who ro mu emagazini enana họ ero se omẹ.”

Uzẹme, odiri avọ ithihakọ e rẹ sae wha emamọ iyẹrẹ ze evaọ iruo usiuwoma ota Uvie gbe ilele-iruo na.—Matiu 28:19, 20.