O You Ẹwo

MILTON G. HENSCHEL, nọ ọ jọ omọvo Ugboma Esuo Isẹri Jihova oke krẹkri, o ku iruo otọakpọ riẹ họ evaọ Ẹdẹ-Ọmaha, March 22, 2003. Ikpe 82 ọ kpako te.

Nọ ọ jọ upelẹ ọzae, Milton Henschel o ku oma gbe Isẹri Jihova nọ i bi ruiruo eva obọ ehri Ukoko na jẹ gọ avọ ẹrọwọ vrẹ ikpe 60. U kri hi, a tẹ te riẹe wọhọ ohwo nọ o wo uvi orimuo gbe uvi isiuru kẹ iruo usiuwoma ota Uvie na. Evaọ 1939 ọ tẹ te jọ okere-obe rọkẹ Brọda N. H. Knorr, ọnọ ọ jọ ọsẹro oria ebe-ikere Isẹri Jihova evaọ Brooklyn. Eva okenọ Brọda Knorr o zihe ruọ ọnọ ọ be rẹro te iruo Isẹri na nya akpọ soso wariẹ evaọ 1942, ọ rehọ Brọda Henschel gboma wọhọ ethabọ riẹ. Brọda Henschel ọ rọo Lucille Bennett evaọ 1956, yọ aimava a ruẹ awere gbe ẹgaga kugbe evaọ uzuazọ.

Brọda Henschel o ruiruo kpekpekpe kugbe Brọda Knorr bẹsenọ Knorr o ro whu evaọ 1977. Ẹsibuobu, evaọ usu kugbe Brọda Knorr, Brọda Henschel o kpohọ erẹwho nọ i bu vrẹ 150, weze bru jẹ ta udu họ Isẹri Jihova wariẹ akpọ soso họ, maero kọ imishọnare gbe enọ e rrọ iwou ogha. Erẹ itieye na e jọ bẹbẹ eva ẹsejọ, tubẹ jọ ọza dede. Evaọ 1963 nọ o je kpohọ okokohọ jọ evaọ Liberia, a kpokpo Brọda Henschel gaga fikinọ ọ se inọ o re dhe oma họ iruẹru orẹwho ho.a Avọ udu, Brọda Henschel o zihe kpohọ Liberia nọ emerae jọ e nwane vrẹ no re ọ ruẹse ta ẹme kugbe osu orẹwho na jẹ yare ufuoma egagọ kẹ Isẹri Jihova nọ e rrọ obei.

Evaọ ekuhọ ebẹbẹ ilogbo gbe ovao o rẹriẹ dhe use-abọ, a riẹ Brọda Henschel wọhọ ohwo nọ eme riẹ i re wo iruo, nọ ọ rẹ lọhọ obọ kẹ amọfa, avọ orimuo. Ahwo nọ a jọ kugbei a ta ẹme owoma riẹ gaga maero kpahe epanọ ọ kpatiẹ te, ababọ-omorro riẹ, gbe epanọ ọ sasa te. Fikinọ ọ rẹ kareghẹhọ oware gaga, o jọ oware evawere gaga kẹ imishọnare buobu wariẹ akpọ na họ evaọ oghẹrẹ nọ ọ jẹ hae rọ kareghẹhọ edẹ rai, ta ẹmẹme jọ evaọ ẹvẹrẹ rai, gbolo ẹme jọ nọ o re fo ehwẹ—avọ ovao nọ o rrọ whẹtiẹ whẹtiẹ.

Maeka 6:8 o kareghẹhọ omai inọ Jihova ọ gwọlọ nọ ma “kielele uyoyou.” A te kareghẹhọ Milton Henschel rọkẹ oriruo nọ o fihọ otọ evaọ abọ yena. Ghelọ iruo nọ e vọ riẹ uzou, ọ jẹ whẹtiẹ ahwo h’oma, ọ jọ wowolẹ jẹ jọ wowou. Ọ jẹ hae ta ẹsikpobi nnọ, “Nọ iroro e tẹ bẹ owhẹ ẹjẹ, kareghẹhọ inọ oware uwowou nọ who re ru họ onọ o mai woma.” Dede nọ ma bi weri nnọ oniọvo oyoyou nana ọ v’omai abọ, ma ghọghọ inọ o thihakọ te urere avọ ẹrọwọ, avọ irẹro inọ o ti wo osa riẹ, “etu uvie uzuazọ.”—Eviavia 2:10.

[Oruvẹ-obotọ]

[Uwoho nọ o rrọ ẹwẹ-obe avọ 17]

M. G. Henschel avọ N. H. Knorr

[Uwoho nọ o rrọ ẹwẹ-obe avọ 17]

Avọ aye riẹ, Lucille