Enọ Ahwo nọ A s’Ebe

Nọ ahwo Livai a wo ukuoriọ evaọ Izrẹl anwae he na, ẹvẹ Hanamẹl, ohwo Livai na, ọ sae rọ zẹ otọ kẹ Jerimaya, omoni riẹ nọ ọ rrọ ohwo Livai, wọhọ epanọ o rrọ Jerimaya 32:7 na?

Kpahe ahwo Livai, Jihova ọ ta kẹ Erọn nọ: “Who re ti wo [ukuoriọ] eva otọ rai hi, hayo who re wo ẹkẹ jọ eva udevie [Izrẹl he].” (Ikelakele 18:20) Ghele na, a kẹ ahwo Livai ikpewho 48 avọ etọ nọ ithuru rai e rẹ jọ re ẹbe, nọ e jọ abọ sa-sa ọrọ Ẹkwotọ Eyaa na. Otẹwho Jerimaya họ Anatọt, ovojọ evaọ usu ikpẹwho nọ a rọ kẹ “iruọmọ Erọn ozerẹ na.”—Joshua 21:13-19; Ikelakele 35:1-8; 1 Iruẹru-Ivie 6:54, 60.

Eva Iruo-Izerẹ 25:32-34, ma ruẹ nnọ Jihova ọ kẹ igogo ithubro kpahe ‘udu ẹfa’ otọ nọ ahwo Livai a wo. U muẹro inọ, uviuwou Livai kpobi u re wo udu ukuoriọ kpahe ewo, eroruiruo, gbe ẹzẹ etọ jọ. Oyena o kẹre te ẹzẹ gbe ẹdẹ etọ.a Evaọ idhere buobu, ahwo Livai na a wo etọ jẹ rehọ ae ru iruo wọhọ emọ Izrẹl erọ erua efa na.

Ẹsejọhọ, ohwo ọ rẹ sae reuku etọ Livai itieye na mi omọfa uviuwou na. Dede na, rọkẹ ‘udu ẹfa’ itieye na, ohwo Livai ọvo ohwo Livai ọfa ọ rẹ sae wariẹ zẹ etọ itieye na kẹ. Ofariẹ, o wọhọ nọ ẹzẹ gbe ọwariẹ-dẹ otọ u kie kpahe otọ nọ o rrọ udevie ikpewho na ọvo, keme “idhu ogbotu na nọ erọ ẹwho rai” a rẹ zẹ ae he “keme eyena yọ erai ribrii.”—Iruo-Izerẹ 25:32, 34.

Fikiere otọ nọ Jerimaya ọ wariẹ-dẹ mi Hanamẹl na o sae jọ utionọ omọfa ọ rẹ sae wariẹ dẹ. O sae jọ nọ eva okpẹwho na o jọ. Jihova omariẹ o dhesẹ inọ “otọ” nọ ma be t’ẹme kpahe na yọ orọ Hanamẹl gbe nnọ Jerimaya o wo ‘udu ẹfa riẹ.’ (Jerimaya 32:6, 7) Jihova ọ rehọ edadẹ nana ro ru iruo evaọ edhere ẹwoho ro fi ẹgba họ eyaa riẹ inọ emọ Izrẹl a ti zihe ze te fa ukuoriọ otọ rai okenọ a tẹ jọ igbo omojọ evaọ Babilọn no.—Jerimaya 32:13-15.

Uvumọ oware u dhesẹ hẹ inọ egboro Hanamẹl o gboro otọ Anatọt na rehọ. Uvumọ oware u dhesẹ hẹ inọ ọ raha uzi Jihova evaọ okenọ o zizie Jerimaya re ọ dẹ otọ nana evaọ Anatọt hayo inọ Jerimaya ọ l’uzi vrẹ evaọ edhesẹ udu ẹfa nọ ọ rọ dẹ otọ na.—Jerimaya 32:8-15.

[Oruvẹ-obotọ]