Kọ Ẹrọwọ Ọ rẹ Sai Siwi Ọnọ Ọ Be Mọ?

OKENỌ ma tẹ be mọ, ma rẹ gwọlọ usiwo. Ẹsejọhọ, whọ riẹ no Ebaibol na ze inọ unuẹse buobu Jesu Kristi o siwi oghoghẹrẹ eyao sa-sa, ru oma ga ibuobu nọ e jẹ mọ. Ẹvẹ usiwo itieye na e rọ via? Wọhọ epanọ Ebaibol na e ta riẹ, ẹkwoma ‘ogaga Ọghẹnẹ’ o ro siwi ai. (Luk 9:42, 43; Iruẹru 19:11, 12) Fikiere, ẹzi ọfuafo Ọghẹnẹ ọ wha usiwo na ze, orọnikọ nwanọ ẹrọwọ ọnọ ọ be mọ na ha. (Iruẹru 28:7-9) Oye jabọ nọ Jesu ọ gbẹ jẹ rọ hẹrẹ re ahwo a ta nnọ a fi ẹrọwọ họ iẹe taure o te ti siwi ai hi na.

O rẹ sai gb’owhẹ unu nọ: ‘Kọ usiwo igbunu yọ oware anwae ọvo, manikọ oghẹrẹ usiwo nọ Jesu o ru na o te gbẹ roma via? Didi ẹruore ọ riẹ kẹ enọ e be ruẹ uye ẹyao ọdada hayo eyao nọ a be sai siwi hi?’

Ebaibol na i ru rie vẹ inọ evaọ akpọ ọkpokpọ okiẹrẹe Ọghẹnẹ, ogaga Ọghẹnẹ o te wariẹ wha oghẹrẹ usiwo igbunu nọ Jesu o ru evaọ okenọ ọ jọ otọakpọ na ze. O te were Isẹri Jihova nọ e rrọ oria ra re a dhesẹ k’owhẹ oghẹrẹ gbe okenọ Ọghẹnẹ o ti ro ru oware nọ uvumọ ohwo nọ ọ ta nọ o bi siwi ahwo nẹnẹ ọ rẹ sai ru hu—esino eyao kpobi, kugbe uwhu. Ẹhẹ, Ọghẹnẹ ọ rẹ te “lọ uwhu no ri bẹdẹ.”—Aizaya 25:8.