Enọ Ahwo nọ A s’Ebe

Eme họ otofa eme Jesu na nọ ọ ta kẹ ilele riẹ inọ: “Mẹ ruẹ Setan nọ o kie nọ ehru ze wọhọ egbrara”?

Jesu ọ nwane salọ ilele 70 no obọ, “o te vi ai imimava, karo kpohọ kiwhre kiwhre nọ ọ rẹ te nya.” Nọ ilele 70 na a zihe ze, a tẹ jẹ ghọghọ fiki obokparọ nọ a wo evaọ uwou nọ a vi rai. A ta nọ: “Olori, makọ ikọ-imuomu dede i yo eme mai fiki odẹ ra!” Eva oke yena, Jesu ọ tẹ ta nọ: “Mẹ ruẹ Setan nọ o kie nọ ehru ze wọhọ egbrara.”—Luk 10:1, 17, 18.

Whọ tẹ kaki rri eme na, o rẹ wọhọ nnọ Jesu ọ be ta kpahe oware nọ o via vrẹ no. Ghele na, ikpe 60 nọ Jesu ọ ta eme obehru na vrẹ no, Jọn ukọ nọ ọ kpako no na ọ ta ọkpọ eme yena nọ o kere nọ: “A te gele odudu ologbo na fihọ otọ, oriọvọ anwae na ọnọ a re se Ukumuomu gbe Setan na, ọnọ ọ rẹ viẹ akpọ kpobi họ na—a te gele ie ze otọ akpọ, a te gele ikọ riẹ lele ie.”—Eviavia 12:9.

Nọ Jọn o kere eme yena, Setan ọ gbẹ jọ obọ odhiwu. Ẹvẹ ma rọ riẹ? Keme Eviavia yọ obe eruẹaruẹ, orọnikọ ikuigbe he. (Eviavia 1:1) Fikiere, eva oke Jọn, a ri le Setan ziọ otọakpọ họ. Evaọ uzẹme, imuẹro i dhesẹ inọ okenọ a ro gele iei ziọ otọakpọ họ okenọ a nwane rehọ Jesu mu wọhọ Ovie Uvie Ọghẹnẹ no evaọ 1914.a—Eviavia 12:1-10.

Kọ fikieme Jesu ọ rọ ta kpahe egele Setan no odhiwu ze wọhọ epaọ ẹsenọ o via no? Ewena-isukulu jọ a ta nnọ o wọhọ nọ Jesu ọ jẹ whọku ilele riẹ fiki omovia nọ a dhesẹ. Wọhọ epanọ ahwo nana a rọwo, ọ be ta kẹ ae nọ: ‘Wha fi idhivẹri na kparobọ, rekọ wha fu uke he. Fiki uke nọ Setan o fu, oye o wha ekie ọkpakpata riẹ ze.’

Ma rẹ sae rehọ obọ sudu ta ẹme nana ha. Dede na, o wọhọ nọ Jesu ọ jẹ ghọghọ kugbe ilele riẹ jẹ ta kpahe ọraha Setan nọ o rrọ obaro tha. Jesu ọ riẹ kpahe egrẹ ologbo Ẹdhọ viọ ilele riẹ kpobi. Dai roro eva nọ e were Jesu nọ o yo nọ idhivẹri egaga na a bi kie kẹ ilele ahwo-akpọ riẹ nọ a gba ha! Obọ nana nọ a ga vi idhivẹri na yọ ẹmẹvo gheghe ọrọ ẹdẹ obaro nọ Jesu, wọhọ Maekẹl olori ijẹle na, ọ be te họre Setan o ve gele iei no odhiwu ziọ otọakpọ.

Nọ Jesu ọ ta nnọ ọ ruẹ Setan nọ “o kie” no, o wọhọ nọ ọ be rehọ ẹme na dhesẹ imuẹro orọ ekie Setan. Onana u tho eruẹaruẹ Ebaibol efa nọ e ta kpahe eware nọ e te jọ obaro via wọhọ ẹsenọ e via vrẹ no. Wọhọ oriruo, muẹrohọ eme nọ a ta kpemu je kparo evaọ eruẹaruẹ kpahe Mesaya na eva Aizaya 52:13–53:12. O wọhọ nnọ Jesu ọ be rehọ evaifihọ ta inọ egele Setan no obọ odhiwu o te via rọwokugbe ẹjiroro Ọsẹ Riẹ. U mu Jesu ẹro re inọ evaọ ẹruoke Ọghẹnẹ, a te kare Setan avọ idhivẹri riẹ fihọ ọgọdọ-odidi na, a vẹ te raha ae no bẹdẹ bẹdẹ.—Ahwo Rom 16:20; Ahwo Hibru 2:14; Eviavia 20:1-3, 7-10.

[Oruvẹ-obotọ]