Epanọ A re Ro Thihakọ Elọhoma

KỌ UDU u bi whrehe owhẹ? Evaọ oge ozighi gbe uduama nana, udu u bi whrehe ahwo buobu. Udu u bi whrehe otujọ fikinọ a wo iruo ho. Amọfa a bi thihakọ uye nọ asidẹnte ọ wha ze. Efa jọ a bi lele ebẹbẹ uviuwou, ẹyao ọgaga, gbe ọkora muabọ.

Otẹrọnọ udu u bi whrehe owhẹ, bovẹ whọ rẹ sai kpohọ kẹ obufihọ? Ima ahwo buobu evaọ akpọ na soso a ruẹ omosasọ no ẹkwoma ese Ẹme Ọghẹnẹ, Ebaibol na. Eme ọ Pọl ukọ na e kẹ rai imuẹro, nọ ọ ta nọ: “Arọ ujiro kẹ Ọghẹnẹ jegbe Ọsẹ Ọnowo mai Jesu Kristi, Ọsẹ ohrọ kpobi jegbe Ọghẹnẹ omosasọ kpobi; ọnọ o ru omai wo omosasọ eva uye mai.” (2 Ahwo Kọrint 1:3, 4) Eme jabọ who gbe se awọ Ebaibol nana gbe eria efa evaọ Ebaibol ra ha? Ere oruo o te ‘sasa udu ra je ru owhẹ ga.’—2 Ahwo Tẹsalonika 2:17.

Ma sae jẹ jọ usu kugbe enọ e be gọ Jihova ruẹ obufihọ nọ ma re ro thihakọ elọhoma. Itẹ 12:25 o ta nọ: “Awaọruọ ọ rẹ rọ ohwo gbotọ, rekọ ẹme ezi ọ rẹ kẹ ẹe eva ewerọ.” Ma te kpohọ iwuhrẹ Ileleikristi, ma re yo “ẹme ezi” otiọye na, eme nọ e rẹ “were ẹzi gbe uzuazọ gbe oma na.” (Itẹ 16:24) Eme jabọ who gbe kpohọ ewuhrẹ evaọ Ọgwa Uvie Isẹri Jihova ha re whọ ruẹ ọbọga nọ who re wo no omakugbe utioye na ze?

Whọ rẹ sai je wo erere no ogaga nọ o re no olẹ ze. Otẹrọnọ awaọruọ uzuazọ i te owhẹ uvo no, horie eva ra kẹ “ọnọ o re yo elẹ” na. (Olezi 65:2) Ọnọma omai, Jihova Ọghẹnẹ, ọ riẹ omai vi epanọ ma riẹ omobọ mai. Ma rẹ sai fi eva họ obufihọ riẹ. Ọ jọ Ẹme riẹ yeyaa k’omai nọ: “Gbolo owha ra kẹ ỌNOWO na, o re ti fiobọhọ kẹ owhẹ; ọ rẹ rọwa re okiẹrẹe na o kie he.” (Olezi 55:22) Ẹhẹ, “a te tua eri enọ e be hẹrẹ ỌNOWO na.”—Aizaya 40:31.

Jihova Ọghẹnẹ ọ k’omai eruẹrẹfihotọ buobu nọ e rẹ sai fi obọ họ k’omai thihakọ elọhoma ziezi. Kọ whọ te rehọ ai ru iruo?