Enọ Ahwo nọ A s’Ebe

Fikieme Isẹri Jihova a jẹ rehọ unu ọ 144,000 nọ a fodẹ evaọ obe Eviavia na wọhọ uzedhe unu ahwo jọ dẹẹ, orọnikọ inọmba ẹwoho ho?

Jọn ukọ na o kere nọ: “Me te zi yo unu enọ a koka họ na, a tẹ koka họ idu ẹgba gbe ikpe ene gbe ene.” (Eviavia 7:4) Evaọ Ebaibol na, ẹme na “enọ a koka họ” u dhesẹ ẹko ahwo nọ a salọ no udevie ahwo-akpọ ze re a jọ obọ odhiwu lele Kristi su otọakpọ Aparadase nọ ọ be tha na. (2 Ahwo Kọrint 1:21, 22; Eviavia 5:9, 10; 20:6) Ma wo otoriẹ inọ unu rai na, 144,000, ghinọ unu ahwo na dẹẹ fiki ẹjiroro buobu. Ma ruẹ ẹjiroro ọsosuọ evaọ eme nọ e nwane wariẹ Eviavia 7:4 họ na.

Nọ a ta kẹ Jọn ukọ na kpahe ẹko nana ọrọ ahwo 144,000 na no, a te dhesẹ ẹko ahwo ọfa kẹe. Jọn o dhesẹ ẹko avivẹ nana wọhọ ‘otu obuobu jọ, nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu.’ Otu obuobu nana o dhesẹ enọ e te zọ vrẹ ‘uye ulogbo’ na, onọ o te raha akpọ omuomu nana.—Eviavia 7:9, 14.

Dede na, muẹrohọ ohẹriẹ nọ Jọn o fihọ owọ avọ 4 gbe ọrọ avọ 9 ọrọ Eviavia uzou avọ 7 na. Ọ ta inọ ẹko ọsosuọ na, “enọ a koka họ na,” a wo unu dẹẹ. Dede na, ẹko avivẹ na, “otu obuobu” na, a wo unu hu. Ma te roro kpahe oyena, o rrọ oware iroro re ma rehọ unu ọ 144,000 na wọhọ unu ahwo na dẹẹ. Otẹrọnọ unu ọ 144,000 na yọ inọmba ẹwoho gbe nnọ u dhesẹ ahwo nọ i wo unu hu, ohẹriẹ ovuovo o hae jọ awọ ivẹ Ebaibol na ha. Fikiere, eme nọ e wariẹ owọ Ebaibol na họ i dhesẹ inọ unu ọ 144,000 na yọ ugogo unu ahwo na dẹẹ.

Egba-eriariẹ Ebaibol buobu, erọ oke nọ u kpemu gbe erọ enẹna, a rọwo ẹme na enẹ—inọ, onana yọ unu ahwo na dẹẹ. Wọhọ oriruo, nọ ọ jẹ t’ẹme kpahe Eviavia 7:4, 9, ọfeme nọ ọ rrọ ohwo Britain na, Dr. Ethelbert W. Bullinger ọ ta enẹ oware wọhọ ikpe 100 nọ i kpemu, inọ: “O rrọ ẹme nọ a rẹ vro ho: inọmba nọ o wo unu, onọ u wo ohẹriẹ no inọmba nọ o wo unu hu evaọ uzou Ebaibol nana.” (The Apocalypse or “The Day of the Lord,” ẹwẹ-obe avọ 282) Kẹle na, Robert L. Thomas, ọrọ ọmaha, profẹsọ ọrọ New Testament evaọ The Master’s Seminary evaọ obọ United States, o kere nọ: “U wo imuẹro egaga evuevo ho nọ a rẹ rọ ta nnọ unu na 144,000 yọ inọmba ẹwoho.” O fibae nnọ: “Unu nọ a fodẹ [eva 7:4] na yọ unu ahwo dẹẹ wo ohẹriẹ no inọmba nọ o wo unu hu na ọrọ 7:9. A tẹ rehọ inọmba nana wọhọ oware ẹwoho, a sae gbẹ jọ obe Eviavia na rehọ inọmba ọvuọvo gheghe he, wọhọ ugogo unu jọ dẹẹ.”—Revelation: An Exegetical Commentary, Uko 1, ẹwẹ-obe avọ 474.

Ahwo jọ a re si ikẹ inọ, fikinọ obe Eviavia o vọ avọ eme ẹwoho, inọmba kpobi nọ a jọ obe nana ruẹ, kugbe inọmba 144,000 na, o rẹ jọ unu ẹwoho. (Eviavia 1:1, 4; 2:10) Rekọ ohwo o te roro ere, yọ o roro thọ. Ghinọ uzẹme, obe Eviavia u wo inọmba ẹwoho buobu, rekọ u wo inọmba jọ nọ e rrọ ugogo unu dẹẹ re. Wọhọ oriruo, Jọn ọ ta kpahe “edẹ ikọ kpogbivẹ Omogodẹ na.” (Eviavia 21:14) O rrọ vevẹ, inọmba 12 nọ a jọ owọ nana fodẹ na yọ ugogo unu na dẹẹ, orọnikọ inọmba ẹwoho ho. Ofariẹ, Jọn ukọ na o kere kpahe “odu ikpe” ọrọ esuo Kristi. A tẹ rehọ oma totọ kiẹ Ebaibol na ziezi, a rẹ ruẹ nnọ unuikpe nọ a jọ etenẹ fodẹ na ere e rrọ dẹẹ.a (Eviavia 20:3, 5-7) Fikiere, sọ a rẹ rehọ inọmba jọ evaọ obe Eviavia gheghe hayo rehọ iẹe wọhọ inọmba ẹwoho, o rehọ oma hwa eme efa nọ e jẹhọ iẹe.

Re a ta nnọ inọmba na 144,000 yọ uzedhe unu ahwo na dẹẹ gbe nnọ u dhesẹ umutho ahwo jọ ọvo, ẹko ọsese nọ a tẹ rehọ iẹe wawo “otu obuobu” na, o rọwo kugbe eria efa Ebaibol na re. Wọhọ oriruo, uwhremu na evaọ eruẹaruẹ nọ Jọn ukọ na ọ ruẹ, a dhesẹ 144,000 na wọhọ enọ ‘a ta no udevie ahwo ze wọhọ ibi ọsosuọ.’ (Eviavia 14:1, 4) Ẹme na “ibi ọsosuọ” o dhesẹ umutho ahwo jọ nọ a salọ. Ofariẹ, okenọ Jesu ọ jọ otọakpọ, ọ ta kpahe enọ i ti lele iei su evaọ Uvie obọ odhiwu riẹ je se ai ‘uthuru okakao.’ (Luk 12:32; 22:29) Evaọ uzẹme, enọ i no udevie ahwo ze nọ i ti su evaọ obọ odhiwu a re kakao a tẹ rehọ ae wawo ahwo-akpọ nọ e te rria otọakpọ Aparadase nọ o be tha na.

Fikiere, eme nọ e wariẹ Eviavia 7:4 họ gbe eme nọ i tho rie evaọ eria efa Ebaibol na i dhesẹ inọ inọmba 144,000 na yọ uzedhe unu ahwo na dẹẹ. U dhesẹ enọ e te jọ obọ odhiwu lele Kristi su otọakpọ aparadase na, otọakpọ nọ ahwo evawere gbidi gbidi nọ a riẹ unu rai hi nọ e be gọ Jihova Ọghẹnẹ a te jọ.—Olezi 37:29.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 31]

Ereuku obọ odhiwu na i wo unu, 144,000

[Uwoho nọ o rrọ ẹwẹ-obe avọ 31]

“Otu obuobu” na a wo unu hu

[Ọnọ o wo uwoho nọ o rrọ ẹwẹ-obe avọ 31]

Isi: Udu ọ Anglo-Australian Observatory, uwoho nọ David Malin ọ rehọ