Obe Eviavia—Eme Eware nọ E Rrọ Eva Riẹ I Dikihẹ Kẹ?
Uyo nọ Ebaibol na ọ kẹ
Evaọ ẹvẹrẹ Griki, a re se obe Eviavia A·po·kaʹly·psis (apocalypse), onọ u dhesẹ “Rovie” hayo “Edhesẹvia.” Odẹ nana u dhesẹ otofa Eviavia, keme u rovie eware ididi nọ a si no via, je dhesẹ eware nọ e te via evaọ obaro. Eruẹaruẹ buobu nọ e rrọ eva riẹ i ri rugba ha.
Eware nọ e rrọ obe Eviavia
Ẹme-emuhọ.—Eviavia 1:1-9.
Evuẹ nọ Jesu o vi se ikoko ihrẹ na.—Eviavia 1:10–3:22.
Eruẹaruẹ nọ Jọn ọ jọ ruẹ Ọghẹnẹ nọ ọ keria agbara-uvie riẹ evaọ obọ odhiwu.—Eviavia 4:1-11.
A jọ eruẹaruẹ nana dhesẹ eware sa-sa nọ e via unọjọ utọjọ:
Eka ihrẹ.—Eviavia 5:1–8:6.
Egba ihrẹ, esa urere nọ a kporo e wha iye esa ze.—Eviavia 8:7–14:20.
Imidhe ihrẹ, ọvuọvo o dikihẹ kẹ ofu Ọghẹnẹ nọ o ti ro guẹdhọ akpọ na.—Eviavia 15:1–16:21.
Eruẹaruẹ kpahe ọraha nọ o ti te ewegrẹ Ọghẹnẹ.—Eviavia 17:1–20:10.
Eruẹaruẹ kpahe eghale Ọghẹnẹ nọ i ti te odhiwu gbe akpọ na.—Eviavia 20:11–22:5.
Ekuhọ.—Eviavia 22:6-21.
Eware nọ e rẹ sai fiobọhọ kẹ owhẹ wo otoriẹ obe Eviavia
U fo nọ eware nọ e rrọ obe Eviavia e rẹ wha evawere se enọ e be gọ Ọghẹnẹ, orọnọ e rẹ lẹliẹ ozọ mu ai hi. Dede nọ ahwo buobu a re rri obe “Eviavia” fihọ obe nọ o ta kpahe eware okpẹtu ọvo, o rrọ ere he keme eme nọ a ro mu obe na họ je ku ei họ i dhesẹ nọ ahwo kpobi nọ a se eme eruẹaruẹ na, a te wo otoriẹ rai, je fi ae họ iruo, a ti wo evawere.—Eviavia 1:3; 22:7.
A jọ obe Eviavia rehọ “eka” dhesẹ eware sa-sa, fikiere a rẹ nwane rehọ ai epanọ a dhesẹ i rai hi.—Eviavia 1:1.
Eka gbe eware efa nọ a ro dhesẹ eware sa-sa evaọ obe Eviavia na yọ eware nọ a jọ Ebaibol fodẹ no vẹre:
Jihova—“Ọghẹnẹ nọ ọ rọ obọ ehru” gbe Ọnọ ọ ma eware kpobi.—Iziewariẹ 4:39; Olezi 103:19; Eviavia 4:11; 15:3.
Jesu Kristi—“Omogodẹ Ọghẹnẹ.”—Jọn 1:29; Eviavia 5:6; 14:1.
Setan Ẹdhọ na—Ọwegrẹ Ọghẹnẹ.—Emuhọ 3:14, 15; Jọn 8:44; Eviavia 12:9.
Babilọn Ologbo na—wọhọ Babilọn oke anwae na (Bebẹl), Babilọn Ologbo na yọ ọwegrẹ Ọghẹnẹ gbe idibo riẹ, ọ tẹ jẹ rrọ oria nọ iwuhrẹ erue i muhọ no ze.—Emuhọ 11:2-9; Aizaya 13:1, 11; Eviavia 17:4-6; 18:4, 20.
“Abade na”—ahwo omuomu nọ a be wọso Ọghẹnẹ.—Aizaya 57:20; Eviavia 13:1; 21:1.
Eware jọ nọ a fodẹ evaọ obe Eviavia na e jọ uwou-udhu nọ emọ-Izrẹl a jẹ jọ gọ Ọghẹnẹ na—eware wọhọ etehe-ọvọ na, abade nọ a rẹ ruẹ lafi wọhọ ughẹgbe (odhe ọwozabọ), ikpẹ, insẹnse nọ a rẹ mahe, gbe agbada-idhe.—Ọnyano 25:10, 17, 18; 40:24-32; Eviavia 4:5, 6; 5:8; 8:3; 11:19.
Erao ijihẹ—i dikihẹ kẹ egọmeti ahwo-akpọ na.—Daniẹl 7:1-8, 17-26; Eviavia 13:2, 11; 17:3.
A rehọ inọmba dhesẹ eware sa-sa.—Eviavia 1:20; 8:13; 13:18; 21:16.
Eruẹaruẹ na i kiekpahe “ẹdẹ Olori na,” onọ u muhọ nọ a rehọ Uvie Ọghẹnẹ mu no evaọ 1914, Jesu nọ ọ rrọ Ovie Uvie na o te muhọ esuo. (Eviavia 1:10) Fikiere ma rẹ sai rẹro nọ evaọ oke mai nana eruẹaruẹ na i ti ro rugba.
Re ma sai wo otoriẹ obe Eviavia na, ma gwọlọ obufihọ areghẹ nọ o no obọ Ọghẹnẹ ze, gbe obufihọ amọfa nọ a wo otoriẹ riẹ no vẹre.—Iruẹru Ikọ 8:26-39; Jemis 1:5.