Iwhowho-uvie E n’Iyẹrẹ

Ileta nọ Alejandra O Kere

U KRI no nọ ileta-ikere e rọ rrọ emamọ edhere nọ a re ro se isẹri. Dede nọ ẹsejọ ma sae riẹ iyẹrẹ nọ i ti noi ze he, ahwo nọ a dadamu eroruiruo ona nana a wo eghale ilogbo no. A be kareghẹhọ ohrẹ Ebaibol nana: “Evaọ ohiohiẹ kọ ibi ra, gbe evaọ owọwọ who si obọ ra no ho; keme whọ riẹ onọ u re ti woma ha, onana hayo oyena, hayo ai ivẹ i re ti woma.”—Ọtausiwoma Na 11:6.

Alejandra, Osẹri ọmaha jọ nọ o ru iruo te oware wọhọ ikpe ikpe no evaọ uwou ogha Isẹri Jihova nọ o rrọ Mexico ọ jẹ rehọ imu fikiọ ẹyao-ọta nọ o kie rie. Ẹyao riẹ o si ga, oma riẹ o gbẹ ga te epanọ ọ jẹ sai ro ru iruẹru ikẹdẹ kẹdẹ riẹ hẹ. Dede na, fikinọ ọ gwọlọ siọ usiuwoma ota riẹ ba ha, Alejandra ọ tẹ jiroro nọ o re dhugbe kere ileta. O kere kpahe ọruẹrẹfihotọ uwuhrẹ Ebaibol ọvọvẹ, je fi inọmba etẹlifonu oni riẹ họ ileta na. Kẹsena ọ tẹ rehọ ileta na kẹ oni riẹ jẹ vuẹe nọ ọ hae nya se ai ba iwou nọ o di ahwo họ họ nọ ọ tẹ rọ odibọgba nuwou ruọ uwou na.

Oke ovona, ọmọtẹ ọmaha jọ nọ a re se Diojany nọ o no obọ Guatemala ze ọ ziọ Cancún, Mexico je ru iruo wọhọ ọmọtẹ nọ a rehọ re ọ rẹrote iruo uwou. Nọ ọ jọ obei, ọ nya ku Isẹri Jihova jẹ reawere ẹme nọ a je lele iei ta kpahe Ebaibol na. Uwhremu na, ọzae avọ aye nọ a rehọ e riẹ iruo na a tẹ be kwa kpohọ ofẹ nọ a re se Mexico City jẹ gwọlọ nọ ọ kwa lele ai. Diojany ọ kake rọwo nọ o re lele ai hi keme onana o te so iẹe ze nọ ọ te rọ nya siọ Isẹri na ba.

Ahwo nọ a rehọ e riẹ iruo na a tẹ be ta udu họ iẹe awọ nọ “Who bru udu hu,” je fibae nọ “Isẹri Jihova e rrọ oria kpobi. Ma te gwọlọ ai nọ ma tẹ nwani te obei.” Avọ emamọ irẹro yena, Diojany tẹ rọwo nọ o re lele ai. Nọ a te Mexico City no, ahwo nọ a rehọ Diojany iruo na a te mu Isẹri na họ ẹgwọlọ. Fiki oware jọ, a sai duku ai hi dede nọ Isẹri nọ i bu vi 41,000 gbe ikoko 730 e jọ okpẹwho na.

Nọ omoke jọ o vrẹ no, Diojany o te mu elọhoma họ ewo fikinọ ọ re sae ruẹ Isẹri na ha re ọ wariẹ mu ẹmeọta-kugbe rai kpahe Ebaibol na họ. Eva ẹdẹjọ, aye na o te bru ei ze, anọ: “Me wo emamọ usi jọ kowhẹ! Ọghẹnẹ ra o yo elẹ ra no.” Ọ tẹ rehọ ileta jọ kẹe, ta nọ: “Isẹri na a rehọ ileta nana se owhẹ.” Alejandra o kere ileta na.

Diojany ọ tẹ gwọlọ oni gbe oniọvo-ọmọtẹ Alejandra nọ a re se Blanca ruẹ, Diojany tẹ jẹ rọwo nọ a ru uwuhrẹ Ebaibol kugbei. Nọ eka jọ e vrẹ no, ọ tẹ te ruẹ Alejandra jẹ wereva gaga nọ a rọ ruẹ oma. Alejandra ọ ta udu họ iẹe awọ inọ jọ ọ ruabọhọ uwuhrẹ Ebaibol riẹ re ọ ruẹsi wo ẹnyaharo abọ-ẹzi.

Emera jọ kakao nọ i lele i rie, evaọ July 2003 Alejandra o te whu, o fi emamọ oriruo ẹrọwọ gbe uduowha hotọ kẹ ibe eg’Ọghẹnẹ riẹ. Eva ukio riẹ, u duobọ te ahwo buobu udu nọ a nyaku Diojany nọ ọ be ta inọ: “Alejandra avọ ahwo uviuwou riẹ a fi obọdẹ oriruo hotọ kẹ omẹ. Mẹ gba riẹ mu no inọ mẹ rẹ gọ Jihova re mẹ jẹ họ ame kẹle. O rrọ isiuru mẹ gaga re mẹ wariẹ ruẹ Alejandra evaọ Aparadase nọ ma bi rẹro riẹ na.”

Uzẹme, ileta e sae jọ oware osese. Rekọ uvi irere nọ e rẹ tọ nọ onana o rẹ sae wha ze u wo umuo ho!