Emamọ Uruemu O Rẹ “Rehọ Eru kẹ Uwuhrẹ Ọghẹnẹ”

MARIA, ọmọtẹ ọmaha jọ evaọ Kransnoyarsk, Russia, ọ riẹ ile ẹso ziezi te epanọ iticha riẹ o ro fi iei họ utu ile esuọ isukulu na. Omoke jọ o vrẹ no, Maria tẹ nya bru iticha riẹ jọ jẹ ta kẹe avọ adhẹẹ inọ ọ te sae so oghẹrẹ ile jọ họ. Fikieme? Fikinọ ẹsuọ ile nọ i wo obọ kpahe egagọ o rọwo kugbe eware nọ o wuhrẹ no Ebaibol ze he. Onana u gbe iticha na unu gaga inọ, ‘Eme ọ jariẹ thọ nọ a tẹ rọ ole jiri Ọghẹnẹ?’

Re ọ ruẹsi dhesẹ oware nọ o soriẹ nọ ọ te rọ so ole kpahe Ọghẹnẹ Esanerọvo ho, Maria o te rovie Ebaibol riẹ je dhesẹ nọ Ọghẹnẹ avọ Jesu Kristi a rrọ Ọghẹnẹ ọvo ho, gbe inọ ẹzi ọfuafo na yọ ogaga iruo Ọghẹnẹ. (Matiu 26:39; Jọn 14:28; Iruẹru 4:31) Maria ta nọ: “Oware onana nọ o via na u kpomahọ usu mẹ kugbe iticha na ha. Iticha nọ e rrọ isukulu mai na kpobi a re wowoma ziezi. A rẹ gwọlọ nọ ma dhozọ rai kpo kwẹkwẹkwẹ hẹ.”

Evaọ ukpe isukulu yena kpobi, edikihẹ Maria o ru nọ iticha na gbe ibe emọ-eklase riẹ a rọ kẹe adhẹẹ. Maria ta nọ: “Ehri-izi Ebaibol na i bi fi obọ họ kẹ omẹ evaọ uzuazọ mẹ. Evaọ ekuhọ ukpe isukulu na, a ku enu kẹ omẹ avọ osohwa rọkẹ oruọzewọ mẹ gbe epanọ mẹ kpatiẹ te, isukulu na a te je kere ileta uyere se ọsẹgboni mẹ inọ a riẹ ọmọ rai yọrọ ziezi.”

Maria ọ họ ame eva August 18, 2001. Ọ ta nọ: “Eva e be were omẹ inọ mẹ be gọ Ọghẹnẹ owoma otiọye, Jihova!” Emaha Isẹri Jihova wariẹ akpọ na soso họ a bi koko eme nọ e rrọ Taitọs 2:10, oria nọ ma jọ se nọ: “Jọ eva oware kpobi rehọ eru kẹ uwuhrẹ Ọghẹnẹ Osiwi mai.”

[Uwoho nọ o rrọ ẹwẹ-obe avọ 32]

Ileta uyere gbe obe enu-okukẹ

[Uwoho nọ o rrọ ẹwẹ-obe avọ 32]

Maria avọ ọsẹgboni riẹ okenọ ọ họ ame no