Enọ Ahwo nọ A s’Ebe

Oke nọ Jesu ọ ta kẹ ilele riẹ inọ a re ‘momo kẹ amọfa ababọ irẹro oware ovuọvo nọ a ti zihe kẹ ae,’ kọ ọ be ta nnọ a rẹ tubẹ yare uzedhe ugho nọ a momo kẹ ohwo na ha?

Re a wo otoriẹ eme Jesu nọ a kere fihọ Luk 6:35 na, u re woma re ma roro kpahe Uzi Mosis na. Ọghẹnẹ ọ ta kẹ emọ Izrẹl inọ a re momo ugho kẹ ibe emọ Izrẹl nọ ọbẹwẹ ọ rrọ oma nọ e gwọlọ obufihọ ababọ isuo. (Ọnyano 22:25; Iruo-Izerẹ 25:35-37; Matiu 5:42) Igho-imomo nọ a jọ etenẹ t’ẹme te na orọnikọ enọ a momo rọ thueki hi. Ukpoye, a re momo igho itieye nọ a rẹ rọ isuo kpahe he na kẹ ohwo fiki uvuhu hayo okpẹtu nọ o te ohwo oma. Who te ghine rri rie, o rẹ jọ thọthọ re ohwo ọ rehọ igho nọ o momo kẹ ọrivẹ riẹ nọ eware i kie thọ ro wo erere. Dede na, a rẹ hwa uzou ugho na zihe kẹ ọnọ o momo ugho kẹ ọrivẹ riẹ na, ẹsejọ dede, a rẹ sae kẹe oware jọ ro viowa rọkẹ ugho nọ o bi momo kẹ omọfa na.—Iziewariẹ 15:7, 8.

Be rọwo kugbe Uzi na, Jesu o fi ẹgba họ iẹe viere nọ ọ ta nnọ ohwo nọ o bi fi obọ họ kẹ ọrivẹ riẹ na o re rẹro oware “ọvuọvo nọ a ti zihe” kẹe he. Wọhọ emọ Izrẹl, ẹsejọ ekọ i re kie kpe Ileleikristi hayo a sae ruẹ uye okpẹtu ọfa nọ o rẹ wha uvuhu se ai. Otẹrọnọ oniọvo Oleleikristi nọ ọ rrọ uyero ọbẹwẹ utioye na ọ gwọlọ obufihọ, kọ o gbẹ jọ oware ẹwo re ma fi obọ họ? Evaọ uzẹme, uvi uyoyou o rẹ wọ ibe Oleleikristi gwọlọ fi obọ họ kẹ oniọvo nọ eware i kie thọ nọ orọnikọ ọye ọvo ọ soriẹ hẹ. (Itẹ 3:27) O rẹ sae lọhọ re a ru oniọvo nọ ọ rrọ ọbẹwẹ na ọghọ, dede nọ ugho na o sae kawo vi onọ a hai momo kẹe.—Olezi 37:21.

Evaọ ikpe-udhusoi ọsosuọ C.E., Ileleikristi nọ e jọ obọ Esia Minor a rehọ eware kẹ Pọl ukọ na avọ Banabas re a wha se inievo rai evaọ obọ Judia, enọ e jẹ ruẹ uye fiki ohọwo. (Iruẹru 11:28-30) Epọvo na re nẹnẹ, okenọ okpẹtu ọ tẹ roma via, Ileleikristi a re vi ekẹ se inievo rai nọ e rrọ ọbẹwẹ. Evaọ ere oruo, yọ a bi se emamọ isẹri kẹ amọfa re. (Matiu 5:16) Dede na, a re roro kpahe uruemu gbe uyero ọnọ ọ be gwọlọ obufihọ na. Fikieme ọbẹwẹ ọ jẹ riẹe oma? Eme ọ Pọl na i fo oware nọ a re muẹrohọ: “Otẹrọnọ ohwo jọ o re ru iruo ho, ọ gbẹ re emu gbehe.”—2 Ahwo Tẹsalonika 3:10.

Otẹrọno oniọvo nọ ọ be gwọlọ ugho momo ọ rrọ ọbẹwẹ hẹ rekọ ọ gwọlọ obufihọ ọvo re ọ wariẹ dikihẹ ziezi fiki ekọ nọ i kie kpei, o rẹ sai fo re a momo ugho kẹe ababọ isuo. Evaọ otọ uyero utioye na, re a momo ugho kẹe avọ irẹro inọ ọ rẹ hwa ugho na kpobi zihe o wọso eme ọ Jesu nọ e rrọ Luk 6:35 na ha. A re kere agrimeti, yọ ọnọ o momo ugho na ọ rẹ daoma riẹ kpobi re ọ hwa ugho na zihe wọhọ epanọ agrimeti na ọ ta. Evaọ uzẹme, uyoyou Oleleikristi o rẹ wọ ọnọ o momo ugho na hwa ugho na zihe wọhọ epanọ uyoyou o wọ ọnọ o momo ugho kẹe na.

Ohwo nọ ọ gwọlọ bi momo ugho kẹ omọfa (hayo kẹ okẹ) o re je roro kpahe uyero uviuwou riẹ. Wọhọ oriruo, kọ ugho nọ o bi momo kẹ omọfa na u ti ru ei bẹbẹ kẹe re ọ rẹro te ahwo uviuwou riẹ, owha-iruo ọsosuọ riẹ evaọ Ikereakere na? (2 Ahwo Kọrint 8:12; 1 Timoti 5:8) Ghele na, Ileleikristi a rẹ gwọlọ uvẹ nọ a re ro dhesẹ uyoyou kẹ ohwohwo, dhesẹ uyoyou yena via ẹkwoma eware jọ nọ e rọwo kugbe ehri-izi Ebaibol na nọ who re ru ro fi obọ họ kẹ ohwo na dẹẹ.—Jemis 1:27; 1 Jọn 3:18; 4:7-11.