Kọ Ma te Ghinẹ Reawere Uvi Ufuoma Ẹdẹjọ?

EMỌ nọ e be rọ evawere zaharo kugbe esẹgbini iyoyou rai—ono ughe utioye na u re siuru hu? Emọ itieye na a wo ufuoma evaọ abotọ esẹgbini ẹruọsa rai. Ghele na, rọkẹ emaha buobu, etoke evawere itieye na o kẹle otọ họ. Ukpoye, emọ jọ e be ruawa kẹdẹ kẹdẹ kpahe oria nọ a re kiẹzẹ nọ oke u te kpo no. Kọ ẹruore jọ ọ rrọ kẹ emọ itieye na gbe amọfa nọ a wo ufuoma evaọ uzuazọ họ na?

Dede nọ obaro akpọ na o sae kare irẹro ewoma, Ẹme Ọghẹnẹ ọ kẹ omai ẹruore. Aizaya ọruẹaro na ọ ta nọ oke o te tha nọ ahwo kpobi a te rria evaọ omofọwẹ. O kere nọ: “A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ. A gbẹ te bọ iwou no re omọfa ọ ria e he, a gbẹ te kọ no re omọfa ọ re he.”—Aizaya 65:21, 22.

Kọ ẹruore nana o wo uvi otọhotọ? Whaọ, o nwane rọnọ ẹsikpobi ẹme na “ẹruore” u re dhesẹ oware nọ u muẹro ho. Wọhọ oriruo, ahwo Brazil a wo ẹme jọ nọ a rẹ ta inọ: “A esperança é a última que morre.” Otofa riẹ họ “Ẹruore họ oware urere nọ u re whu.” Onana u dhesẹ inọ, ahwo buobu a re gbe wo ẹruore ghele o tẹ make rọnọ otọhotọ ẹruore o riẹ hẹ. Dede na, ẹruore nọ Ọghẹnẹ uzuazọ na ọ kẹ omai o wo ohẹriẹ. Pọl ukọ na o kere nọ: “Ohwo ọvo nọ ọ rọwo [Ọghẹnẹ] nọ a re ti ru oma vua ọ rọ họ.” (Ahwo Rom 10:11) Eruẹaruẹ Ebaibol nọ i rugba no e kẹ omai evaifihọ inọ eyaa efa nọ Jihova Ọghẹnẹ ọ yaa i ti rugba re. Nọ eyaa yena i te rugba no, iyero nọ e be gba emọ họ rria iyẹrẹ na u ti zihe ruọ oware anwae.

Makọ inẹnẹ, obọdẹ ehrẹ nọ e rrọ Ebaibol na e rẹ sae fi obọ họ kẹ ahwo nọ a kare ẹruore ru uzuazọ rai woma ziezi je duku uvi ufuoma. Ẹvẹ oyena o sae rọ lọhọ? O te were Isẹri Jihova nọ e rrọ okegbe ra re a fi obọ họ kẹ owhẹ duku uyo onọ nana.