Oware Nọ A Rẹ Kareghẹhọ

EME ma be ta kpahe na? Oye họ uwhu ọzae jọ nọ o whu kẹle ikpe 2,000 nọ e vrẹ. Ọzae na ọ ta nọ: “Me siobọno uzuazọ mẹ fihọ otọ, re mẹ jẹ te rehọ iẹ. Ohwo ọvo o mi omẹ vrẹ hẹ, rekọ mẹ ọvo o siobọnoi.” (Jọn 10:17, 18) Ọzae yena họ Jesu Kristi.

Jesu ọ ta kẹ ilele riẹ inọ a ru Ekareghẹhọ uwhu idheidhe riẹ na. A re je se ekareghẹhọ na ‘emu-owọwọ Olori na.’ (1 Ahwo Kọrint 11:20) Isẹri Jihova avọ egbẹnyusu rai a bi ti ru emu-owọwọ nọ Jesu ọ tohọ re a rọ kareghẹhọ uwhu riẹ na evaọ Edene-Oka, March 24, 2005, nọ ọre o te kie diwi no.

Ẹme nọ a te ta no Ebaibol ze o ti dhesẹ otofa ebrẹdi nọ e kare ẹvi na gbe udi owawae nọ a ti ro ru ekareghẹhọ na. (Matiu 26:26-28) Ovuẹ na o te jẹ kẹ iyo enọ wọhọ: Ẹvẹ Ileleikristi i re ru ekareghẹhọ nana kpere te? Ono o fo nọ ọ rẹ re ebrẹdi jẹ da udi na? Amono a re wo erere no uwhu Jesu ze? Ekareghẹhọ obọdẹ nana i ti fi obọ họ kẹ ahwo kpobi wo ovuhumuo ẹjiroro nọ Jesu ọ rọ ziọ otọakpọ je whu.

A te rọ abava dede owhẹ rehọ eva Ekareghẹhọ uwhu Jesu na. Iviena nọ mi Isẹri Jihova eva oria ra kpahe uzedhe oria nọ a ti kokohọ gbe oke na.