Uduowha Eva Otọ Ọwọsuọ

OTU ugbarugba jọ a si Gayọs avọ Aristakọs, egbẹnyusu ivẹ Pọl ukọ na ruọ afe-ughe Ẹfẹsọs. Etẹ otu ọgeva nana a jọ kpare urru rai bo euwa ivẹ nọ: “Atẹmis ahwo Ẹfẹsọs ọ rẹ ruaro!” (Iruẹru 19:28, 29, 34) Kọ egbẹnyusu Pọl na a dikihẹ whawha eva otọ ọwọsuọ nana? Kọ eme ọ tubẹ wha uyero nana ze?

Pọl o wo obokparọ te oware wọhọ ikpe esa no evaọ Usiuwoma ota riẹ evaọ okpẹwho Ẹfẹsọs. Onana o wha riẹ ze nọ ahwo Ẹfẹsọs buobu a rọ se emedhọ ba ẹgọ. (Iruẹru 19:26; 20:31) Ẹmema nọ a rẹ mae jọ Ẹfẹsọs ruẹ họ ọzaa isiliva ọsese ọrọ Atẹmis, ẹdhọ-aye ọrọ emọ-iyẹ nọ etẹmpol ologbo riẹ ọ rẹriẹ ovao ku okpẹwho na. A jẹ hae fi emema esese etẹmpol nana fihọ iwou rai hayo whẹ ae họ oma wọhọ igbelẹ. Dede na emema itienana e rrọ eware nọ Ileleikristi a rẹ dẹ hẹ.—1 Jọn 5:21.

O jọ iroro Demetriọus nọ ọ rrọ omọvo idhogu-isiliva na, inọ Pọl ọ be te raha eki nọ ọ be wha erere ologbo se ai. Ẹkwoma erue gbe okpa ubruhọ ẹme, o te ru ibe idhogu-isiliva riẹ rọwo nọ ahwo Esia Minor soso a be te se egagọ Atẹmis ba. Ere na, idhogu-isiliva nọ eva e be dha na a te mu ujiro Atẹmis họ ebo, ozighi ologbo ọ tẹ roma via jẹ vaha ruọ okpẹwho na soso.—Iruẹru 19:24-29.

Idu ahwo buobu a te kokohọ afe-ughe na, nọ o rẹ sae gba ahwo nọ a bu te 25,000. Pọl ọ tẹ gwọlọ nọ ọ rẹ ta ẹme kẹ otu ugbarugba na rekọ iletu nọ e riẹ riẹe a tẹ hrẹ riẹ inọ jọ ọ seba. Ukuhọ riẹ osu okpẹwho na ọ tẹ daoma ru nọ ogbotu na ọ rọ fọ, Gayọs avọ Aristakọs a tẹ vabọ ababọ omonwa.—Iruẹru 19:35-41.

Nẹnẹ idibo Ọghẹnẹ a rẹ sae nya ku ahwo ọwọsuọ nọ i re tube ru ozighi nọ a be wha odibọgba rai haro na. Ẹsibuobu a rẹ ta usiuwoma na evaọ ekwotọ nọ edhọgọ, ọfariẹ-ogbe, avọ otu nọ o re thuethu ọ da fia. O make rrọ ere na, a be rehọ aruọwha raro kele Pọl ukọ na, ọnọ ọ ‘se ahwo ba ewuhrẹ hẹ evaọ ẹgbede gbe no uwou ruọ uwou’ evaọ okpẹwho Ẹfẹsọs. (Iruẹru 20:20) Yọ a be wereva re nọ a be ruẹ nọ ‘ẹme Ọnowo na ọ be rro whawha avọ obọ okparọ.’—Iruẹru 19:20.

[Uwoho nọ o rrọ ẹwẹ-obe avọ 3]

Afe-ughe Ẹfẹsọs nọ ọ raha no