Kọ Who bi Lele Iroro Ra Muabọ?

EVAỌ ikpe buobu uzuazọ riẹ, Lena o lele iroro ọ me-fioka-ha muabọ. Ọ ta nọ: “Ikpe buobu nọ mẹ ruẹ uye ọgbaduo evaọ okenọ mẹ jọ ọmaha u si ọghọ no omẹ oma gaga.” O fibae nọ: “O jọ omẹ oma nọ me gbe fioka ohwo vievie he.” Simone o roro kpahe oke uzoge riẹ jẹ ta nọ: “Mẹ jẹ hae jọ eva mẹ roro nọ uzuazọ mẹ ufofe, gbe inọ me te ohwo nọ a re se gb’ohwo ho.” O wọhọ nọ ọkora nọ o bi no iroro ọ me-fioka-ha itieye na ze o da otọ fia nẹnẹ. Ẹko-iruo jọ nọ a wo ọruẹrẹfihotọ nọ a rẹ jọ rehọ ẹkwoma ifonu kẹ emaha na ohrẹ, o ta nọ enwenọ abọvo emaha nọ i bi he se ai a be yare obufihọ kẹ “ẹbẹbẹ iroro ọrọ omobọ rai nọ a bi rri kuẹku.”

Wọhọ epanọ egba usiwo-imu jọ a ta, iroro ọ me-fioka-ha e rẹ roma via nọ amọfa a tẹ be lẹliẹ ohwo roro inọ o te ohwo nọ a re se gb’ohwo ho. Ohwo ọ rẹ sai wo iroro itieye na nọ amọfa a tẹ be hai do ku ei ẹsikpobi, rehọ eme fae ovao, fọrọ iẹe, hayo rehọ iẹe ru uririawọ. Oware kpobi nọ o rẹ whae ze kẹhẹ, onana o rẹ wha elọhoma se ohwo je tube su kpohọ enwoma. Otokiẹ abọ usiwo-imu jọ nọ a ru kẹle u dhesẹ nọ ahwo nọ a wo iroro ọ me-fioka-ha a rẹ kaki fi eva họ omarai gbe amọfa ha, rọ ere raha uvi oyerikugbe gbe usu okpekpe. Ọkiẹriwo na o dhesẹ nọ “evaọ oghẹrẹ jọ, ae ọvo a vẹ rehọ obọ rai ‘so’ ugogo uyero nọ a be dhozọ riẹ na.”

Ẹsibuobu ahwo nọ a wo ẹbẹbẹ yena a rẹ ruẹ uye oware nọ Ebaibol i dhesẹ wọhọ “iroro ibuobu,” nọ i re mi ohwo evawere. (Olezi 94:19) A re roro nọ a woma te vievie he. Nọ oware jọ o tẹ nya thọ, a rẹ nwani ku ei họ nọ ae a soriẹ ze. Dede nọ amọfa a rẹ sai jiri ai kẹ eware nọ a ru, a rẹ jọ udu rai roro nọ a te kẹ ujiro na ha, inọ ujerekrẹ amọfa a te ginẹ ruẹ uvinẹ rai. Fikinọ a jọ udu rai roro nọ a te kẹ ahwo nọ a re wo evawere he, ibuobu rai a ve kie ruọ uruemu enwoma nọ a roro inọ a rẹ gbẹ sae kpọvi hi. Lena nọ ma fodẹ evaọ obehru na o te ti wo ẹbẹbẹ ologbo kpahe emuọriọ fikinọ o rri omariẹ nọ o gbe wo adhẹẹ-omobọ-ohwo ho, ọ tẹ jẹ ta nọ, “Me roro nọ mẹ rẹ sai nwene uyero na ha.”

Kọ enẹ ọvo o te jọ kẹ ahwo nọ a bi lele “iroro ibuobu” itieye na muabọ evaọ edẹ uzuazọ rai kpobi? Kọ oware jọ o riẹ nọ a rẹ sai ru ro furie iroro itieye na? Ebaibol na e kẹ ehri-izi gbe ohrẹ nọ u wiruo, onọ i fi obọ họ kẹ ahwo buobu fi abọ-omuo nana kparobọ no. Evẹ họ ehri-izi nana jọ, kọ ẹvẹ i ro fi obọ họ kẹ ahwo nọ a wo ẹbẹbẹ nana duku oghọghọ no evaọ uzuazọ? Ma te ruẹ uyo na evaọ uzoẹme nọ o rrọ aro na.