Erere O No Erẹ Ugbothabọ Jọ Ze

IYẸRẸ nana i no Democratic Republic of Congo ze kpahe inievo-emetẹ ivẹ nọ ọsẹgboni ọvo a yẹ, enọ e jiroro nnọ a re kpohọ erẹ ugbothabọ evaọ udevie ẹkwotọ nọ a be jọ fi ẹmo re a kpohọ Okokohọ Ubrotọ “Rehọ Oruaro kẹ Ọghẹnẹ” evaọ Lisala. U te no uthubro abọ-ẹzi gbe omakugbe Ileleikristi nọ a te jọ okokohọ na reawere riẹ no, a rẹro nọ a te ruẹ ahwo nọ a no uwou-ogha Isẹri Jihova nọ o rrọ obọ Kinshasa ze. Fiki ẹmo omoma nọ ọ rrọ orẹwho na, u kr’akpọ no nọ a ruẹ ohwo nọ o no obọ uwou-ogha ze, yọ a gwọlọ rehọ uvẹ nana rue rai.

Inievo-emetẹ ivẹ na a ruọ okọ fa ithẹ ivẹ vrẹ jẹ nya owhawho vrẹ nọ a je no ẹwho rai, Basankusu kpohọ Lisala, erẹ ugbo ikilomita 300. Erẹ na ọ rehọ e rai eka esa. Aimava a rrọ ekobaro, ọjọ o ru ọkobaro te ikpe 3 no, ọdekọ ikpe 19, fikiere a tẹ rehọ uvẹ erẹ na whowho emamọ usi Uvie na. A rehọ euwa 110 rọ ta usiuwoma kẹ enọ a ruẹ evaọ edhere, je fi emebe-evẹvẹ 200 gbe emagazini 30 họ ada.

Evaọ ethẹ na, a je bi udevie ini-ame gbe idhere vrẹ, enọ a rẹ jọ ofẹ yena ruẹ gaga. Fiki erao imuozọ yena, a je bi evaọ aso ho! A te jẹ nya eria buobu vrẹ nọ isoja e rẹ jọ da ahwo ji jẹ nọ enọ.

Dede nọ erẹ nana o thabọ gaga yọ o rẹ lẹliẹ oma whọlọ ohwo, eva e were inievo ivẹ na kẹ oma nọ a dao na. Okokohọ na nọ a kpohọ evaọ Lisala o kẹ rai evawere gaga. Ọwhọ ọ ja rai oma gaga kẹ uzẹme na, yọ a wo uduotahawọ no okokohọ na ze nọ a rọ jọ udevie inievo 7,000. Nọ okokohọ na o kuhọ no, a tẹ jẹ ruẹ uye ovona zihe kpo, je di ahwo uviuwou rai họ kọkọ.