Enọ Ahwo nọ A s’Ebe

Evaọ Izrẹl anwae, eme elo igbunu nọ a re se ẹsejọ nọ Shekina na, onọ o rẹ roma via evaọ Ọrẹri Erẹri ọrọ uwou-udhu gbe etẹmpol na u dhesẹ?

Jihova, Ọsẹ oyoyou gbe Ọnọ ọ be thọ ahwo riẹ na, o ru re a jọ Izrẹl riẹ inọ ọ rrọ kugbe ae. Edhere jọ nọ o ro ru ere họ ẹkwoma ẹgho jọ nọ ọ jẹ hae jọ uwou egagọ riẹ.

Elo ọnwranwra yena o jẹ hai dhesẹ nọ Jihova ọ rrọ etẹe. O roma via evaọ Ọrẹri Erẹri ọrọ uwou-udhu gbe etẹmpol nọ Solomọn ọ bọ. Orọnikọ elo igbunu yena u dhesẹ nọ Jihova ọ jọ etẹe evaọ ugboma ha. Ọghẹnẹ ọ sae rria uwou nọ ahwo-akpọ a bọ họ. (2 Iruẹru-Ivie 6:18; Iruẹru 17:24) Elo igbunu nana nọ ọ jọ aruẹri Ọghẹnẹ na o rẹ sae kẹ ozerẹ okpehru na udu, emọ Izrẹl na a vẹ jẹ rehọ ẹkwoma ozerẹ na wo evaifihọ inọ Jihova ọ rrọ kugbe ai jẹ be rẹrote egwọlọ rai.

A jẹ hae rehọ ẹvẹrẹ Aramaic ọrọ okenọ a kere Ebaibol na no ro se elo nana Shekina (shekhi·nahʹ ), ubiẹme nọ otofa riẹ o rrọ “ọnọ ọ be rria” hayo “oria nọ ọ rrọ.” A rẹ jọ Ebaibol ruẹ ẹme nana ha, rekọ a rẹ rue riẹ evaọ efafa ẹvẹrẹ Aramaic ọrọ Ikereakere Hibru na, onọ a re je se Targums.

Okenọ ọ jẹ kẹ ithubro kpahe ebabọ uwou-udhu na, Jihova ọ ta kẹ Mosis nọ: “Wha ve ti fi agbara ohrọ na fihọ ehru etehe-ọvọ na; eva etehe isẹi na wha re ti fi isẹi nọ mẹ te kẹ owhai na họ. Etẹe me je ti zere owhai, eva obehru oria ẹkeria ohrọ na, udevie . . . Cherubim ivẹ nọ e rọ etehe ijaje na.” (Ọnyano 25:21, 22) Etehe nọ a fodẹ na o jọ etehe nọ a rehọ igoru ru oma riẹ evaọ Ọrẹri Erẹri na. Cherubim igoru ivẹ e jọ ururu etehe na.

Diẹse Jihova ọ rẹ ta ẹme no ze? Ọ kuyo na okenọ ọ ta kẹ Mosis nọ: “Mẹ rẹ te jọ eva ẹgho rehọ oma via eva ehru oria ẹkeria ohrọ na.” (Iruo-Izerẹ 16:2) Ẹgho nana ọ jọ ehru Etehe ẹri na evaọ udevie Cherubim igoru ivẹ na. Ebaibol na o dhesẹ hẹ epanọ ẹgho na o kpehru no Etehe na te hayo thabọ no Cherubim ivẹ na te.

Ẹgho ọnwranwra nana o je fi elo họ oria Ọrẹri Erẹri na. Evaọ uzẹme, ọye ọvo họ elo nọ ọ jọ etẹe. Elo yena o je fi obọ họ kẹ ozerẹ okpehru na okenọ ọ tẹ ruọ ọgwa obeva na evaọ Ẹdẹ Omavoro. Aro Jihova o dikihẹ na.

Kọ elo igbunu nana o wo otofa jọ kẹ Ileleikristi? Jọn ukọ na ọ ruẹ okpẹwho jọ nọ ‘aso ọ rrọ họ.’ Okpẹwho na họ Jerusalẹm Ọkpokpọ na, onọ Ileleikristi nọ a wholo, enọ a kpare ze re a su kugbe Jesu a ru via. Elo nọ o bi lo mu okpẹwho ẹwoho nana orọnikọ ọre hayo ọvẹre o bi no ze he. Oruaro Jihova Ọghẹnẹ u bi lo mu okpẹwho nana, wọhọ epanọ ẹgho Shekina o je lo fihọ Ọrẹri Erẹri na. Ofariẹ, Omogodẹ na, Jesu Kristi, họ “ukpẹ” okpẹwho na. “Okpẹwho” nana o te bi ku elo abọ-ẹzi gbe aruoriwo riẹ ku ahwo nọ a ta no igbo erẹwho kpobi ze re o ruẹse kẹ ae ọkpọvio.—Eviavia 21:22-25.

Fikinọ eghale ibuobu yena i bi no ehru ze te ai obọ, o rẹ sai mu enọ e be gọ Jihova ẹro inọ Ọye họ Othuru nọ ọ be thọ ai gbe Ọsẹ oyoyou rai.