Odẹ Ọghẹnẹ O Rrọ Ebaibol Ẹvẹrẹ Germany Jọ Nọ O Kri Gaga No
ODẸ-OMA Ọghẹnẹ, Jihova, o roma via asia idu buobu evaọ Ebaibol ọ New World Translation of the Holy Scriptures, onọ a siobọno evaọ ẹvẹrẹ Germany evaọ 1971.a Dede na, orọnikọ onana họ Ebaibol ẹvẹrẹ Germany ọsosuọ nọ odẹ Ọghẹnẹ o rrọ họ. O wọhọ nnọ Ebaibol ẹvẹrẹ Germany ọsosuọ nọ odẹ na Jihova o jọ roma via họ onọ Johann Eck, owuhrẹ ichọche Kathọlik jọ nọ ọ viodẹ, o siobọno anwọ ikpe 500 nọ i kpemu.
A yẹ Johann Eck evaọ 1486 evaọ ofẹ obọze ovatha-ọre Germany. Nọ ọ jọ ikpe 24, ọ jọ profẹsọ iwuhrẹ-egagọ eva yunivasiti ọrọ Ingolstadt, yọ ọkwa yena ọ jọ bọwo ẹdẹ uwhu riẹ evaọ 1543. Oke ovona Martin Luther avọ Eck a rria, yọ aimava na a jọ egbẹnyusu evaọ umuoke jọ. Dede na, Luther o zihe ruọ ọnọ ọ karo evaọ etoke Aruẹrẹ na, etoke nọ otu ahwo jọ a jẹ rọ gwọlọ nwene iwuhrẹ ichọche Kathọlik, rekọ Eck ọ jọ ọnọ ọ jẹ thọ Ichọche Kathọlik na.
Ọba ọ Bavaria ọ ta kẹ Eck inọ ọ fa Ebaibol na fihọ ẹvẹrẹ Germany, a te siobọno efafa na via evaọ 1537. Wọhọ epanọ obe na, Kirchliches Handlexikon (evaọ ẹvẹrẹ Germany) o ta, Eck ọ fa Ebaibol na nya lele ikere anwae na fikiere u “fo nọ ahwo a sei vi epanọ a bi sei enẹna.” Enẹ Eck ọ fa Ọnyano 6:3: “Mẹ họ Olori na, ọnọ ọ roma via kẹ Abram, Aiziki, gbe Jekọp wọhọ Ọghẹnẹ Erumeru: yọ odẹ mẹ Adonai, me dhesẹ i rie via kẹ ae he.” Eck o kere eme jọ fihọ akotọ owọ Ebaibol yena: “Odẹ na Adonai Jehoua.” Egba-eriariẹ Ebaibol buobu a rọwo inọ onana họ orọ ọsosuọ nọ odẹ-oma Ọghẹnẹ o rọ roma via evaọ Ebaibol ẹvẹrẹ Germany.
Dede na, a riẹ odẹ-oma Ọghẹnẹ jẹ rehọ iẹe ruiruo te ikpe idu buobu no. Oria ọsosuọ nọ ma riẹ nọ a jọ rehọ iẹe ruiruo họ evaọ ẹvẹrẹ Hibru, onọ a jọ rehọ “Jihova” ruiruo wọhọ odẹ nọ a re ro vuhu Ọghẹnẹ uzẹme ọvuọvo na. (Iziewariẹ 6:4) Enwenọ ikpe 2,000 nọ e vrẹ, ẹvẹrẹ Griki a ro kere eme ọ Jesu na, nọ ọ ta inọ o dhesẹ odẹ Ọghẹnẹ via no. (Jọn 17:6) No anwọ oke yena ze, a kere odẹ na no evaọ evẹrẹ buobu, yọ kẹle na, evaọ orugba Olezi 83:18, ahwo kpobi a te riẹ nnọ ọnọ odẹ riẹ o rrọ Jihova na họ Ọnọ Ọ Mai Kpehru vi otọakpọ na.
[Oruvẹ-obotọ]
a Onọ Isẹri Jihova a kere, orọ ọsosuọ evaọ Oyibo evaọ 1961. Enẹna ma wo oma riẹ soso hayo abọ riẹ jọ evaọ evẹrẹ nọ i bu vi 50.
[Uwoho nọ o rrọ ẹwẹ-obe avọ 32]
Ebaibol nọ Eck ọ fa evaọ 1558, avọ eme ọ akotọ nọ e ta kpahe odẹ na Jihova eva Ọnyano 6:3