Kọ Who ‘Fe Evaọ Obọ Ọghẹnẹ’?

EVAỌ usu etadhesẹ buobu nọ i re duobọte ohwo iroro nọ Jesu Kristi ọ kẹ, ojọ o ta kpahe ọdafe jọ nọ o wo etọ buobu. Re ọ ruẹ nnọ eware i kiehọ kẹe evaọ obaro, ọdafe na ọ tẹ ma omaa inọ ọ rẹ bọ iwou nọ e rro vi erọ ọsosuọ nọ ọ rẹ jọ rawo eware. Ghele na, evaọ ọtadhesẹ Jesu na, a se ọzae na ‘ogheghẹ.’ (Luk 12:16-21) Efafa Ebaibol buobu a tube se ọzae na “oruru.” Fikieme a rọ nwani dhesẹ ọzae na yoma tere?

U muẹro inọ ọdafe nana o fi Ọghẹnẹ họ iroro ma omaa riẹ hẹ; yọ ọ rehọ oruaro kẹ Ọghẹnẹ dede he wọhọ ọnọ o bi ru otọ na wou eware. (Matiu 5:45) Ukpoye, o seha nọ: “Amema, who wo eware buobu nọ e rọ nọ i re te ikpe buobu; rehọ oma totọ, whọ re, da, whọ ghọghọ.” Ẹhẹ, o roro nnọ erere nọ o ti no iruo riẹ ze ọ te wọhọ ‘ugbẹhẹ ukpehru nọ o te thọe.’—Itẹ 18:11.

Be vẹvẹ unu kpahe ẹzi omoya otiọye na, Jemis olele na o kere nọ: “[Nyaze], whai enọ e rẹta nọ: ‘Nẹnẹ hayo odẹ ma reti kpo ẹwho yena gbe ọyena ma vẹ ria etẹe egbukpe jarọ thueki jẹ ruẹ-erere’; kpakiyọ wha riẹ epanọ e rọ odẹ hẹ. Eme uzuazọ rai o rọ? Keme whai igrigri nọ e rẹ via omoke kakao e vẹ nwane rayẹ no.”—Jemis 4:13, 14.

Nwanọ ere o via, a ta kẹ ọdafe ọrọ ohare Jesu na nọ: “Whẹ [ogheghẹ,] aso ọnana a guọlọ ẹwẹ ra; kọ eware nọ whọ ruẹrẹ kpahe na, ono o re ti wo ai?” Wọhọ igrigri nọ e rẹ rayẹ, ọdafe na o ti whu no taure irẹro riẹ na i te ti rugba. Kọ oware nọ ọtadhesẹ na o bi wuhrẹ na u vẹ omai ẹro? Jesu ọ ta nọ: “Whaọ ere [o rẹ via kẹ] ọnọ o koko efe kẹ oma riẹ, [nọ] o fe obọ Ọghẹnẹ hẹ.” Kọ who ‘fe evaọ obọ Ọghẹnẹ’?