Uvuhu Epanọ Uyero Na O Rrọ Nẹnẹ

ẸSIBUOBU whọ rẹ ruẹ Vicentea nọ ọ be rehọ etrọko ghelie ewha egbẹgbẹdẹ nya iyẹrẹ jọ vrẹ evaọ São Paulo, Brazil. Ọ rẹ gwọlọ ebe-ekatọno, eware eyọno, gbe erọ irọba nọ a gbolo kufiẹ. Nọ oke u te kpo no, ọ vẹ rehọ ebe-ekatọno hwa otọ etrọko riẹ o ve kiẹzẹ. O rẹ wọhọ nọ ọ be daezọ edo imoto nọ e be dhẹ evaọ iyẹrẹ nọ o kiẹzẹ na ha. O wo iruo, uwou gbe uviuwou vẹre—rekọ enẹna o gbe wo ọvuọvo ho. Iyẹrẹ họ oria nọ ọ be jọ rehọ udu gaga ruẹ emu okpẹdẹ.

U yoma kẹhẹ, wọhọ Vicente, wariẹ akpọ na họ uvuhu ogaga u bi kpe ima ahwo buobu. Evaọ erẹwho nọ i bi rovie ze obọ, uvuhu o gba ima ahwo buobu họ nọ a be rọ rria iyẹrẹ hayo iwou-owhre. Whọ rẹ jọ oria kpobi ruẹ ahwo nọ a rẹ yare eware—emo, otu nọ i tuaro, eyae nọ e be kẹ emọ rai evie. Evaọ oria edhere nọ imoto e rẹ jọ bọmu unwenọ ẹsikpobi, whọ rẹ ruẹ emaha nọ e rẹ dhẹ no imoto kpohọ imoto evaọ uhie na be gwọlọ zẹ iswiti re a sai wo umugho jọ.

O rrọ bẹbẹ re a ta oware nọ o soriẹ nọ uvuhu utioye na o rọ rrọ. Emagazini Britain na, The Economist o ta nọ: “No otọ ze, ahwo-akpọ a ri fe, hayo wo eriariẹ usiwo-imu, eware-ikuo gbe eriariẹ nọ a sai ro si uvuhu notọ te enẹ ẹdẹvo ho.” Ahwo buobu a gine wo erere no eriariẹ nana ze no. Iyẹrẹ ikpewho evaọ erẹwho buobu nọ i bi rovie e be vọ avọ imoto ekpokpọ nọ a dhẹ fihọ ọvuọvuọ oria rai. Iwou-eki e vọ avọ ekwakwa akpọ oyere nọ i bi kieze, yọ a be gwọlọ ahwo nọ a rẹ dẹ ae bẹ hẹ. Iwou-eki ivẹ jọ evaọ obọ Brazil a rehọ obọdẹ edhere jọ whowho ekiọthuọ rai. A rovie oria eki na fihọ aso hẹrioke evaọ December 23 rite 24, 2004. A zizie ahwo nọ a re gbe-ile ziọ oria eki nana jọ re a ruẹsi ru oma sasa ahwo nọ a te nya ze te dẹ eware. Onana u ru nọ ahwo nọ a nya ze te dẹ eware a ro bu te 500,000!

Dede na, ima ahwo buobu a bi wo erere no efe nọ ahwo jọ a be reawere riẹ ze he. Ohẹriẹ ulogbo nọ o rrọ udevie ahwo nọ a fe gbe otu nọ uvuhu u bi kpe u ru nọ ahwo buobu a rọ ta nọ u fo inọ a re ru oware jọ enẹna re a si uvuhu notọ. Emagazini Brazil na, Veja o ta nọ: “U fo nọ ogbo ọrọ epanọ a re ro si uvuhu notọ o jọ ugogo uzoẹme nọ isu akpọ na a rẹ ta ẹme kpahe evaọ egwae rai enukpe nana [2005].” Emagazini na Vẹja ọ tẹ jẹ ta ẹme kpahe Omaa ọ Marshall okpokpọ nọ a wo họ iroro nọ a ti ro fi obọ họ kẹ erẹwho nọ e mai yogbe, maero kọ Africa.b Dede nọ o rẹ wọhọ nọ omaa itienana e te wha ẹnyaharo ze, emagazini ọvona o fibae nọ: “Ẹjiroro buobu e tẹ jẹ riẹ nọ a rẹ rọ vro sọ omaa itienana e ginẹ wha ewoma ze no. Otẹrọnọ erẹwho buobu a bi wo ehoo nọ a rẹ rọ zọhọ fihọ omaa itienana, kiyọ oware nọ o be wha ehoo na ze họ, igho nọ a zọhọ i bi te obọ ahwo nọ a gwọlọ rehọ igho na fi obọ họ kẹ hẹ.” Mai yoma na, fiki ofruriọ, gbe eware sa-sa nọ o rẹ rehọ re a tẹ whaliẹ igho na te ahwo nọ a rrọ ẹbẹbẹ na obọ, abọ buobu ọrọ igho nọ egọmeti, ikoko obufihọ akpọ soso, gbe enọ ahwo a rọ ze i bi te obọ ahwo nọ a ginẹ rrọ ẹbẹbẹ na ha.

Jesu ọ riẹ nọ ẹbẹbẹ uvuhu o te jọ otọ krẹkri. Ọ ta nọ: “Ẹsekpobi whai avọ iyegbere a gbẹ jọ.” (Matiu 26:11) Kọ onana u dhesẹ nọ uvuhu u ti no akpọ nana ẹdẹjọ họ? Kọ oware jọ o riẹ nọ a rẹ sai ru nọ uyero na u je dina gbẹkoko? Eme Ileleikristi a rẹ sai ru ro fi obọ họ kẹ iyogbere na?

[Oruvẹ-obotọ]