Fi Obọ Họ Kẹ Amọfa Nya Lele Oware Nọ Ebaibol Na O Wuhrẹ
“Enọ e rọ evaọ emamọ ẹkpẹ yọ enọ e rehọ eva oruọzewọ gbe ewoma yo ẹme na, a te kru ei whawha, a tẹ rehọ odiri mọ ibi.”—LUK 8:15.
1, 2. (a) Ẹjiroro vẹ a ro kere obe na Eme Ebaibol na O Gine Wuhrẹ? (b) Ẹvẹ Jihova ọ rọ ghale omodawọ idibo riẹ no evaọ ikpe jọ kẹlena evaọ iruo ilele iruo na?
“OSẸRI JIHOVA jọ nọ ọ rrọ ọtausiwoma oke-kpobi ọ ta kpahe obe Eme Ebaibol na O Gine Wuhrẹ? a na nọ: “Obe na u woma kẹhẹ. O were emọ-uwuhrẹ Ebaibol mẹ gaga. O were omẹ thesiwa re. Obe nana u ru rie nọ whọ sai ro mu obe-uwuhrẹ Ebaibol họ kugbe ahwo lọlọhọ.” Owhowho-uvie jọ nọ ọ kpako no ọ ta kpahe obe ovona nọ: “Me wo uvẹ-ọghọ nọ me ro fi obọ họ kẹ ahwo buobu riẹ Jihova no anwọ ikpe 50 nọ mẹ rọ rrọ iruo odibọgba na. Rekọ, uzẹme riẹ họ a rẹ ruẹ obọ obe nana ha. Epanọ a kere obe na gbe iwoho nọ e riẹ i siuru kẹhẹ.” Kọ ere who rri obe Ebaibol Wuhrẹ na re? A ruẹrẹ obe nana họ re u fi obọ họ kẹ owhẹ ru uzizie Jesu na gba, nọ ọ ta nọ: “Wha wuhrẹ ahwo erẹwho kpobi . . . re a ru eware kpobi nọ mẹ vuẹ owhai.”—Matiu 28:19, 20.
2 Ababọ avro, eva e be were Jihova nọ ọ be ruẹ Isẹri riẹ nọ i bu te oware wọhọ ima ezeza gbe ubro nọ e be rehọ unevaze yo ẹme kẹ ujaje Jesu na inọ a nyai ru ilele. (Itẹ 27:11) Jihova ọ be ginẹ ghale omodawọ rai. Wọhọ oriruo, evaọ ukpe-iruo 2005, ekwotọ 235 a jọ ta usiuwoma, yọ ebe-iwuhrẹ Ebaibol nọ a ru i bu vi 6,061,500 nọ a ghale ai fihọ amara ọvuọvo. Onana u ru nọ ahwo buobu a ro ‘yo ẹme Ọghẹnẹ, jẹ rehọ iẹe wọhọ ẹme nọ o no obọ Ọghẹnẹ ze, orọnọ ẹme ahwo ho.’ (1 Ahwo Tẹsalonika 2:13) Evaọ ikpe ivẹ nọ i kpemu na, ahwo ọkpokpọ nọ a jẹ itee Ọghẹnẹ rehọ, nwene uzuazọ rai lele edhere riẹ jẹ rehọ oma mudhe kẹe no a bu vi idu egba isoi.
3. Enọ vẹ ma be te kiẹriwi evaọ uzoẹme nana kpahe epanọ ma rẹ rọ rehọ obe ọ Ebaibol Wuhrẹ na ru iruo?
3 Kọ whọ reawere uwuhrẹ Ebaibol kugbe ohwo jọ no kẹle? Wariẹ akpọ họ, ahwo nọ a wo “eva oruọzewọ gbe ewoma,” a gbẹ riẹ nọ a te yo ẹme Ọghẹnẹ a ti ‘kru rie whawha, jẹ rehọ odiri mọ ibi.’ (Luk 8:11-15) Joma ta kpahe epanọ whọ sae rọ rehọ obe Ebaibol Wuhrẹ na ru uwuhrẹ Ebaibol evaọ iruo ilele-iruo na. Ma be te kiẹ enọ esa jọ riwi: (1) Ẹvẹ whọ sai ro mu obe-uwuhrẹ Ebaibol họ? (2) Ena uwuhrẹ vẹ e be mai ru iruo? (3) Ẹvẹ whọ sai ro fi obọ họ kẹ omọfa jọ ọmọ-uwuhrẹ Ebaibol gbe ọnọ o re wuhrẹ amọfa Ẹme Ọghẹnẹ?
Epanọ Whọ Sai ro Mu Obe-Uwuhrẹ Ebaibol Họ
4. Eme ọ rẹ sae lẹliẹ ahwo jọ genu kpahe uwuhrẹ Ebaibol, kọ ẹvẹ whọ sai ro fi obọ họ kẹ ai fi ehoo yena kparobọ?
4 A tẹ ta kẹ owhẹ nọ whọ rehọ ofu-ọvo la uto vrẹ, ẹsejọhọ whọ te rọwo ho. Rekọ a te fi itho fihọ eria sa-sa nọ whọ rẹ sae jowọ fihọ evaọ oko na, ẹsejọhọ whọ te gwọlọ daoma epanọ whọ rẹ rọ fae vrẹ. Epọvo na re, ohwo nọ iruo e vọ abọ ọ sai genu kpahe uwuhrẹ Ebaibol. Ọ sai roro nọ uwuhrẹ na o te gwọlọ oke gbe omodawọ gaga. Ẹvẹ whọ sai ro fi obọ họ kẹe whaha ehoo yena? Ẹkwoma umutho eware jọ nọ i re siuru nọ who re lele iei ta kpẹkpẹe eva etoke sa-sa rono obe Ebaibol Wuhrẹ na ze, whọ sae rehọ ere kpọ isiuru riẹ kpohọ uwuhrẹ Ebaibol ikẹse kẹse. Whọ tẹ ruẹrẹ oma kpahe ziezi, oke kpobi nọ who zihe bru ohwo na o te jọ obufihọ kẹe re ọ nya usu kugbe Jihova wọhọ epanọ itho nọ a fihọ uto i re fi obọ họ kẹ ohwo lae vrẹ na.
5. Fikieme u je fo re who se obe Ebaibol Wuhrẹ na?
5 Dede na, re whọ sai fi obọ họ kẹ omọfa wo erere no obe Ebaibol Wuhrẹ na ze, u fo nọ whọ rẹ riẹ obe na totọ tao. Kọ who se obe na n’oka t’oka no? Ọzae-avọ-aye jọ a wha obe na lele oma kpohọ erẹ-eriosehọ, a te je sei eva okenọ a kpohọ akotọ-ame nọ a rẹ jọ zaharo. Nọ aye ẹwho na jọ nọ ọ jẹ zẹ eware kẹ ahwo nọ a ziọ ughe-uriwo, ọ nya kẹle ai, ọ tẹ ruẹ uzoẹme obe na Eme Ebaibol na O Gine Wuhrẹ? Ọ ta kẹ ọzae-avọ-aye na inọ euwa jọ nọ e vrẹ ọ lẹ se Ọghẹnẹ inọ ọ kẹe uyo onọ yena. Avọ evawere, ọzae-avọ-aye na a tẹ kẹ aye na obe na jọ. Kọ who ru uvẹ se obe nana no, ẹsejọhọ orọ avọ isiava, evaọ okenọ whọ be hẹrẹ oware jọ hayo evaọ oke eriosehọ eva obọ iruo hayo isukulu? (Ahwo Ẹfẹsọs 5:15, 16) O tẹ rrọ ere, kiyọ whọ te ginẹ riẹ obe nana nọ a re ro ru uwuhrẹ Ebaibol na ziezi, jẹ gwọlọ uvẹ rọ ta ẹme kẹ amọfa kpahe eware nọ e riẹe.
6, 7. Ẹvẹ whọ sae rọ rehọ obe ọ Ebaibol Wuhrẹ na mu obe-uwuhrẹ Ebaibol họ?
6 Nọ who te bi fi obe na họ ada, rehọ iwoho na, ikereakere, gbe enọ nọ e rrọ ẹwẹ-obe avọ 4, 5, gbe 6 na ru iruo ziezi. Wọhọ oriruo, whọ sae rọ onọ utiona mu ẹme họ, “Ma te rri ebẹbẹ nọ e rẹriẹ ovao dhe ahwo-akpọ nẹnẹ, diẹse who roro nọ ma sae jọ ruẹ uvi ọkpọvio nọ u re fi obọ họ?” Nọ whọ tẹ roma totọ gaviezọ kẹ uyo ohwo na no, who ve se 2 Timoti 3:16, 17, je ru ei vẹ inọ Ebaibol na ọ fodẹ ifue ebẹbẹ ohwo-akpọ. Kẹsena whọ vẹ kpọ iroro ohwo na rri ẹwẹ-obe avọ 4 gbe 5, whọ vẹ nọ inọ: “Eva usu ebẹbẹ nọ a dhesẹ evaọ iwoho nọ e rrọ etenẹ na, ovẹ o be mae kẹ owhẹ idhọvẹ?” Ohwo na ọ tẹ riẹ obọ họ ọjọ, kẹe obe na kru re who se oria ikereakere nọ o ta ẹme kpahe iẹe no Ebaibol ze. Kẹsena who ve je se ẹwẹ-obe avọ 6, jẹ nọ ohwo na nọ, “Eva usu enọ ezeza nọ e rrọ obotọ ẹwẹ-obe nana, ovẹ whọ gwọlọ uyo riẹ?” Ọ tẹ fodẹ ọjọ, dhesẹ uzoẹme nọ o kuyo onọ yena kẹe, kẹe obe na, re who je ru ọruẹrẹfihotọ nọ who ti ro zihe bru ei re wha ta ẹme kpahe onọ yena.
7 Edhere ẹme ọta nọ a jọ etenẹ dhesẹ na o rẹ rehọ oware wọhọ iminiti isoi ọvo. Evaọ umutho oke yena yọ whọ riẹ oware nọ o rrọ ọdawẹ ohwo na no, yọ who se ikereakere ivẹ jẹ ta ẹme kpahe ai no, who te je fi otọhotọ họ kẹ iweze efa no. O sae jọnọ ẹmẹme yena nọ who lele i rie ta na họ eme uduotahawọ gbe omosasọ nọ o ri yo kẹle he. Fikiere, makọ ohwo nọ o re wo uvẹ tere he ọ sai rẹro oke nọ whọ te wariẹ ro zihe ze re whọ raha omoke ofa kugbei nọ who bi fi obọ họ kẹe jowọ epanọ ọ rẹ rọ ruọ “edhere nọ a re ro kpohọ uzuazọ” na. (Matiu 7:14) Nọ isiuru ohwo na e be ga na, u re woma re wha ru oke uwuhrẹ na theri. Wha sae jiroro na kugbe re wha fiba oke uwuhrẹ na.
Ena Uwuhrẹ nọ E be Mai Ruiruo Kpaobọ
8, 9. (a) Ẹvẹ whọ sae rọ ruẹrẹ ọmọ-uwuhrẹ ra kpahe kẹ obokparọ evaọ ezadhe gbe edawọ nọ ọ rẹ sae rẹriẹ ovao ku? (b) Diẹse ma rẹ sae jọ duku ekwakwa nọ erae e rẹ to ho nọ a rẹ rọ bọ ẹrọwọ ga?
8 Nọ ohwo o te mu oware nọ Ebaibol o wuhrẹ họ ẹnya lele no, ọ sae rẹriẹ ovao ku ezadhe nọ i re si ei kpemu evaọ ẹnyaharo riẹ. Pọl ukọ na ọ ta nọ: “Ahwo kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.” (2 Timoti 3:12) Pọl ọ rehọ edawọ itienana dhesẹ erae nọ e rẹ raha ekwakwa ebabọ nọ e rẹ tọ họ, rekọ e rẹ sae raha eware wọhọ oro, idọlọ-efuafo, gbe itho-ezi hi. (1 Ahwo Kọrint 3:10-13; 1 Pita 1:6, 7) Re whọ ruẹsi fi obọ họ kẹ ọmọ-uwuhrẹ Ebaibol wo ekwakwa-aghae nọ o gwọlọ nọ ọ sai ro dikihẹ ga kẹ edawọ nọ ọ rẹ sae rẹriẹ ovao dhe, u fo nọ who re fi obọ họ kẹe rehọ ekwakwa nọ erae e rẹ sae to ho bọ ẹrọwọ riẹ.
9 Ọso-ilezi na ọ rehọ ‘ẹme ỌNOWO na’ dhesẹ “idọlọ-efuafo nọ a ghra [isiahrẹ] evaọ ebrerae.” (Olezi 12:6) Evaọ uzẹme, Ebaibol na o wo ekwakwa-aghae nọ ma sae rọ bọ ẹrọwọ mai ga. (Olezi 19:7-11; Itẹ 2:1-6) Yọ obe Ebaibol Wuhrẹ na u dhesẹ epanọ ma rẹ rọ rehọ Ikereakere na ru iruo ziezi.
10. Ẹvẹ whọ sai ro fi obọ họ kẹ ọmọ-uwuhrẹ si oware nọ Ebaibol na o wuhrẹ te udu?
10 Eva etoke uwuhrẹ na, kpọ iroro ọmọ-uwuhrẹ na rri ikereakere nọ e rrọ oria nọ wha bi wuhrẹ na. Rehọ enọ fi obọ họ kẹ ọmọ-uwuhrẹ na wo otoriẹ ugogo eria Ikereakere nọ i du obọ te ẹme na re o je dhesẹ epanọ ọ sai ro fi ai họ iruo. Whọ ta uzedhe oware nọ ohwo na o re ru kẹe he. Ukpoye, raro kele oriruo Jesu. Okenọ ọriẹ-izi jọ ọ nọe onọ, Jesu ọ kẹ riẹ uyo nọ: “Eme a kere họ eva uzi? Ẹvẹ who re se?” Ọzae na ọ kuyo no Ikereakere na ze, kẹsena Jesu o te fi obọ họ kẹe ruẹ epanọ o re ro fi ehri-uzi ikereakere na họ iruo. Jesu ọ tẹ jẹ rehọ oriruo fi obọ họ kẹ ọzae na ruẹ oghẹrẹ nọ u fo nọ uwuhrẹ na u re ro kpomahọ iẹe. (Luk 10:25-37) Obe Ebaibol Wuhrẹ na o vọ avọ etadhesẹ elọlọhọ buobu nọ whọ sai ro fi obọ họ kẹ ọmọ-uwuhrẹ ruẹ epanọ o re ro fi ehri-izi Ikereakere na hiruo.
11. Ẹvẹ oria nọ who re wuhrẹ kugbe ọmọ-uwuhrẹ eva ẹkeriotọ u fo nọ u re theri te?
11 Obe Ebaibol Wuhrẹ na o rehọ eme elọlọhọ ru Ẹme Ọghẹnẹ vẹ, nwane wọhọ epanọ Jesu ọ rehọ eme elọlọhọ ru eware ididi vẹ na. (Matiu 7:28, 29) Raro kele oriruo Jesu. Rehọ edhere ọlọlọhọ, nọ ọ rrọ vevẹ wuhrẹ ahwo eme nọ e rrọ obe na gbagba. Whọ rehọ ovariẹ ru uwuhrẹ na ha. Ukpoye, rehọ uyero na gbe epanọ ọmọ-uwuhrẹ na ọ rẹ sai wo otoriẹ oware vẹrẹ te rọ riẹ unu idhe-ẹme nọ wha re wuhrẹ evaọ ẹkeriotọ ọvuọvo. Jesu ọ riẹ utho ẹgba-otoriẹ ilele riẹ, fikiere o wuhrẹ i rai vrẹ utho eware nọ a gwọlọ evaọ oke oyena ha.—Jọn 16:12.
12. Eme u fo nọ a re ru kpahe eme-ofiba na?
12 Obe Ebaibol Wuhrẹ na u wo eme-ofiba nọ a ruẹrẹhọ izoẹme 14. Wọhọ epanọ ẹgwọlọ ọmọ-uwuhrẹ na ọ rrọ, whọ sae riẹ epanọ who re ro wuhrẹ iẹe abọ nana nọ u je kiehọ. Wọhọ oriruo, otẹrọnọ ọmọ-uwuhrẹ ọ gbẹ be kaki wo otoriẹ uzoẹme jọ họ hayo nọ o te wo enọ kpahe eware jọ fiki orọwọ nọ o wo vẹre, whọ sai si iroro riẹ kpohọ abọ nọ ọ ta ẹme kpahe iẹe eva eme-ofiba na jẹ vuẹe re ọ kiẹ uzoẹme na riwi kẹ omariẹ. Eva abọdekọ riẹ, nọ who te roro kpahe ẹgwọlọ ọmọ-uwuhrẹ na, ẹsejọhọ whọ sae ruẹ nọ u fo re whọ kiẹ oria na riwi kugbei. Abọ eme-ofiba na u wo obọdẹ izoeme nọ a rehọ no Ikereakere na ze, wọhọ “Kọ Oware jọ O Rrọ Oma Ohwo-Akpọ nọ A rẹ Ruẹ hẹ nọ U re Whu Hu?” gbe “Evuhumu ‘Babilọn Ologbo Na.’ ” Ẹsejọhọ o te were owhẹ re whọ rehọ izoeme nana wuhrẹ ọmọ-uwuhrẹ ra. Nọ a ru enọ lele izoeme erọ eme-ofiba na ha na, o gwọlọ nọ whọ rẹ riẹ eme nọ e riẹe ziezi re whọ sae rehọ otoriẹ ra nọ enọ kpahe ai.
13. Ẹvẹ olẹ u re ro fi obọ họ ru ẹrọwọ ohwo ga?
13 Olezi 127:1 o ta nọ: “Ajokpa ỌNOWO nọ ọ bọ uwou, hayo kọ omoma enọ e ruẹ uye bọe yọ orọ ọvọvẹ.” Fikiere, nọ wha bi ti mu uwuhrẹ Ebaibol na họ, lẹ se Jihova kẹ obufihọ. Jọ olẹ emuhọ gbe ekuhọ uwuhrẹ kpobi u dhesẹ emamọ usu nọ who wo kugbe Jihova. Ta udu họ ọmọ-uwuhrẹ na awọ re ọ hae lẹ se Jihova kẹ areghẹ nọ o re ro wo otoriẹ Ẹme Riẹ gbe ẹgba nọ o re ro fi uthubro riẹ họ iruo. (Jemis 1:5) Ọmọ-uwuhrẹ na ọ tẹ be hai ru ere, o ti wo ẹgba nọ o ti ro thihakọ edawọ jẹ rro haro evaọ ẹrọwọ.
Fi Obọ họ kẹ Emọ-Uwuhrẹ Jọ Enọ I re Wuhrẹ Amọfa
14. Ẹnyaharo vẹ u fo nọ emọ-uwuhrẹ Ebaibol a re wo?
14 Re emọ-uwuhrẹ Ebaibol a sai ru “eware kpobi” nọ Jesu ọ vuẹ ilele riẹ, u fo nọ a rẹ nyaharo evaọ ewuhrẹ Ẹme Ọghẹnẹ te epanọ a sai ro wuhrẹ amọfa. (Matiu 28:19, 20; Iruẹru 1:6-8) Eme whọ rẹ sai ru ro fi obọ họ kẹ ọmọ-uwuhrẹ wo ẹnyaharo abọ-ẹzi otiọye na?
15. Fikieme whọ jẹ ta udu họ ọmọ-uwuhrẹ Ebaibol ra awọ re ọ hai kpohọ iwuhrẹ ukoko mai?
15 No ẹdẹ ọsosuọ nọ who ro mu uwuhrẹ na họ, zizie ọmọ-uwuhrẹ na re ọ hai lele owhẹ kpohọ iwuhrẹ ukoko. Ru ei vẹ kẹe inọ iwuhrẹ yena họ oria nọ whọ be jọ wo eriariẹ nọ whọ be sai ro wuhrẹ amọfa Ẹme Ọghẹnẹ na. Eva eka jọ buobu, rehọ omoke jọ eva ukuhọ uwuhrẹ na ro dhesẹ omaa iwuhrẹ abọ-ẹzi nọ whọ be reawere rai eva iwuhrẹ sa-sa gbe ikokohọ kẹe. Ta ẹme sasasa kpahe erere nọ who bi wo no eruẹrẹfihotọ nana ze. (Ahwo Hibru 10:24, 25) Nọ ọmọ-uwuhrẹ na o te mu iwuhrẹ họ ẹnya ẹsikpobi no, kiyọ irẹro e riẹ inọ ọ be te jọ ọnọ o ti wuhrẹ amọfa Ẹme Ọghẹnẹ.
16, 17. Itee jọ vẹ ọmọ-uwuhrẹ Ebaibol ọ rẹ sai fihọ je le tobọ?
16 Fi obọ họ kẹ ọmọ-uwuhrẹ Ebaibol fi itee họ nọ ọ rẹ sai le tobọ. Wọhọ oriruo, ta udu họ iẹe awọ re ọ hae vuẹ egbẹnyusu hayo imoni riẹ eware nọ o bi wuhrẹ. Ofariẹ, jiroro kẹe inọ o fi ute họ nọ o re ro se Ebaibol na kpobi re. Who te fi obọ họ kẹe wo jẹ yọrọ omaa isase Ebaibol ẹsikpobi, uruemu nana o te kẹe erere nọ ọ tẹ make họ-ame no. U te no ere no, whọ sae jiroro kẹe inọ o fi ei họ ute riẹ re ọ hae kareghẹhọ o tẹ kawo oria Ebaibol jọ nọ o kẹ uyo ugogo onọ jọ eva uzoẹme kpobi nọ o rrọ obe Ebaibol Wuhrẹ na. Enẹ o ti ro zihe ruọ “oruiruo ọnọ ọ kare omaovuọ, nọ rẹ yọrọ ẹme uzẹme na ziezi.”—2 Timoti 2:15.
17 Ukpenọ who wuhrẹ ọmọ-uwuhrẹ re ọ hae wariẹ eme ikere jọ uzuzou hayo rehọ ẹme obọriẹ ta oware nọ o rrọ ugogo ẹme ikere jọ ọvo, ta udu họ iẹe awọ re ọ rọ oma totọ dhesẹ epanọ Ikereakere na i ro kiekpahe ugogo ẹme jọ evaọ okenọ ọ tẹ be ta oware nọ ọ rọwo kẹ amọfa. Odhesẹvia ọkpẹkpẹe nọ wha re ru kugbe u ti fi obọ họ, nọ who re jo ru wọhọ ẹsenọ whọ rrọ omoni hayo ibe-oruiruo riẹ nọ ọ be nọe kpahe oware nọ ọ rọwo. Nọ ọmọ-uwuhrẹ na ọ be kẹ uyo na, dhesẹ kẹe epanọ ọ rẹ rọ kpahe ẹme avọ ‘udhedhẹ gbe oma-urokpotọ.’—1 Pita 3:15.
18. Nọ ọmọ-uwuhrẹ Ebaibol o te te owhowho-uvie nọ ọ re họ-ame he no, obufihọ ofa vẹ whọ sae gbẹ kẹe?
18 Nọ oke o be nyaharo na, ọmọ-uwuhrẹ na ọ sai te epanọ o re ro kpohọ usiuwoma ota. Fi ẹgba họ iẹe inọ uvẹ-ọghọ ulogbo o rrọ re ohwo ọ jọ iruo nana wobọ. (2 Ahwo Kọrint 4:1, 7) Nọ ekpako na a tẹ ruẹ nọ ọmọ-uwuhrẹ o te epanọ ọ rẹ rọ jọ owhowho-uvie nọ ọ re họ-ame he no, wuhrẹ iẹe edhere ẹmeọta kpẹkpẹe re whọ jẹ jọ usu kugbei evaọ usiuwoma ota. Hae jọ kugbei ẹsikpobi eva kabọ kabọ iruo odibọgba na, re who je wuhrẹ iẹe epanọ ọ rẹ rọ ruẹrẹ oma kpahe kẹ je ru izihebro. Emamọ oriruo ra o ti fi obọ họ kẹe wo ẹnyaharo.—Luk 6:40.
“Siwi Oma Ra gbe Ahwo [nọ] A be Kezọ Ẹme Ra”
19, 20. Ute vẹ u fo nọ ma re fihọ, kọ fikieme?
19 O ginẹ gwọlọ iruo gaga re a sai fi obọ họ kẹ ohwo “riẹ uzẹme na.” (1 Timoti 2:4) Dede na, eware nọ e rẹ sae kẹ ohwo oghọghọ evaọ uzuazọ te obọ nọ ma re fihọ kẹ ohwo ru lele oware nọ Ebaibol o wuhrẹ i bu hu. (1 Ahwo Tẹsalonika 2:19, 20) Eva uzẹme, uvẹ-ọghọ riẹ o rro kẹhẹ nọ ma rọ rrọ “otu nọ i bi ru iruo kẹ Ọghẹnẹ” evaọ iruo nana nọ ma bi ro wuhrẹ ahwo wariẹ akpọ soso họ na!—1 Ahwo Kọrint 3:9.
20 Kẹle na, Jihova ọ te rehọ ẹkwoma Jesu Kristi gbe ijẹle riẹ bruoziẹ “enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.” (2 Ahwo Tẹsalonika 1:6-8) Uzuazọ ahwo o rrọ ọza. Kọ whọ sai ru ei fihọ ute ra inọ o tẹ kawo who re wo obe-uwuhrẹ Ebaibol ọvo ẹkwoma eroruiruo obe na Eme Ebaibol na O Gine Wuhrẹ? Nọ who bi ru onana, who wo uvẹ nọ who re ro “siwi oma ra gbe ahwo [nọ] a be kezọ ẹme ra.” (1 Timoti 4:16) Enẹna o jẹ mae rrọ oja re ma fi obọ họ kẹ amọfa ru oware nọ Ebaibol na o wuhrẹ.
[Oruvẹ-obotọ]
a Onọ Isẹri Jihova a kere.
Eme Who Wuhrẹ?
• Ẹjiroro vẹ a ro kere obe Ebaibol Wuhrẹ na?
• Ẹvẹ whọ sae rọ rehọ obe Ebaibol Wuhrẹ na mu ebe-iwuhrẹ Ebaibol họ?
• Ena uwuhrẹ vẹ e be mai ru iruo?
• Ẹvẹ whọ sai ro fi obọ họ kẹ ọmọ-uwuhrẹ jọ ọnọ o re wuhrẹ amọfa Ẹme Ọghẹnẹ?
[Uwoho nọ o rrọ ẹwẹ-obe avọ 12]
Kọ whọ be rehọ obe nana ru iruo ziezi?
[Uwoho nọ o rrọ ẹwẹ-obe avọ 13]
Ẹmeọta-kugbe ọkpẹkpẹe ọ rẹ sae lẹliẹ ohwo wo isiuru nọ o re ro wuhrẹ kpahe Ebaibol
[Uwoho nọ o rrọ ẹwẹ-obe avọ 15]
Ẹvẹ whọ sai ro fi obọ họ kẹ ọmọ-uwuhrẹ si oware nọ Ebaibol na o wuhrẹ te udu?
[Uwoho nọ o rrọ ẹwẹ-obe avọ 16]
Fi obọ họ kẹ ọmọ-uwuhrẹ Ebaibol na wo ẹnyaharo