Enọ Ahwo nọ A s’Ebe

Eme họ “ẹmo . . . Ọghẹnẹ Erumeru na” Amagẹdọn, kọ eme o ti noi ze?—Eviavia 16:14, 16.

Re a tae kpẹkpẹe, ẹmo Amagẹdọn na họ ẹmo otọakpọ soso nọ ọ rrọ obaro tha onọ Jesu Kristi, Ovie nọ Jihova o ro mu, ọ te jọ raha ewegrẹ Ọghẹnẹ. Ebaibol i dhesẹ inọ “izi ukumuomu” na i ti koko ewegrẹ nana họ, koyehọ, “ivie akpọ na kpobi,” kpohọ ‘ẹdẹ ẹmo ologbo Ọghẹnẹ Erumeru na . . . eva oria nọ a rẹ rọ unu Hibru se nọ Amagẹdọn.’—Eviavia 16:14, 16.

Oria nọ egbaẹmo nana a ti koko họ na orọnikọ ginọ oria jọ dẹẹ hẹ. Otofa Amagẹdọn họ “Ugbehru Mẹgido.” (Eviavia 16:16) Uvumọ ugbehru o riẹ hẹ nọ u wo odẹ yena. Ofariẹ, “ivie akpọ na, gbe ogbotu ẹmo rai” a sai gine koko họ oria ọvo jọ họ. (Eviavia 19:19) Ukpoye, a rehọ “oria” na ro dhesẹ uyero nọ a su isu akpọ na gbe enọ e be thae uke kpohọ, koyehọ uyero nọ a be jọ wọso Jihova jẹ be wọso ‘egbaẹmo nọ e rrọ obọ odhiwu’ evaọ otọ esuo “Ovie ivie gbe Olori ilori” na, Jesu Kristi.—Eviavia 19:14, 16.

O nwani fo inọ Mẹgido, okpẹwho anwae Izrẹl jọ, a rehọ ubiẹme na “Amagẹdọn” no ze. Mẹgido, ọnọ ọ rrọ ofẹ ovatha-ọre Ugbehru Kamẹl, ọ rrọ ẹwho nọ ethueki gbe egbaẹmo a rẹ nya vrẹ kpohọ ewho efa. O tẹ jẹ rrọ oria nọ ahwo buobu a jo fi emo kparobọ no. Wọhọ oriruo, evaọ “akotọ ame Mẹgido” Berak Obruoziẹ na o jo fi egbaẹmo ilogbo Kenan enọ Sisera o je su kparobọ. (Ibruoziẹ 4:12-24; 5:19, 20) Oria yena Gidiọn Obruoziẹ na omariẹ o jo fi ahwo Midia kparobọ. (Ibruoziẹ 7:1-22) Nọ Ebaibol e rehọ ẹmo nọ ọ be tha na ro dhesẹ Mẹgido na, e be tudu họ omai awọ inọ Ọghẹnẹ, ẹkwoma Ọmọ riẹ, o ti fi egbaẹmo ewegrẹ na kpobi kparobọ.

Eme o ti noi ze? Ẹmo Amagẹdọn o ti si ofruriọ gbe emuemu kpobi no otọakpọ na. O te wha akpọ nọ ọ mai woma evaọ ikuigbe ahwo-akpọ kpobi ze. (Eviavia 21:1-4) Evaọ otọ esuo Uvie Ọghẹnẹ, a ti nwene otọakpọ na fihọ aparadase onọ ahwo okiẹrẹe a te rria bẹdẹ bẹdẹ.—Olezi 37:29.