O Ginẹ Lọhọ Ese, Rekọ O Gba?

EVAỌ September 2005, Ichọche ọ England a rehọ evawere dede obusino Ebaibol Iminiti 100 na rehọ. Ebaibol nana, onọ a ru re a sei no emuhọ rite ekuhọ evaọ iminiti 100 na, a jariẹ ruẹrẹ Ikereakere Hibru na fihọ ẹko 17, ẹko ọvo ọ rrọ ẹwẹ-obe ọvo, a tẹ jẹ ruẹrẹ Ikereakere Griki na fihọ ẹko 33, fikiere, wọhọ epanọ ohwo jọ nọ ọ kiẹ Ebaibol na riwi ọ ta, a tẹ rọ enẹ nya siọ “eria nọ i re fou ehoo ese” na kpobi ba. Uzẹme nnọ o ginẹ lọhọ ese, rekọ o gba?

U te no odẹ Jihova nọ o riẹ hẹ no, ahwo nọ a se Ebaibol gboja a rẹ ruẹ nnọ eware efa jọ e jọ eva riẹ thọ. (Olezi 83:18, NW ) Wọhọ oriruo, abọ ọsosuọ riẹ ọ ta inọ Ọghẹnẹ “ọ ma odhiwu gbe akpọ evaọ edẹ ezeza.” Rekọ oware nọ Emuhọ 1:1 o ta ọvo họ: “Evaọ emuhọ Ọghẹnẹ ọ ma odhiwu gbe akpọ.” Nọ o ta ere no, ikuigbe ọsosuọ na i te dhesẹ eware efa nọ Ọghẹnẹ ọ ma fihọ otọakpọ na, enọ e rehọ “edẹ” hayo etoke ezeza. Kẹsena, Emuhọ 2:4 o tẹ gba etoke emama na kpobi ekru, o te sei ‘ẹdẹ nọ Ọghẹnẹ Olori na ọ rọ ma akpọ gbe idhiwu.’

Wọhọ epanọ Ebaibol Iminiti 100 na o ta, ohwo nọ ọ wha uye se Job, ọzae nọ o kru ẹgbakiete na họ “Setan, omọvo idibo [Ọghẹnẹ], . . . ọnọ a kẹ iruo re o gu ahwo-akpọ.” Kọ whọ ruẹ ẹthọthọ nọ ọ rrọ etenẹ na? Otofa “Setan” họ “Ohwo Ọwọsuọ.” Setan ọ rrọ odibo Ọghẹnẹ hẹ, rekọ ọwegrẹ ologbo Ọghẹnẹ gbe ọnọ ọ rehọ omobọ riẹ mu bi gu ahwo-akpọ.—Eviavia 12:7-10.

Kọ ẹvẹ kpahe ofẹ Ikereakere Griki Ileleikristi ọrọ Ebaibol Iminiti 100 na? Evaọ ọtadhesẹ igodẹ gbe ewe na, efafa ọkpokpọ nana o ta inọ Jesu ọ rẹ ghale enọ i fi obọ họ kẹ “oghẹrẹ ohwo kpobi,” rekọ ẹme nọ Jesu ọ ta họ enọ i ru ewoma kẹ ilele riẹ—koyehọ, “imoni” riẹ, ọ rẹ ghale. (Matiu 25:40) Obe Eviavia nọ a ru kpẹre o ta nnọ “a te raha Rom, Babilọn ologbo na, muotọ.” Rekọ emọ-uwuhrẹ Ebaibol a riẹ inọ ikere ọsosuọ na e fodẹ Rom wọhọ “Babilọn ologbo” na ha.—Eviavia 17:15–18:24.

Rọ kẹ enọ e gwọlọ riẹ Ọmemama na je wo otoriẹ ẹjiroro riẹ, a rẹ sae nya siọ oma Ebaibol na soso ba ha. Uzẹme, ese Ebaibol na o sae rehọ vrẹ iminiti 100, rekọ irere nọ i re noi ze a re gbiku riẹ hẹ. (Jọn 17:3) Jẹ use-abọ nana rehọ re whọ reawere irere nọ i re noi ze.—2 Timoti 3:16, 17.