Jọ Ẹme Ọghẹnẹ Ọ Kpọ Owojẹ Ra
“Ẹme ra họ ukpẹ kẹ awọ mẹ, ọye họ elo kẹ edhere mẹ.”—OLEZI 119:105.
1, 2. Fikieme ahwo-akpọ buobu a gbẹ be sae rọ ruẹ uvi udhedhẹ gbe evawere he?
KỌ WHỌ kareghẹhọ ẹdẹjọ nọ whọ rọ nọ ohwo jọ inọ o dhesẹ edhere kẹ owhẹ? Ẹsejọhọ whọ kẹle oria nọ who bi kpohọ no, rekọ edhere na ọ tẹ dina bada owhẹ aro. Hayo o sae jọnọ who gine vru no, o tẹ gwọlọ nnọ who re kuomarẹriẹ kpohọ edhere ọfa. Onọ o via kpobi, kọ o gbẹ jọ oware areghẹ re who lele edhere nọ ohwo nọ ọ riẹ oria na o dhesẹ kẹ owhẹ? Ohwo otiọye na ọ sai fi obọ họ kẹ owhẹ nyate oria nọ who bi kpohọ.
2 Evaọ ikpe idu buobu, ahwo-akpọ a be daoma nya orọ obọrai ababọ obufihọ Ọghẹnẹ. Fikinọ a gwọlọ su omobọ rai, ahwo-akpọ a vru no riẹriẹriẹ. A sai duku edhere nọ o re su kpohọ uvi udhedhẹ gbe evawere he. Fikieme a gbẹ be sai ro duku udhedhẹ gbe evawere he? Bu vi ikpe 2,500 nọ e vrẹ, Jerimaya ọruẹaro na ọ ta nọ: “Ohwo o wo ogaga nọ o ro su oma obọ riẹ hẹ.” (Jerimaya 10:23) Ohwo nọ ọ gwọlọ su omobọ riẹ ababọ uvi obufihọ ọ rẹ nyaku idhọvẹ. Uzẹme, ahwo-akpọ a gwọlọ ohwo nọ ọ rẹ kpọ ae họ edhere!
3. Fikieme Jihova Ọghẹnẹ o ro te kiọkọ re ọ kẹ ahwo-akpọ ọkpọvio, kọ didi eyaa ọ yaa?
3 Jihova Ọghẹnẹ o te kiọkọ re ọ kẹ ọkpọvio otiọye na. Fikieme? Fikinọ ọ riẹ epanọ ahwo-akpọ a rrọ vi omọfa kpobi. Yọ ọ riẹ oware nọ o lẹliẹ ahwo-akpọ vru no edhere nọ u fo nnọ a rẹ nya. Ọ tẹ jẹ riẹ oware nọ o gwọlọ re ahwo-akpọ a wariẹ duku edhere na. Ofariẹ, wọhọ Ọnọ ọ ma eware kpobi, Jihova ọ riẹ oware nọ o mai woma kẹ omai ẹsikpobi. (Aizaya 48:17) Fikiere, ma rẹ sae rehọ udu kpobi fievahọ eyaa riẹ nọ a kere fihọ Olezi 32:8: “Me re ti wuhrẹ owhẹ dhesẹ kẹ owhẹ edhere nọ whọ rẹ te nya; ẹro mẹ me re ti ro su owhẹ.” Avro ọ riẹ hẹ: Jihova ọ rẹ kẹ ọkpọvio nọ ọ mai woma kpobi. Rekọ, oghẹrẹ vẹ ọ be rọ kpọ omai?
4, 5. Ẹvẹ ẹme Ọghẹnẹ ọ sae rọ kpọ omai?
4 Ọso-ilezi jọ ọ jọ olẹ ta kẹ Jihova nọ: “Ẹme ra họ ukpẹ kẹ awọ mẹ, ọye họ elo kẹ edhere mẹ.” (Olezi 119:105) Eme nọ Ọghẹnẹ ọ ta gbe izi riẹ e rrọ Ebaibol na, yọ e rẹ sai fi obọ họ kẹ omai fi ezadhe nọ ma rẹ sae nyaku evaọ uzuazọ mai kparobọ. Evaọ uzẹme, ma te bi se Ebaibol na jẹ kẹe uvẹ re o kpọ omai, koyehọ oware nọ a dhesẹ fihọ Aizaya 30:21 na o be jọ oma mai rugba: “Ezọ rai i re ti yo ẹme evaọ obọ emu rai nọ, ‘Ọnana họ edhere na, wha nyae.’ ”
5 Rekọ muẹrohọ inọ Olezi 119:105 o riobọ họ eware ivẹ jọ nọ Ẹme Ọghẹnẹ o re ru. Orọ ọsosuọ, o rrọ ukpẹ kẹ awọ mai. Nọ ma tẹ rẹriẹ ovao ku ebẹbẹ ekẹdẹ kẹdẹ, ehri-izi nọ e rrọ Ebaibol na e rẹ kpọ ithihi mai re ma sae jẹ iroro areghẹ jẹ whaha ekieruọ egbefẹ akpọ nana. Orọ avivẹ, ẹme Ọghẹnẹ o re fi elo họ edhere mai, fi obọ họ kẹ omai jiroro nọ e rọwo kugbe ẹruore mai ọrọ ẹria bẹdẹ bẹdẹ evaọ Aparadase nọ Ọghẹnẹ ọ yeyaa riẹ na. Nọ edhere nọ ọ rrọ aro mai o bi lo vevẹ na, ma rẹ sae riẹ oware nọ u ti no owojẹ jọ ze, te uwoma hayo uyoma. (Ahwo Rom 14:21; 1 Timoti 6:9; Eviavia 22:12) Joma ruẹ oghẹrẹ nọ ẹme Ọghẹnẹ nọ ọ rrọ Ebaibol na ọ sae rọ jọ ukpẹ kẹ awọ mai jẹ jọ elo kẹ edhere mai.
“Ukpẹ kẹ Awọ Mẹ”
6. Evaọ otọ iyero vẹ ẹme Ọghẹnẹ ọ sae rọ jọ ukpẹ kẹ awọ mai?
6 Kẹdẹ kẹdẹ ma rẹ jiroro. Iroro-ejẹ jọ e rẹ sae gbẹdẹ tere he, rekọ ẹsejọ ma rẹ sae rẹriẹ ovao ku uyero nọ o rẹ gwọlọ gele omai fihọ ọfariẹ-ogbe, nọ o rẹ gwọlọ ru omai si obọ no uruemu oruọzewọ mai, hayo gwọlọ nnọ ma jọ abọjọ evaọ esuo hayo iruẹru akpọ na. Re ma sae rẹriẹ ovao ku edawọ itieye na avọ obokparọ, o gwọlọ nọ ma re wuhrẹ ẹgba otoriẹ mai re ma sae “hẹriẹ uwoma no uyoma.” (Ahwo Hibru 5:14) Ẹkwoma eriariẹ egbagba erọ Ẹme Ọghẹnẹ nọ ma re ro wuhrẹ oma omai je wo otoriẹ ehri-izi riẹ, yọ ma bi wuhrẹ udu mai epanọ ma sae rọ jiroro nọ e rẹ were Jihova.—Itẹ 3:21.
7. Dhesẹ uyero jọ nọ udu o sae rọ wọ Oleleikristi re o kuomagbe ibe-iruiruo riẹ nọ e rrọ ukoko ho.
7 Rehọ oriruo jọ. Kọ whẹ yọ ohwo nọ o t’ohwo no nọ ọ be ginẹ daoma ru Jihova eva were? (Itẹ 27:11) Otẹrọ ere, kiyọ whọ be riẹ ru. Rekọ ma rehọ iẹe inọ ibe-iruiruo ra jọ a zizie owhẹ inọ wha gbe kpohọ oria aruọzaha jọ, yọ a be te hwa ugho ofa ra jẹ k’owhẹ emu. Usu nọ who wo kugbe ai evaọ obọ iruo o be were ai gaga, yọ a gwọlọ re wha hai gbe kpohọ otafe kugbe. Udu ra o rẹ sae ta kẹ owhẹ inọ ahwo nana a rrọ ekpehre ahwo ho. O sae tubẹ jọnọ a wo emamọ uruemu jọ dede. Kọ eme who ti ru? Kọ enwoma jọ i ti noi ze nọ whọ tẹ rọwo uzizie na? Ẹvẹ Ẹme Ọghẹnẹ ọ sai ro fi obọ họ kẹ owhẹ jẹ emamọ iroro evaọ ẹme nana?
8. Ehri-izi Ikereakere vẹ i re fi obọ họ kẹ omai roro kpahe ẹme ọ usu?
8 Roro kpahe ehri-izi Ikereakere jọ. Orọ ọsosuọ nọ o rẹ ziọ iroro mai họ 1 Ahwo Kọrint 15:33, onọ o ta nọ: “Usu uyoma o rẹ raha uruemu ezi.” Kọ elele ehri-uzi nana o gwọlọ nnọ whọ kẹnoma kẹ enọ e rrọ ukoko ho riẹriẹriẹ? Uyo riẹ họ ijo. Binọ Pọl ukọ na o dhesẹ ọdawẹ “kẹ ahwo kpobi,” onọ u kugbe enọ e rrọ ukoko ho. (1 Ahwo Kọrint 9:22) Egagọ-Ileleikristi e gwọlọ nnọ ma wo isiuru kpahe amọfa—onọ u kugbe enọ e rrọ egagọ mai hi. (Ahwo Rom 10:13-15) Evaọ uzẹme, ẹvẹ ma sai ro lele ohrẹ nọ o ta nnọ ma “ru iruo ezi kẹ ahwo kpobi” otẹrọnọ ma rẹ ko oma mai dhere no ahwo nọ a rẹ sae gwọlọ obufihọ mai?—Ahwo Galesha 6:10.
9. Ohrẹ Ebaibol vẹ u re fi obọ họ kẹ omai jọ owowa evaọ usu kugbe ibe-iruiruo mai?
9 Rekọ, re a jọ whẹtiẹwhẹtiẹ kugbe ibe-oruiruo u wo ohẹriẹ no ẹjọ ogbẹnyusu ọkpekpe riẹ. Etenẹ ehri-uzi Ikereakere ofa jọ o sai jo fi obọ họ. Pọl ukọ na ọ vẹvẹ Ileleikristi unu nọ: “Wha ku oma rai gbe egedhọ họ.” (2 Ahwo Kọrint 6:14) Eme họ otofa ẹme na ‘wha ku oma rai gbe ai hi’? Ebaibol jọ e fa riẹ nọ “wha whoma họ ai hi,” hayo “wha mu usu kugbe ai hi.” Ẹvẹ whẹ avọ ohwo wha rẹ kpekpe te nọ a jẹ sae ta nnọ who bi mu usu kugbe ohwo na? Ẹvẹ whọ rẹ nya te nọ a sae rọ ta nnọ who bi ku oma gbe ohwo? Ebaibol e rẹ sae kpọ owhẹ evaọ ẹme nana.
10. (a) Ẹvẹ Jesu ọ jẹ rọ salọ enọ ọ rẹ nyusu kugbe? (b) Didi enọ e rẹ sai fi obọ họ kẹ ohwo jẹ emamọ iroro kpahe usu?
10 Roro kpahe oriruo Jesu, ọnọ o you ahwo-akpọ no emuhọ emama ze. (Itẹ 8:31) Okenọ ọ jọ otọakpọ, o mu usu okpekpe kugbe ilele riẹ. (Jọn 13:1) O tube “you” ọzae jọ nọ ọ rrọ olele riẹ hẹ. (Mak 10:17-22) Rekọ orọnikọ ohwo kpobi Jesu o je mu usu okpekpe kugbe he. O mu usu okpekpe he kugbe ahwo nọ e gwọlọ ru oreva Ọsẹ riẹ hẹ. Evaọ okejọ, Jesu ọ ta nọ: “Whai họ ezọ mẹ wha te ru eware nọ mẹ ta kẹ owhai.” (Jọn 15:14) Uzẹme, o sae jọnọ whẹ avọ ibe-oruiruo ra jọ wha be riẹ yeri ziezi. Rekọ nọ oma ra: ‘Kọ ohwo nana ọ gwọlọ ru eware nọ Jesu ọ ta? Kọ ọ gwọlọ wuhrẹ kpahe Jihova, ọnọ Jesu o wuhrẹ omai inọ ma gọ na? Kọ ọ gba riẹ mu inọ o re koko izi Ọghẹnẹ wọhọ epanọ mẹ gba riẹ mu no na?’ (Matiu 4:10) Nọ who bi lele ibe-iruiruo ra ta ẹme je dhesẹ nọ whọ gba riẹ mu inọ who re lele itee Ebaibol na, ẹmeunu gbe uruemu rai o te kẹ iyo enọ yena vevẹ.
11. Fodẹ iyero jọ nọ ẹme Ọghẹnẹ ọ sae jọ kpọ awọ mai.
11 Iyero efa buobu e riẹ nọ ẹme Ọghẹnẹ ọ jẹ sae jọ wọhọ ukpẹ kẹ awọ mai. Wọhọ oriruo, a sae kẹ Oleleikristi nọ o wo iruo anwẹdẹ hẹ iruo jọ. Rekọ, iruo na e rẹ kẹ ohwo uvẹ hẹ, yọ ọ tẹ rehọ iruo na, iwuhrẹ buobu e te hai voi yọ iruo na i ti je kpomahọ usiuwoma ota gbe eware efa nọ i wobọ kpahe egagọ riẹ. (Olezi 37:25) Ẹbẹbẹ Oleleikristi ọfa o sae jọ eriwi ighe nọ e wọso ehri-izi Ebaibol. (Ahwo Ẹfẹsọs 4:17-19) Orọ omọfa jọ o sae jọ eva nọ e rẹ kake dhae fiki sebaẹgba ibe Ileleikristi. (Ahwo Kọlọsi 3:13) Evaọ iyero nana kpobi, ma rẹ kuvẹ re Ẹme Ọghẹnẹ ọ jọ ukpẹ kẹ awọ mai. Evaọ uzẹme, ẹkwoma elele ehri-izi Ebaibol, ma rẹ sae rehọ ovao dhe use-abọ kpobi evaọ uzuazọ. Ebaibol na ọ rrọ “erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie.”—2 Timoti 3:16.
“Elo kẹ Edhere Mẹ”
12. Ẹvẹ ẹme Ọghẹnẹ ọ rọ rrọ elo kẹ edhere mai?
12 Olezi 119:105 o ta re inọ ẹme Ọghẹnẹ ọ sai fi elo họ edhere mai. Ma rrọ ebi hi kpahe obaro na, keme Ebaibol na i dhesẹ otofa eware idabolo nọ e rrọ akpọ na via gbe epanọ i ti ro kuhọ. Ẹhẹ, ma riẹ inọ “edẹ urere” uyerakpọ omuomu nana ma rrọ na. (2 Timoti 3:1-5) Ma tẹ riẹ oware nọ o rrọ aro mai u re kpomahọ oghẹrẹ nọ ma bi yeri uzuazọ mai obọnana. Pita ukọ na o kere nọ: “Kinọ enana kpobi e rẹte ghinẹ raha no na, didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ!”—2 Pita 3:11, 12.
13. Ẹvẹ u fo nọ ẹnwẹnwẹ oke mai na u re kpomahọ iroro gbe oghẹrẹ nọ ma re yeri uzuazọ mai?
13 Eriwo mai gbe oghẹrẹ nọ ma bi yeri uzuazọ mai u re dhesẹ imuẹro egaga nọ ma wo inọ “akpọ na avọ urusio riẹ e rẹ te vrẹ.” (1 Jọn 2:17) Efihiruo ehri-izi Ebaibol u ti fi obọ họ kẹ omai jẹ iroro areghẹ kpahe itee obaro mai. Wọhọ oriruo, Jesu ọ ta nọ: “Wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.” (Matiu 6:33) U woma kẹhẹ nọ ma be rọ ruẹ emoha buobu nọ e be ruọ iruo ọkobaro ro dhesẹ nnọ a fi ẹrọwọ họ eme ọ Jesu na! Amọfa—kugbe iviuwou jọ soso—a rehọ unevaze kwa kpohọ erẹwho efa no nọ a jọ gwọlọ etausiuwoma gaga.
14. Ẹvẹ uviuwou Ileleikristi jọ a ro ru odibọgba rai rro?
14 Rehọ oriruo ọzae avọ aye jọ gbe emọ ivẹ rai nọ a kwa no America kpobọ Dominican Republic re a kuomagbe ukoko jọ nọ o rrọ ẹwho nọ ahwo 50,000 e rrọ. Iwhowho-uvie 130 e rrọ ukoko na. Rekọ, evaọ April 12, 2006, ahwo nọ e ziọ Ekareghẹhọ uwhu Kristi a bu te 1,300! Evaọ ẹwho yena, idhu usiuwoma ota na “e fano kẹ evuo” te epanọ, oware wọhọ emerae isoi ọvo, ọzae nana avọ aye gbe emọ ivẹ rai a ro wo ahwo 30 nọ a je wuhrẹ Ebaibol kugbe. (Jọn 4:35) Ọsẹ na ọ ta nọ: “Inievo nọ e kwa ziọ obonẹ ti fi obọ họ kẹ ukoko na a bu te 30. Enwenọ 20 i no obọ America ze, enọ i kiọkọ i te no obọ Bahamas, Canada, Italy, New Zealand, gbe Spain ze. A nyaze avọ ọwhọ kẹ odibọgba na re a jẹ bọ inievo nọ e rrọ obonẹ ga.”
15. Didi eghale who wo no fikinọ who bi fi isiuru Uvie họ oware ọsosuọ evaọ uzuazọ ra?
15 Uzẹme, ibuobu a rẹ sae kwa kpohọ orẹwho ofa nọ ẹgwọlọ ọ mae jọ rro ho. Rekọ enọ e rẹ sae kwa—hayo enọ e rẹ sai nwene iyero rai re a sae kwa—a ti wo eghale buobu ẹkwoma obọ uwo evaọ abọ nana odibọgba na. Yọ oria nọ whọ rrọ kpobi, rehọ ẹgba ra kpobi gọ Jihova re whọ ruẹsi wo oghọghọ nọ u re noi ze. Whọ tẹ rehọ isiuru Uvie na karo evaọ uzuazọ ra, Jihova ọ yeyaa inọ o ti ‘vi eghale se owhẹ.’—Malakae 3:10.
Wo Erere no Ọkpọvio Jihova Ze
16. Didi erere ma re wo otẹrọnọ ma kẹ ẹme Ọghẹnẹ uvẹ re ọ kpọ omai?
16 Wọhọ epanọ ma ruẹ no na, ẹme Jihova ọ rẹ kpọ omai evaọ idhere ivẹ jọ. O wọhọ ukpẹ kẹ awọ mai, nọ u re fi obọ họ kẹ omai nya kpọvi, jẹ kpọ omai evaọ okenọ ma gwọlọ jiroro. Ẹme Ọghẹnẹ ọ tẹ jẹ wọhọ elo kẹ edhere mai, fi obọ họ kẹ omai ruẹ eware nọ e rrọ obaro vevẹ. Oyena u ve fi obọ họ kẹ omai lele uthubro Pita na: “Wha kru iroro rai ga, wha yọroma, wha gale ẹruore rai vi aruoriwo nọ obi bru owhai tha oke ẹrọvia Jesu Kristi.”—1 Pita 1:13.
17. Ẹvẹ uwuhrẹ Ebaibol u ti ro fi obọ họ kẹ omai lele ọkpọvio Ọghẹnẹ?
17 Avro ọ riẹ hẹ inọ Jihova ọ be kpọ ahwo riẹ. Onọ na họ, Kọ whọ te roma kpotọ kẹe? Re whọ sai wo otoriẹ ọkpọvio nọ Jihova ọ be kẹ, daoma hai se oria Ebaibol jọ kẹdẹ kẹdẹ. Roro didi kpahe oware nọ who bi se na, daoma riẹ oware nọ oreva Ọghẹnẹ o rrọ nọ ẹme jọ ọ tẹ rrọ otọ, je roro kpahe idhere sa-sa nọ whọ sai ro fi ẹme na họ iruo evaọ uzuazọ ra. (1 Timoti 4:15) Whọ vẹ rehọ ẹgba iroro ra ruiruo nọ whọ tẹ be jiroro kẹ oma ra.—Ahwo Rom 12:1.
18. Ma tẹ kuvẹ re Ẹme Ọghẹnẹ ọ kpọ omai, didi eghale ma ti wo?
18 Ma tẹ kẹ ehri-izi Ẹme Ọghẹnẹ uvẹ re e kpọ omai, i ti fi obọ họ kẹ omai jẹ kẹ omai ọkpọvio nọ ma gwọlọ evaọ okenọ ma tẹ be jiroro kpahe edhere nọ u fo ẹnya. O rẹ sai mu omai ẹro inọ ẹme Jihova nọ a kere fihọ Ebaibol na o “rẹ rọ areghẹ kẹ iwewe.” (Olezi 19:7) Ma tẹ kuvẹ re Ebaibol e kpọ omai, ma ti wo iroro efuafo gbe evevọwẹ nọ i re no eva nọ a re ru were Jihova ze. (1 Timoti 1:18, 19) Ma tẹ kuvẹ re eme Ọghẹnẹ e kpọ ẹnyonya mai kẹdẹ kẹdẹ, Jihova ọ te rehọ osa uzuazọ ebẹdẹ bẹdẹ ghale omai.—Jọn 17:3.
Kọ Whọ Kareghẹhọ?
• Fikieme o rọ roja re ma kẹ Jihova Ọghẹnẹ uvẹ inọ ọ kpọ ẹnyonya mai?
• Edhere vẹ eme Ọghẹnẹ e rẹ rọ jọ ukpẹ kẹ awọ mai?
• Ẹvẹ eme Ọghẹnẹ e rẹ rọ jọ elo kẹ edhere mai?
• Ẹvẹ uwuhrẹ Ebaibol u ti ro fi obọ họ kẹ omai lele ọkpọvio Ọghẹnẹ?
[Uwoho nọ o rrọ ẹwẹ-obe avọ 17]
Ẹvẹ usu kugbe ọnọ ọ rrọ ukoko ho u re te nọ a sae rọ ta nọ o thọ?
[Uwoho nọ o rrọ ẹwẹ-obe avọ 18]
Enọ i je ru oreva Jihova họ enọ e jọ egbẹnyusu ekpekpe Jesu
[Iwoho nọ e rrọ ẹwẹ-obe avọ 19]
Kọ oghẹrẹ nọ ma bi yeri uzuazọ mai u bi dhesẹ nnọ ma be rehọ isiuru Uvie karo?