Oware nọ U Wuzou Vi Ovao Ehru

ENWENỌ evaọ erẹwho kpobi a rẹ jọ rehọ ovao ehru na bru-ohare. Otujọ a rẹ ta nọ: Evawere o rrọ kẹ edhẹ-okọ nọ ovao ehru o tẹ rrọ wawae eva aso; rekọ edhẹ-okọ a rẹ yọrọ oma nọ ovao ehru na o tẹ rrọ wawae eva ohiohiẹ. Egba-eriariẹ a rẹ kẹ ẹjiroro ọkpakpakre kpahe oware nọ o rẹ lẹliẹ ehru nwene ovao wọhọ epanọ eme ohare na i dhesẹ na.

Okenọ Jesu ọ jọ otọakpọ, ahwo a jẹ hai rri ovao ehru na jẹ fotọ oware nọ u dikihẹ kẹ. Jesu ọ ta kẹ ahwo Ju jọ nọ: “Nọ o rọ owọwọ, wha rẹ ta nọ, ‘Ovao ehru ọ rẹ te ghariẹ, keme ehru o rẹ wawae.’ Eva ohiohiẹ, ‘Ehru o re ti fou-ofou nẹnẹ, keme ehru ọ ware fihọ je bi fiẹ.’ Wha riẹ epanọ a rẹ ta otọ ovao ehru.” Jesu o te fibae nọ: “Rekọ wha gbẹ sae ta otọ eware-oka oke onana ha.”—Matiu 16:2, 3.

Eme họ “eware-oka oke onana” nọ Jesu ọ ta ẹme te na? E jọ eware imuẹro nọ i dhesẹ nọ Jesu họ uvi Mesaya nọ Ọghẹnẹ o vi ze na. Iruẹru riẹ i dhesẹ oma via vevẹ wọhọ ovao ehru nọ o ware fihọ. Dede na, ahwo Ju buobu a jẹ eka nọ i dhesẹ nọ Mesaya na ọ zino fiẹ—okpoware nana nọ u wuzou vi ovao ehru na.

Epọvo na re, oka jọ o rrọ nọ u wuzou gaga vi ovao ehru gheghe nẹnẹ, nọ u fo nọ a re wo otoriẹ riẹe. Jesu ọ ta nọ a te raha akpọ omuomu nana no, akpọ owoma ọfa o ve ti nwene iei. O fodẹ eware buobu nọ e te via nọ omarai kpobi i ti dhesẹ okenọ enwene nana ọ te rọ roma via. Usu eware enana họ ẹmo nọ a te jọ akpọ-soso fi gbe ohọo nọ u ti mu. Jesu ọ ta nọ a tẹ ruẹ eware enana nọ e be via, yọ okenọ Ọghẹnẹ o ti ro dhomahọ iruẹru akpọ na o kẹlino.—Matiu 24:3-21.

Kọ whọ be ruẹ “eware-oka oke onana”?