Izoge Wha Rẹ Sai Ru Esẹgbini Rai Ghọghọ Hayo Bruenu
“EVAWERE nọ me wo vi onana o rọ họ, re me yo nọ emọ mẹ e rọ kpahe uzẹme na,” ere Jọn ukọ nọ ọ kpako no na o kere. (3 Jọn 4) Dede nọ ahwo nọ i kurẹriẹ ziọ ukoko na eye Jọn ọ jọ owọ Ebaibol nana t’ẹme te wọhọ emọ na, ọsẹ hayo oni nọ ọ rrọ ọg’Ọghẹnẹ ọ riẹ epanọ oghọghọ utionana o rẹ jọ. Wọhọ epanọ oware nọ esẹgbini i ru u re kpomahọ uzuazọ emọ rai na, ere ọvona oware nọ emọ i ru u re kpomahọ uzuazọ esẹgbini rai re.
Solomọn ovie Izrẹl ọ riẹ epanọ oware nọ emọ i ru o rẹ sai kpomahọ esẹgbini rai te. O kere nọ: “Ọmọ nọ o wo areghẹ o re ruọ eva were ọsẹ riẹ, rekọ ọmọ ogheghẹ ọ rẹ wha enuobro se oni riẹ.” (Itẹ 10:1) Fikiere, u fo re emọ kpobi—makọ enọ e kpako no—a hai roro epanọ uruemu rai u ti kpomahọ esẹgbini rai. Fikieme onana u ro fo?
Dai roro kpahe ẹro nọ ọsẹgboni ra nọ e be dhozọ Ọghẹnẹ a ro te owhẹ nọ whọ be whẹro na! Oke krẹkri taure a te ti yẹ owhẹ dede, a jẹ lẹ je roro kpahe owhẹ. Nọ a yẹ owhẹ fihọ otọ no, oma ra o jẹ were ai, yọ o sae jọnọ a yere Ọghẹnẹ rọkẹ uvẹ-ọghọ gbe owha-iruo nana nọ u te rai obọ na. Koyehọ uzuazọ ọmọfofa biẹghẹ biẹghẹ nọ ọ sae rẹrote oma riẹ hẹ o re rai obọ, yọ wọhọ enọ e be gọ Jihova, a se iruo nana gboja gaga.
Nọ orọnọ ọsẹgboni ra a rrọ uvi Ileleikristi na, a kiẹ Ebaibol na gbe ebe nọ a kere no Ebaibol ze kẹ uvi ọkpọvio, yọ a nọ amọfa nọ e yọrọ emọ no kẹ ohrẹ. A jẹ hae lẹ se Ọghẹnẹ kẹse kẹse kẹ ọkpọvio. (Ibruoziẹ 13:8) Nọ whọ be rro na, a riẹ ofẹ nọ who je woma, a tẹ jẹ riẹ ofẹ nọ whọ jọ gwọlọ obufihọ. (Job 1:5) Use-abọ ekpokpọ e roma via nọ who te ikpe ikpegbọ no. O sae jọnọ who dina je veghe uzou ẹmẹsejọ, ọsẹgboni ra a vẹ ruabọhọ olẹ vi epaọ ọsosuọ, mu ebe efa họ ẹkiẹ, je bi roro gaga kpahe epanọ a re ro fi obọ họ kẹ owhẹ gọ Ọsẹ obọ odhiwu ra, Jihova.
Whọ make kpako kẹhẹ, ọsẹgboni ra a gbe wo ọdawẹ kẹ owhẹ wọhọ ọmọ. A gbẹ be ruawa inọ eware i woma kẹ owhẹ evaọ kabọ kabọ nọ whọ maki t’ohwo no. Rekọ, evaọ oke nana kpobi, ọsẹgboni ra a be kareghẹhọ inọ whẹ yọ ohwo nọ o wo iroro obọriẹ gbe nnọ ohwo ọvo ọ rẹ sae ta oghẹrẹ ohwo nọ whọ be te jọ evaọ obaro ho. Whẹ ọvo ọ rẹ salọ kẹ oma ra oghẹrẹ ohwo nọ whọ gwọlọ jọ.
Otẹrọnọ ‘evawere nọ e rro vi onana o rrọ họ’ re esẹgbini a yo nọ emọ rai a “rọ kpahe uzẹme na,” kọ o gbẹ rrọ oware iroro re a ta nnọ emọ i gbe ru ere he o rẹ wha edada se esẹgbini? Evaọ uzẹme, emọ nọ i re ru eware nọ e kare iroro e rẹ wha ọkora se esẹgbini rai. Solomọn ọ ta nọ: “Ọmọ ogheghẹ ọ rẹ lẹliẹ ọsẹ bru-enu ọ vẹ jẹ jọ ẹyayare rọkẹ oni riẹ.” (Itẹ 17:25) A re gbiku edada riẹ hẹ otẹrọnọ ọmọ o gbabọ kẹ egagọ Ọghẹnẹ uzẹme na.
U re vevẹ, oware nọ wha ru u re kpomahọ ahwo uviuwou rai gbe amọfa. Uruemu rai u re kpomahọ esẹgbini rai gaga. Wha te kiemuku Ọghẹnẹ gbe ehri-izi riẹ, esẹgbini rai a te vioja. Rekọ wha te kru egagọ Ọghẹnẹ gaga, eva ọvo e te were ai. Wha gbaemu inọ wha re ru eva were esẹgbni rai! Okẹ ofa vẹ o ghare vi onana nọ wha rẹ rọ kẹ enọ e yọrọ owhai, nọ e thọ je you owhai?