Emuemu—Kọ Ọ v’Abọ No? — UWOU-EBE ITANẸTE ọrọ Uwou-Eroro

Emuemu—Kọ Ọ v’Abọ No?

Ọmọzae ọsese jọ nọ ọ riẹ onahona ha ọ tọlọ oware jọ evaọ ogege, kpakiyọ ebọmbo ọsese—nọ ebọmbo na ọ sa o te tu ọmọ na aro jẹ ko iẹe fihọ otọ. Oni jọ o gbolo ọmọ nọ o yẹ obọ kufiẹ fihọ ezuzu nọ ọ rrọ akotọ edhere. Ohwo jọ nọ a sino iruo o zihe ziọ oria iruo na, ọ tẹ sa ahwo nọ ọ ruẹ kpobi kpe, kẹsena ọ tẹ sa oma riẹ kpe. Ọzae jọ nọ a jẹ hai rri avọ adhẹẹ ọ gba emaha nọ e riẹ onahona ha du.

U YOMA gaga inọ evaọ oke mai na ma bi yo iyẹrẹ itieye na enwenọ ekẹdẹ kẹdẹ. Iyẹrẹ nọ e mai tube yoma nọ ma bi yo họ okpemuotọ uyẹ, ikpakpe-otu, gbe ozighi ọkparesuọ. Obe jọ nọ a kere evaọ 1995 o ta nọ: “Ma rẹ sae ta nnọ ikpe-udhusoi nana (koyehọ, ukpe 1900 rite 1999 na) yọ erọ Setan. Ikpe-udhusoi nana ọvo ma be jọ ruẹ ona gbe isiuru otiọnana nọ a bi ro kpe ima ahwo buobu fiki uyẹ rai, egagọ rai, hayo fiki epanọ a kparo te evaọ uzuazọ.”

Eva oke ovona, ahwo-akpọ a be nua ofou na, bi gbe otọakpọ na ku, be raha ekwakwa riẹ, je bi kpe emama riẹ buobu re no. Kọ ahwo-akpọ a sai ti fi emuemu nana kpobi kparobọ je ru akpọ na woma ziezi, avọ ufuoma? Hayo ohwo ọ tẹ be gwọlọ ruẹrẹ akpọ na kọ o te wọhọ ẹsenọ ọ be rehọ ekete vo ame? Ohwo ologbo isukulu jọ nọ o kere ebe buobu no kpahe emuemu nọ ọ rrọ akpọ na, ọ ta nọ: “O rrọ omẹ udu gaga inọ me re nwene akpọ na. Rekọ mẹ re ruẹ nnọ akpọ na o bi woma ha.” Ẹsejọhọ enẹ who rri akpọ na re.

A rẹ sae rehọ oghẹrẹ nọ akpọ na ọ be nya ro dhesẹ okọ-oyibo nọ ọ be dhẹ ruọ ẹkporo nọ o bi dhe ẹgẹga. Dede nọ uvumọ ohwo ọ gwọlọ dhẹ ruọ ẹkporo otiọye na ha, a be sai kuoma rẹriẹ hẹ. Okọ na o be họrọ ruọ ẹkporo ọgaga na ọvo, a be sae daeji hi.

Ma rẹ sae ta nnọ sebaẹgba ahwo-akpọ o be whae ze nọ akpọ na o bi ro dhe eyeyoma na. (Ahwo Rom 3:23) Ghele na, ma te rri epanọ emuemu ọ ga jẹ kẹrẹ te no nẹnẹ, ma rẹ sae nwane ta nọ egrẹ ahwo-akpọ ọvo o be whae ze he. Kọ o sae jọnọ ohwo omuomu jọ nọ a rẹ ruẹ hẹ, ọnọ o wo ẹgba gaga, ọye o bi tunye ahwo-akpọ? Otẹrọ ere, kọ ono họ ohwo yena, kọ ẹvẹ ma sae rọ thọ oma mai? Uzoẹme nọ o rrọ aro na o te ta kpahe enọ nana.

[Ọnọ o wo uwoho nọ o rrọ ẹwẹ-obe avọ 3]