Oware Jọ nọ Ahwo A Be Yare Evaọ Akpọ-soso

DAI roro kpahe onana—ahwo gbidi gbidi wariẹ akpọ na họ a be yare oware ovo jọ. A be yare osu ehrugbakpọ inọ o ru oware jọ kẹ ae. Ghele na, umutho rai ọvo a ginẹ riẹ oware nọ a be yare na. Ginọ uzẹme? Ẹhẹ, o be via kẹdẹ kẹdẹ. Eme ahwo na kpobi a be yare na? A be lẹ nọ Uvie Ọghẹnẹ o ze!

Wọhọ epaọ ikelakele jọ nọ a ru, egagọ nọ i bu te 37,000 a se omarai Ileleikristi, nọ a be ta nọ Jesu Kristi họ Osu rai. Ahwo nọ a bu vi ima-odu ivẹ a rrọ egagọ enana. Ibuobu rai a rẹ lẹ olẹ nọ a re se Olẹ Olori na hayo olẹ Ọsẹ Mai nọ Ọ Rrọ obọ Odhiwu. Whọ riẹ olẹ nana? Wọhọ epanọ Jesu o wuhrẹ ilele riẹ, enẹ olẹ na u ro muhọ: “Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”—Matiu 6:9, 10.

Anwọ ige buobu ze na, ahwo a wariẹ eme yena unuẹse buobu no evaọ iruẹru egagọ rai. Iviuwou gbe omomọvo a be hae lẹ olẹ nana ẹsibuobu, evaọ oke evawere gbe oke uweri. A be lẹ olẹ nana no udu ze avọ eva efuafo. Amọfa jọ a wuhrẹ eme na fihọ uzou no yọ a rẹ wariẹ ai ababọ erorokpahe otofa eme na. Orọnikọ ahwo nọ a se oma rai Ileleikristi ọvo a be hae lẹ kpahe je rẹro ẹtha Uvie Ọghẹnẹ hẹ.

Koghẹrẹ Koghẹrẹ Egagọ A be Yare Oware Ovona

Ahwo Ju a wo olẹ jọ nọ o viodẹ nọ a re se Kaddish, onọ a rẹ lẹ evaọ oke uweri. Dede nọ olẹ na o nwani kiekpahe uwhu hayo uweri hi, a rẹ lẹ olẹ nana gaga evaọ okenọ ohwo o te whu. Eme olẹ na jọ họ: “Jọ [Ọghẹnẹ] ọ rehọ Uvie riẹ ze evaọ etoke nọ whọ rọ rrọ uzuazọ na . . . vẹrẹ vẹrẹ.”a Olẹ ofa jọ nọ a jẹ hae jọ uwou-egagọ ahwo Ju oke anwae lẹ o ta kpahe ẹruore Uvie Mesaya nọ o re ti no uwou Devidi ze.

Egagọ efa nọ e rrọ Ileleikristi hi a wo isiuru kpahe Uvie Ọghẹnẹ re. Wọhọ epanọ obe-usi na The Times of India o ta, osu-egagọ India jọ ọrọ ikpe-udhusoi avọ ikpegbizii nọ o wo isiuru kpahe epanọ egagọ Hindu, Muslim gbe Ileleikristi i re ro wo okugbe ọ ta nọ: “Ma te sai wo Uvie Ọghẹnẹ te obọ họ ajokpanọ egagọ akpọ na a wo okugbe ọvo.” Yọ ohwo nọ o wo uzou ekọleji egagọ Muslim evaọ ẹwho Strathfield, Australia, o kere se ahwo oria-iruo obe-usi jọ kẹle nọ: “Wọhọ epanọ ahwo egagọ Muslim kpobi a rọwo, mẹ rọwo [inọ] Jesu o ti zihe tha te rehọ Uvie Ọghẹnẹ mu.”

Ababọ avro, ahwo nọ a bi rẹro enẹna jẹ be lẹ nọ Uvie Ọghẹnẹ o ze a te ima-odu buobu. Rekọ roro kpahe oware jọ nọ u wuzou gaga.

Ẹsejọhọ whọ riẹ inọ mai Isẹri Jihova nọ i kere emagazini nana, ma re no uwou ruọ uwou evaọ ẹwho ra lele ahwo ta ẹme kpahe Ebaibol na. Ma bi ru onana wariẹ akpọ-soso họ enẹna, evaọ ekwotọ 236 gbe evẹrẹ nọ i bu vrẹ 400. Ugogo uzoẹme usiuwoma ota mai họ Uvie Ọghẹnẹ. Ẹhẹ, wọhọ epanọ whọ ruẹ na, uzoẹme emagazini nana họ Uwou-Eroro Na Nọ U Bi Whowho Uvie Jihova. Ma rẹ nọ ahwo ẹsibuobu sọ a be lẹ kẹ Uvie yena. Ibuobu i re yo nọ Ee. Rekọ nọ ma tẹ nọ ae sọ a riẹ oware nọ Uvie yena o ginẹ rrọ, ibuobu a rẹ ta nọ a riẹ hẹ, yọ uyo otujọ u re vẹ hẹ.

Fikieme ahwo buobu a jẹ be lẹ kẹ oware nọ a riẹ otọ riẹ hẹ? Kọ fikinọ Uvie Ọghẹnẹ yọ oware nọ u vẹ ẹro ho, nọ o rẹ bẹ ẹriẹ? Ijo. A dhesẹ oware nọ Uvie na o rrọ vevẹ evaọ Ebaibol na. Ofariẹ, emamọ usi Uvie na nọ o rrọ Ebaibol na o sae kẹ owhẹ uvi ẹruore evaọ etoke obẹbẹ nana. Ma te jọ uzoẹme nọ o rrọ aro na ruẹ epanọ Ebaibol na i ro dhesẹ ẹruore yena vevẹ. Ma te jẹ jariẹ ruẹ oke nọ olẹ Jesu inọ Uvie na o ze na u ti ro rugba.

[Oruvẹ-obotọ]