Enọ I bi Se Ebe Mai A Nọ Inọ

Kọ Uvie Ọghẹnẹ O Rrọ Udu Ra?

A tẹ nọ ahwo buobu nẹnẹ onọ yena, a re yo nọ Ee. Wọhọ oriruo, obe na The Catholic Encyclopedia o ta nọ: “Otofa Uvie Ọghẹnẹ họ, epanọ Ọghẹnẹ ọ be kpọ udu mai.” Ere isu-egagọ buobu a bi wuhrẹ. Kọ Ebaibol i gine wuhrẹ nọ Uvie Ọghẹnẹ o rrọ udu ahwo-akpọ?

Ahwo jọ a roro nọ Jesu omariẹ họ ohwo nọ o mu uwuhrẹ na họ inọ Uvie Ọghẹnẹ o rrọ udu ahwo-akpọ. Jesu ọ ta nọ: “Ri, uvie Ọghẹnẹ o rọ udevie rai.” (Luk 17:21) Efefafa jọ a fa etenẹ ikere na nọ: “Uvie Ọghẹnẹ o rrọ owhẹ oma” hayo o “rrọ eva ra.” Kọ a ginẹ fa ẹme nọ Jesu ọ ta na gba? Kọ Uvie Ọghẹnẹ o rrọ udu ahwo-akpọ họ oware nọ Jesu o gine wo họ iroro?

Orọ ọsosuọ, joma ta ẹme kpahe oghẹrẹ nọ udu ohwo-akpọ o rrọ. Ebaibol e tẹ ta ẹme te udu ẹwoho, u dikihẹ kẹ oghẹrẹ nọ ohwo ọ rrọ evaọ obeva, oware nọ o be kpọ iroro, uruemu, gbe eriwo ohwo. Iroro inọ oware uwoma wọhọ Uvie Ọghẹnẹ soso o rrọ udu ohwo—evaọ oghẹrẹ nọ u re ro nwene je ru ahwo woma—o rẹ sai siuru, dede na kọ eriwo nana ọ gba?

Ebaibol na e vuẹ omai nọ: “Udu na u wo ẹghẹ vi eware na kpobi, je wo uruemu ugbogbo.” (Jerimaya 17:9) Jesu ọ ta nọ: “Eva ohwo iroro iyoma i re no tha, igberedha, ithatho, ahwokpe, ẹnhwae-obro, eware amọfa e guọlọ, imuemu.” (Mak 7:20-22) Roro kpahe onana: Kọ ogbẹrọnọ udu umuomu ohwo-akpọ o be wha uye-oruẹ buobu nọ u bi te ahwo-akpọ nẹnẹ na ze? Ẹvẹ Uvie Ọghẹnẹ nọ o gba kiete o sae rọ jọ udu ohwo-akpọ nọ u yoma te enẹ? Uzẹme riẹ họ, Uvie Ọghẹnẹ o sai no udu ohwo-akpọ ze he, wọhọ epanọ ubi ojo o rẹ sai no ure enwẹnwẹ ze he na.—Matiu 7:16.

Orọ avivẹ, roro kpahe ahwo nọ Jesu ọ jẹ ta ẹme kẹ okenọ ọ ta ẹme nọ ọ rrọ Luk 17:21 na. Owọ nọ o karo kẹ onana o ta nọ: “Nọ otu e Farisi a nọ e okenọ uvie Ọghẹnẹ o rẹ te tha no, o te yo kẹ ae.” (Luk 17:20) Ahwo Farisi na a jọ ewegrẹ Jesu. Jesu ọ ta vevẹ nọ eviẹwẹ yena a rẹ te ruọ Uvie Ọghẹnẹ hẹ. (Matiu 23:13) Whaọ, o tẹ rrọ nọ ahwo Farisi na a rẹ te ruọ Uvie Ọghẹnẹ hẹ, kọ a sae ta nọ Uvie na o rrọ eva rai? Vievie! Nọ o rrọ ere na, kọ eme Jesu ọ jẹ ta na?

Nọ a jẹ fa ẹme Jesu nana, ahwo jọ nọ a roma totọ fa Ebaibol na a rehọ eme nọ i tho erọ efafa Ebaibol Ẹri Na fa etenẹ ikere na. Otu jọ a fa riẹ nọ, Uvie na o rrọ “kugbe owhai” hayo “udevie rai.” Ẹvẹ Uvie Ọghẹnẹ o rọ jọ kugbe ahwo oke oyena, te ahwo Farisi na? Jesu họ ohwo nọ Jihova Ọghẹnẹ ọ salọ inọ ọ te jọ Ovie ọrọ Uvie na. Jesu nọ a ro mu Ovie ọrọ Uvie yena ọ jọ udevie rai. O wuhrẹ ahwo kpahe Uvie Ọghẹnẹ je ru eware igbunu, onọ o jọ odhesẹvia ọrọ eware nọ Uvie na u ti ru. Evaọ edhere yena, a sae ta nọ Uvie na o ginẹ jọ udevie rai.

O rrọ vevẹ, a rẹ jọ Ikereakere na ruẹ uvumọ oware he nọ o rọwo kugbe ẹme na inọ Uvie Ọghẹnẹ ọ rrọ udu ahwo-akpọ. Ukpoye, Uvie na yọ egọmeti dẹe, onọ o te wha inwene ilogbo ziọ otọakpọ na wọhọ epanọ a ruẹaro riẹ fihọ Ebaibol na.—Aizaya 9:6, 7; Daniẹl 2:44.