Si Kẹle Ọghẹnẹ
Othuru-Igodẹ nọ Ọ be Daezọ Ra
‘KỌ Ọghẹnẹ ọ be daezọ mẹ?’ Otẹrọnọ whọ nọ onọ yena no ẹdẹjọ, whẹ ọvo ọ nọ ere no ho. Ibuobu mai a rẹriẹ ovao dhe ebẹbẹ gbe ẹgaga uzuazọ no, yọ ẹsejọ ma rẹ sae nọ oma mai sọ Ọnọ ọ ma ehrugbakpọ soso na ọ be ginẹ daezọ mai. Kọ Jihova Ọghẹnẹ ọ be daezọ mai omomọvo? U fo re ma riẹ uyo onọ nana. Okenọ Jesu, ọnọ ọ riẹ Jihova totọ ọ jọ otọakpọ, ọ kẹ ọtadhesẹ jọ nọ o kẹ uyo na evaọ edhere nọ o rẹ sasa oma.
Nọ ọ jẹ rọ ẹruọsa othuru-igodẹ kẹ oriruo, Jesu ọ ta nọ: “Ohwo o te wo udhe ogodẹ usoi, re ọvo jọ o te vru, kọ ọ gbẹ se udhe-one gbe ikpegbizi na ba obọ ugbehru re ọ nya e guọlọ ọ nọ o vru na? Ọ tẹ rue riẹ, uzẹme mẹ ta kẹ owhai, ọ rẹ ghọghọ fiki riẹ vi udhe-one gbe ikpegbizi nọ i vru hu. Whaọ ere Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.” (Matiu 18:12-14) Joma ruẹ oghẹrẹ nọ ọtadhesẹ Jesu nana u ro dhesẹ obọdẹ ọdawẹ nọ Jihova o wo kẹ omomọvo idibo riẹ.
Othuru-igodẹ na ọ rehọ e riẹ inọ owha-iruo riẹ o rrọ re ọ rẹrote igodẹ riẹ ọvuọvo. Nọ ogodẹ o te vru, ọ rẹ riẹ ọnọ o vru. Ọ riẹ odẹ nọ o mu kẹ igodẹ na ọvuọvo. (Jọn 10:3) Othuru-igodẹ nọ ọ rẹ rẹrote uthuru riẹ ziezi ọ rẹ wẹ hẹ bẹsenọ o re duku ogodẹ nọ o vru. Yọ orọnọ o re fi uzuazọ igodẹ 99 nọ i kiọkọ họ ọza ha nọ ọ be nyae gwọlọ ọnọ o vru na. Ẹsibuobu ithuru-igodẹ a rẹ jọ kugbe, onọ u re ru nọ uthuru rai i je kuomagbe.a Fikiere, othuru-igodẹ nọ ọ be nyae gwọlọ ogodẹ nọ o vru ọ rẹ sae nya siọ uthuru riẹ ba kẹ ibe ithuru-igodẹ riẹ omoke kpẹkpẹe. Nọ o te duku ogodẹ nọ o vru na oma kọkọ, ọ rẹ ghọghọ. Ọ rẹ wọ ogodẹ nọ ozọ u bi mu na họ ẹkoko riẹ, nyai kuomagbe uthuru nọ oma o fọ na.—Luk 15:5, 6.
Nọ ọ jẹ kẹ otofa ọtadhesẹ na, Jesu ọ ta nọ Ọghẹnẹ ọ gwọlọ nọ “ọvo eva emaha enana o vru hu.” Jesu ọ vẹvẹ ilele riẹ unu no vẹre inọ a yọrọ oma re a siọ “emaha esese nana nọ e rọwo [riẹ] na” ba ezoruẹ. (Matiu 18:6) Eme ọtadhesẹ Jesu na o wuhrẹ omai kpahe Jihova? Inọ Jihova yọ Othuru-Igodẹ nọ o wo ọdawẹ gaga kẹ igodẹ riẹ, te “esese” na—enọ o wọhọ nọ i te oware ovo ho evaọ eriwo ohwo-akpọ. Ẹhẹ, Ọghẹnẹ ọ riẹ omomọvo idibo riẹ totọ, a tẹ jẹ rrọ ghaghae kẹe.
Whọ tẹ gwọlọ wo imuẹro viere inọ whọ ginẹ rrọ ghaghae evaọ aro Ọghẹnẹ, gbe wuhrẹ kpahe Jihova Ọghẹnẹ, Othuru-Igodẹ Ologbo na, gbe oghẹrẹ nọ whọ sai ro si kẹle iẹe kpekpekpe. Who te ru ere, whọ rẹ sai wo otiọ imuẹro Pita ukọ na, ọnọ o wọhọ nọ ọ jariẹ okenọ Jesu ọ jẹ kẹ ọtadhesẹ ogodẹ nọ o vru na. Pita o kere uwhremu na nọ: ‘Rọ awa-ọruẹ ra kpobi kpahe Ọghẹnẹ keme ọ be sẹro ra.’—1 Pita 5:7.
[Oruvẹ-obotọ]
a O rẹ bẹ hẹ re igodẹ na e hẹriẹ abọ bru ọvuọ othuru rai, keme ogodẹ o re vuhu uru ọnọ o wo rie.—Jọn 10:4.