Fi Obọ Họ Kẹ Enọ I Vru No Uthuru Na No
“Wha lele omẹ ghọghọ, keme mẹ ruẹ ogodẹ mẹ nọ o vru na no.”—LUK 15:6.
1. Ẹvẹ Jesu o ro dhesẹ inọ othuru-igodẹ oyoyou ọ rrọ?
A SE Jesu Kristi, Ọmọ ọvo Jihova nọ “Othuru Igodẹ Ologbo na.” (Hib. 13:20) Ikereakere na e ruẹaro kpahe eyẹ riẹ, yọ i dhesẹ inọ ọ jọ obọdẹ Othuru-Igodẹ nọ ọ jẹ gwọlọ “igodẹ nọ ivru” evaọ Izrẹl. (Mat. 2:1-6; 15:24) Ofariẹ, wọhọ epanọ othuru-igodẹ o re fi uzuazọ riẹ họ ọza re ọ ruẹse thọ igodẹ riẹ na, ere Jesu ọ rọ uzuazọ riẹ ro dheidhe re ọ ta enọ e wọhọ igodẹ no igbo, enọ i ti fi ẹrọwọ họ idheidhe riẹ.—Jọn 10:11, 15; 1 Jọn 2:1, 2.
2. Eme o lẹliẹ Ileleikristi jọ siọ iruo Uvie na ba no?
2 U yoma gaga inọ otujọ nọ i se idheidhe Jesu gboja vẹre nọ e rehọ oma rai mudhe kẹ Ọghẹnẹ no a gbe bi kuomagbe ukoko Ileleikristi na ha. Idhọvẹ, ẹyao, hayo ebẹbẹ efa e lẹliẹ e rai whrehe no jẹ siọ iruo Uvie na ba no. Udevie uthuru Ọghẹnẹ nọ a rẹ jọ ọvo a sai ro wo ufuoma gbe evawere nọ Devidi ọ t’ẹme kpahe evaọ Olezi avọ 23 na. Wọhọ oriruo, ọ so nọ: “ỌNOWO họ oriri mẹ, fikiere oja ovo o sae ruọ omẹ hẹ.” (Ol. 23:1) Evaọ abọ-ẹzi, oja ọvo o rẹ ruọ enọ e rrọ udevie uthuru Ọghẹnẹ hẹ, rekọ o rrọ ere kẹ igodẹ nọ i vru no uthuru na no ho. Ono ọ rẹ sai fi obọ họ kẹ ae? Ẹvẹ a sai ro fi obọ họ kẹ ae? Evaọ uzẹme, eme ma rẹ sai ru ro fi obọ họ kẹ ai zihe ziọ uthuru na?
Ono Ọ rẹ Sai Fi Obọ Họ?
3. Ẹvẹ Jesu o ro dhesẹ nnọ o gwọlọ omodawọ re a sae gwọlọ ogodẹ nọ o vru no uthuru Ọghẹnẹ?
3 O gwọlọ omodawọ gaga re a sai fi obọ họ kẹ igodẹ Ọghẹnẹ nọ i vru no zihe ziọ uthuru na. (Ol. 100:3) Jesu o dhesẹ onana nọ ọ ta nọ: “Ohwo o te wo udhe ogodẹ usoi, re ọvo jọ o te vru, kọ ọ gbẹ se udhe-one gbe ikpegbizi na ba obọ ugbehru re ọ nya e guọlọ ọ nọ o vru na? Ọ tẹ rue riẹ, uzẹme mẹ ta kẹ owhai, ọ rẹ ghọghọ fiki riẹ vi udhe-one gbe ikpegbizi nọ i vru hu. Whaọ ere Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.” (Mat. 18:12-14) Ono ọ rẹ sai fi obọ họ kẹ enọ e wọhọ igodẹ nọ i vru no uthuru na no?
4, 5. Oghẹrẹ vẹ ekpako na a rẹ rehọ uthuru Ọghẹnẹ?
4 Re ekpako ukoko a sai fi obọ họ kẹ igodẹ nọ i vru, a rẹ kareghẹhọ inọ uthuru na yọ ahwo nọ e rehọ oma mudhe kẹ Jihova no—ẹhẹ, ‘uthuru Ọghẹnẹ’ nọ ọ rrọ ghaghae. (Ol. 79:13) A re tete igodẹ eghaghae yena, yọ onana u dhesẹ inọ ithuru-igodẹ nọ e rrọ yoyou a re wo ọdawẹ kẹ ai. O rẹ sai fi obọ họ gaga otẹrọnọ ekpako na a re weze bru inievo na. Uvi uduotahawọ nọ ekpako na a rẹ rọ kẹ ai o rẹ sae bọ ai ga evaọ abọ-ẹzi o vẹ jẹ lẹliẹ ai wo isiuru epanọ a re ro zihe ziọ uthuru na.—1 Kọr. 8:1.
5 Enọ e be sẹro uthuru Ọghẹnẹ a wo owha-iruo nọ a rẹ rọ gwọlọ igodẹ nọ i vru no a ve je fi obọ họ kẹ ai zihe ze. Pọl ukọ na ọ kareghẹhọ ekpako Ileleikristi erọ obọ Ẹfẹsọs kpahe owha-iruo rai nọ ọ ta nọ: “Wha yọrọ oma rai jegbe uthuru na kpobi, e nọ Ẹzi Ẹri ọ jẹ rọ owhai mu enọ iwuzou, re wha kuọ [ukoko] Ọghẹnẹ ọnọ ọ rọ azẹ ọghaghae [ọmọ] riẹ rọ dẹ.” (Iruẹru 20:28) Epọvo na re, Pita ukọ na ọ tuduhọ ekpako ukoko nọ a rehọ ẹzi wholo nọ: “Wha sẹro uthuru Ọghẹnẹ nọ orọ owhai obọ, orọnọ ọgbahọ họ rekọ onọ uno eva ze, orọnọ rọ kẹ erere nọ o re fou omovuọ họ, rekọ iroro nọ e gba kiete. Orọnọ wha re ru oma oruoro [wọhọ] enọ-iwuzou otu nọ ọrọ otọ rai hi, rekọ wha rẹ jọ oriruo kẹ uthuru na.”—1 Pita 5:1-3.
6. Fikieme igodẹ Ọghẹnẹ a mae rọ gwọlọ ẹruọsa ekpako na nẹnẹ?
6 Ekpako na a rẹ raro kele Jesu, “othuru igodẹ owoma na.” (Jọn 10:11) O wo ọdawẹ gaga kẹ igodẹ Ọghẹnẹ yọ o fiẹgba họ epanọ u wuzou te re a rẹrote ai nọ ọ ta kẹ Saimọn Pita inọ o ‘thuru igodẹ Riẹ.’ (Se Jọn 21:15-17.) Igodẹ na a mae gwọlọ ẹruọsa otiọye na nẹnẹ keme Ẹdhọ ọ be daoma gaga re ọ raha ẹgbakiete enọ e rehọ oma mudhe kẹ Ọghẹnẹ no. Setan ọ be rehọ sebaẹgba mai ru iruo ọ tẹ jẹ be rehọ isiuru akpọ na gwọlọ gele igodẹ Jihova fihọ oware uyoma uruo. (1 Jọn 2:15-17; 5:19) Enọ e siọ iruo Uvie na ba no ae Ẹdhọ ọ rẹ mae ruẹ tọlọ, fikiere a gwọlọ obufihọ re a sai fi ohrẹ na họ iruo inọ ma “jọ eva Ẹzi nya.” (Gal. 5:16-21, 25) Re ma sai fi obọ họ kẹ igodẹ itienana o gwọlọ ọkpọvio Ọghẹnẹ, ẹzi ọfuafo riẹ, gbe ona nọ ma rẹ rọ rehọ Ebaibol na ru iruo.—Itẹ 3:5, 6; Luk 11:13; Hib. 4:12.
7. Ẹvẹ u wuzou te re ekpako a rẹrote igodẹ nọ e rrọ otọ ẹruọsa rai?
7 Ithuru-igodẹ evaọ oke Izrẹl a jẹ hae rehọ ọkpọ su igodẹ rai. Nọ igodẹ na e be ziọ uwou rai hayo no uwou rai ruọ otafe, e rẹ nya otọ ọkpọ na vrẹ, ere othuru-igodẹ na ọ sai ro kele igodẹ riẹ ọvuọvo. (Izerẹ 27:32; Mae. 2:12; 7:14) Ere ọvona u fo inọ ọkpako ukoko o re fi ẹro họ igodẹ Ọghẹnẹ ọvuọvo nọ e rrọ otọ ẹruọsa riẹ. (Wawo Itẹ 27:23.) Fikiere, iweze ẹruọsa yọ oware jọ nọ u wuzou nọ ugboma ekpako a rẹ t’ẹme te evaọ ẹgwae rai. Onana o kẹre te ọruẹrẹfihotọ nọ a re ru re a sai fi obọ họ kẹ igodẹ nọ i vru. Jihova omariẹ ọ ta inọ ọ te gwọlọ igodẹ riẹ jẹ rẹrote ai wọhọ epanọ u fo. (Izik. 34:11) Fikiere o rẹ were Ọghẹnẹ otẹrọnọ ekpako a jẹ oghẹrẹ owọ ọvona re a fi obọ họ kẹ igodẹ nọ i vru zihe ziọ uthuru na.
8. Idhere vẹ ekpako a rẹ sai ro fi obọ họ kẹ igodẹ na?
8 Oniọvo jọ ọ tẹ be mọ, iweze nọ ọkpako ukoko o re weze bru rie o rẹ kẹe oghọghọ gbe uduotahawọ. Epọvo na o rẹ jọ otẹrọnọ a rẹrote ogodẹ nọ ọ be mọ ẹyao abọ-ẹzi. Ekpako na a rẹ sai se oria Ebaibol jọ kẹe, t’ẹme kpahe uzoẹme jọ, gbiku eware nọ a jọ ewuhrẹ t’ẹme te, lẹ kẹ ohwo nọ ọ siọ iruo Uvie na ba no, gbe eware itieye na efa. A rẹ sae ta kẹe inọ eva e te were ahwo ukoko na gaga otẹrọnọ ọ wariẹ muọ iwuhrẹ họ ẹnyaze. (2 Kọr. 1:3-7; Jem. 5:13-15) Iweze, ifonu, hayo obe-ovuẹ o rẹ sai fi obọ họ gaga. Eva e rẹ sae were ọkpako ukoko ziezi otẹrọnọ o fi obọ họ kẹ ogodẹ nọ o vru no uthuru na no.
Mai Kpobi Ma rẹ Sai Fi Obọ Họ
9, 10. Fikieme ma sae rọ ta nọ orọnikọ ekpako na ọvo a re dhesẹ ọdawẹ kẹ igodẹ nọ i vru no ho?
9 Ma be rria oke obẹbẹ nọ ahwo a be jọ wo uvẹ hẹ, fikiere ẹsejọ ma rẹ riẹ hẹ bẹsenọ ibe Oleleikristi jọ ọ rẹ rọ rehọ ẹmẹrera sioma no ukoko na. (Hib. 2:1) Ghele na, Jihova o rri igodẹ riẹ ghaghae. Aikpobi a wo iruo kẹe, wọhọ epanọ abọ sa-sa erọ ugboma ohwo i wo iruo na. Fikiere, u fo re mai kpobi ma wo ọdawẹ kẹ inievo mai, je gine fi obọ họ kẹ ohwohwo. (1 Kọr. 12:25) Kọ whọ rrọ ere?
10 Dede nọ ekpako ukoko a mai wo owha-iruo ọrọ ẹgwọlọ via gbe obufihọ kẹ igodẹ nọ i vru, orọnikọ ae ọvo ma rẹ nya siọ owha-iruo na ba kẹ hẹ. Amọfa a rẹ sai fi obọ họ. Ma rẹ tuduhọ je fi obọ họ kẹ inievo mai enọ e gwọlọ obufihọ re a sai zihe ziọ uthuru na. Ẹvẹ ma sai ro fi obọ họ kẹ ahwo otiọye na?
11, 12. Uvẹ-ọghọ vẹ whọ rẹ sai wo nọ who re ro fi obọ họ kẹ ọnọ ọ gwọlọ obufihọ abọ-ẹzi?
11 Ẹsejọ, ekpako na a rẹ sae ta kẹ owhowho-uvie nọ o wo eriariẹ ziezi re o wuhrẹ obe kugbe ohwo nọ ọ siọ iruo Uvie na ba no ọnọ ọ yare obufihọ. Oware nọ ma je ru ere họ re ma ruẹsi fi obọ họ kẹ ahwo otioye na wariẹ wo “uyoyou ọsosuọ” rai. (Evia. 2:1, 4) Ma rẹ sae bọ inievo itieye na ga ẹkwoma eware nọ ma wuhrẹ evaọ etoke nọ a ro siomano ukoko na nọ ma re ro lele ai t’ẹme.
12 Ekpako na a tẹ ta kẹ owhẹ re who wuhrẹ obe kugbe ibe Oleleikristi nọ ọ gwọlọ obufihọ, lẹ re Jihova ọ kpọ jẹ ghale omodawọ ra. Evaọ uzẹme, “rehọ iruo ra kẹ ỌNOWO na, o re ti ru [ẹjiroro] ra gba.” (Itẹ 16:3) Roro kpahe eria Ebaibol gbe eme nọ e rẹ bọ ẹrọwọ ohwo ga nọ whọ rẹ sai ro fi obọ họ kẹ enọ e gwọlọ obufihọ abọ-ẹzi. Roro kpahe emamọ oriruo ọrọ Pọl ukọ na. (Se Ahwo Rom 1:11, 12.) Oma o jẹ kpakpa Pọl re ọ ruẹ Ileleikristi nọ e jọ obọ Rom re ọ rehọ Ikereakere na fi obọ họ kẹ ai re a ruẹsi kru oma ga. Yọ o je rẹro inọ a te tuduhọ iẹe awọ re. Kọ u gbe fo re ma wo oghẹrẹ ẹzi otiọye na nọ ma te bi fi obọ họ kẹ igodẹ nọ i vru no uthuru Ọghẹnẹ no?
13. Eme whẹ avọ ohwo nọ ọ siọ iruo Uvie na ba no wha rẹ sae ta kpahe?
13 Who te bi wuhrẹ obe kugbe ohwo nọ ọ siọ iruo Uvie na ba no, whọ rẹ sae nọe inọ, “Ẹvẹ whọ rọ ziọ ukoko na?” Ta kẹ iẹe re o gbiku eware ezi jọ nọ ọ reawere rai no evaọ iwuhrẹ ukoko, evaọ iruo usiuwoma ota, gbe eva ikokohọ. Ta kẹ iẹe kpahe eware nọ whai imava wha reawere rai no evaọ egagọ Jihova. Ta kpahe evawere nọ who wo no fikinọ who sikẹle Jihova. (Jem. 4:8) Ta kpahe epanọ who bi yere Ọghẹnẹ te fiki obọ nọ o bi fihọ k’omai idibo riẹ—maero omosasọ gbe ẹruore nọ ọ be k’omai evaọ okenọ ma tẹ rrọ uye.—Rom 15:4; 2 Kọr. 1:3, 4.
14, 15. Didi eghale enọ e siọ iruo Uvie na ba no a reawere rai no nọ ma rẹ sae kareghẹhọ ai?
14 O rẹ sae kẹ erere re whọ ta kẹ ohwo nọ ọ siọ iruo Uvie na ba no kpahe eghale jọ nọ ọ reawere rai no fikinọ ọ jọ gaga evaọ ukoko na. Wọhọ oriruo, oghale jọ nọ o wo họ eriariẹ Ẹme Ọghẹnẹ gbe ẹjiroro riẹ. (Itẹ 4:18) O jọ lọlọhọ kẹe re ọ whaha edawọ nọ e rẹ lẹliẹe raha uzi evaọ okenọ ọ jẹ “nya evaọ Ẹzi.” (Gal. 5:22-26) Obroziẹ-iroro ofuafo u je fi obọ họ kẹe lẹ se Jihova je wo ‘udhedhẹ Ọghẹnẹ nọ u vi eriariẹ kpobi, onọ o rẹ yọrọ eva gbe iroro mai.’ (Fil. 4:6, 7) Kareghẹhọ eware itienana, dhesẹ uvi isiuru kẹe, jẹ daoma tuduhọ oniọvo na awọ re o zihe ziọ uthuru na.—Se Ahwo Filipai 2:4.
15 Ma rehọ iẹe nọ whẹ yọ ọkpako nọ ọ rrọ iweze ẹruorote. Whọ rẹ sae tuduhọ ọzae avọ aye nọ a siọ iruo Uvie na ba no re a roro kpahe okenọ a ro wuhrẹ uzẹme na riẹ obọ. Iwuhrẹ Ebaibol e jẹ were rai gaga, i mu rai ẹro, e kẹ rai omosasọ, je ru ai họ emuyẹ. (Jọn 8:32) Oma o je mu ai fiki eware nọ a je wuhrẹ kpahe Jihova, uyoyou riẹ, gbe ẹjiroro igbunu riẹ! (Wawo Luk 24:32.) Kareghẹhọ ae inọ Ileleikristi nọ e rọ oma mudhe no a re wo emamọ usu kugbe Jihova a ve je wo uvẹ-ọghọ nọ a rẹ rọ lẹ sei. Tuduhọ enọ e siọ iruo Uvie na ba no awọ re a wariẹ wo ovuhumuo kẹ “usiuwoma oruaro Ọghẹnẹ” evawere na, Jihova.—1 Tim. 1:11.
Ruabọhọ Uyoyou nọ Who Wo Kẹ Ai
16. Kẹ oriruo jọ ro dhesẹ inọ erere o ginẹ riẹ re ma fi obọ họ kẹ amọfa evaọ abọ-ẹzi.
16 Kọ iroro-ejẹ nọ ma jọ obehru fodẹ na i re gine fi obọ họ? Ee. Wọhọ oriruo, uzoge jọ nọ o muọ usiuwoma họ ẹta evaọ okenọ ọ jọ ikpe 12 ọ seba nọ ọ jọ ikpe 15. Uwhremu na ọ tẹ wariẹ mu usiuwoma họ ẹta, yọ o ru iruo ọkobaro vrẹ ikpe 30 no. Oware nọ o mae lẹliẹe wariẹ kru oma ga evaọ ukoko na họ obọ nọ ọkpako ukoko jọ o fihọ kẹe. Eva e were riẹ gaga kẹ obufihọ abọ-ẹzi yena.
17, 18. Oghẹrẹ uruemu vẹ who re dhesẹ re whọ sai fi obọ họ kẹ ọnọ o vru no uthuru Ọghẹnẹ?
17 Uyoyou họ oware nọ o rẹ wọ Ileleikristi re a fi obọ họ kẹ enọ e siọ iruo Uvie na ba no re a wariẹ kru oma ga. Jesu ọ ta kpahe ilele riẹ nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35) Ẹhẹ, uyoyou họ oka nọ a re ro vuhu uvi Ileleikristi. Kọ ma gbe dhesẹ uyoyou utioye na kẹ Ileleikristi nọ e họ-ame no enọ e siọ iruo Uvie na ba no? Ee. U fo nnọ ma re dhesẹ uruemu Oleleikristi nọ ma tẹ be gwọlọ fi obọ utioye họ.
18 Whọ tẹ gwọlọ fi obọ họ kẹ ohwo nọ o vru no uthuru Ọghẹnẹ no, uruemu vẹ u fo inọ ma re dhesẹ? U te no uyoyou no, u fo re ma dhesẹ ohrọ, ẹwo, gbe uye-oruẹ-krẹkri. Uyero na o sae jẹ gwọlọ inọ who wo erọvrẹ. Pọl o kere nọ: “Wha whẹ ọrẹri gbe eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri, whai ohwo o thi-akọ kẹ ohwo, re ohwo jọ o te wo eguago kpahe ọrivẹ riẹ, jọ ọrọ vrẹe; wọhọ epanọ Ọnowo na ọ rọ vrẹ owhai na ere wha rẹ rọ vrẹ re. Rekọ onọ omae ro vi enana kpobi, wha whẹ uyoyou họ oma, onọ orọ ọwhẹgbe eware kpobi.”—Kọl. 3:12-14.
19. Fikieme o gbẹ rọ rrọ uvrẹvru hu re ma fi obọ họ kẹ igodẹ Ọghẹnẹ zihe ziọ uthuru na?
19 Uzoẹme n’otha na u ti dhesẹ oware nọ o be lẹliẹ otujọ vru no uthuru Ọghẹnẹ. U ti je dhesẹ epanọ enọ i bi zihe ze a re rẹro nọ a ti ro dede ai rehọ. Okenọ who ti wuhrẹ uzoẹme yena jẹ be kareghẹhọ eware nọ who wuhrẹ evaọ uzoẹme nana, jọ u mu owhẹ ẹro inọ oma nọ whọ dawo kpobi re whọ sai fi obọ họ kẹ enọ i vru no zihe ziọ ukoko na o rrọ uvrẹvru hu. Evaọ uyerakpọ nana, ahwo buobu a be rehọ uzuazọ rai kpobi koko efe kẹ oma rai, rekọ uzuazọ omọvo o rro vi igho akpọ na kpobi. Jesu o fiẹgba họ onana evaọ ohare ogodẹ nọ o vru na. (Mat. 18:12-14) Hae kareghẹhọ oyena nọ whọ be daoma fi obọ họ kẹ igodẹ eghaghae Jihova nọ i vru no re a zihe ziọ uthuru na ovovẹrẹ.
Ẹvẹ Whọ te k’Uyo?
• Owha-iruo vẹ ekpako ukoko a wo kpahe igodẹ nọ i vru no uthuru na no?
• Ẹvẹ whọ sai ro fi obọ họ kẹ enọ e siọ iruo Uvie na ba no?
• Oghẹrẹ uruemu vẹ who re wo re whọ sai fi obọ họ kẹ enọ i vru no uthuru Ọghẹnẹ?
[Uwoho nọ e rrọ ẹwẹ-obe avọ 10]
Ekpako ukoko a rẹ rrọ uyoyou fi obọ họ kẹ enọ i vru no uthuru Ọghẹnẹ