Oware Nọ Ma Wuhrẹ Mi Jesu

Kpahe Ọghẹnẹ Uzẹme Na

Kọ Ọghẹnẹ o wo odẹ?

Jesu o wuhrẹ ahwo inọ Ọghẹnẹ o wo odẹ. Ọ ta nọ: “Wha lẹ epa onana: Ọsẹ mai nọ ọ rọ obọ odhiwu, odẹ ra ojọ ọrẹri.” (Matiu 6:9) Ebaibol na i dhesẹ inọ odẹ Ọghẹnẹ họ Jihova. (Olezi 83:18, NW) Nọ ọ jẹ ta kpahe ilele riẹ, Jesu ọ lẹ se Ọsẹ riẹ inọ: “Me dhesẹ odẹ ra kẹ ae.”—Jọn 17:26.

Ono họ Jihova?

Jesu ọ ta nọ Jihova “ọvo họ uvi Ọghẹnẹ,” keme ọye họ Ọmemama na. (Jọn 17:3) Jesu ọ ta nọ: “Wha ri se nọ, ọnọ ọ ma rae eva emuhọ ọ mae ọzae gbe aye?” (Matiu 19:4) Ọ tẹ jẹ ta nọ: “Ọghẹnẹ họ ẹzi.” (Jọn 4:24) Fikiere, ma rẹ sae ruẹ Ọghẹnẹ hẹ.—Ọnyano 33:17-20.

Eme Ọghẹnẹ ọ gwọlọ mi omai?

Nọ ohwo jọ ọ nọ Jesu inọ ovẹ họ ujaje nọ o mae rro, ọ kuyo nọ: “Onọ o maero ona, ‘Gaviezọ O Izrẹl, Ọnowo na Ọghẹnẹ mare, Ọnowo na ọ ye ọvo; Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.’ O rọ avivẹ ona, ‘Who re you omọfa epanọ who you oma ra.’”—Mak 12:28-31.

Ẹvẹ ma sai ro dhesẹ nọ ma you Ọghẹnẹ?

Jesu ọ ta nọ: “Me you Ọsẹ na.” Oghẹrẹ vẹ o ro dhesẹ uyoyou yena via? Ọ ta nọ: “Epanọ Ọsẹ na ọ ta kẹ omẹ ere me ru.” (Jọn 14:31) Ọ tẹ jẹ ta nọ: “Me bi ru eware nọ e be were iẹe kẹse kẹse.” (Jọn 8:29) Ma rẹ sai ru eva were Ọghẹnẹ ẹkwoma ewuhrẹ nọ ma re wuhrẹ kpahe iẹe. Nọ ọ jẹ lẹ kpahe ilele riẹ, Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ.”—Jọn 17:3; 1 Timoti 2:4.

Ẹvẹ ma sai ro wuhrẹ kpahe Ọghẹnẹ?

Edhere jọ nọ ma sai ro wuhrẹ kpahe Ọghẹnẹ họ, ẹkwoma eware nọ ọ ma nọ ma re muẹrohọ. Wọhọ oriruo, Jesu ọ ta nọ: “Ri erao ora ehru na; a rẹ kọ họ, a rẹ kọrọ họ, a re koko họ eru hu, rekọ Ọsẹ obọ odhiwu rai ọ rae ẹkuọ. Kọ wha gbẹ ghare vi ai?” Eme Jesu ọ be ta na? Ẹme na họ, ma rẹ kuvẹ hẹ re awaọruọ epanọ ma rẹ rọ rẹrote ẹgwọlọ ugboma mai o whaha omai egagọ Ọghẹnẹ.—Matiu 6:26-33.

Ebaibol na nọ ma re se họ edhere nọ ọ mai woma nọ ma re ro wuhrẹ kpahe Jihova. Jesu o se Ikereakere na “eme Ọghẹnẹ.” (Luk 8:21) Jesu ọ ta kẹ Ọghẹnẹ nọ: “Ẹme ra uzẹme.”—Jọn 17:17; 2 Pita 1:20, 21.

Jesu o fi obọ họ kẹ ahwo wuhrẹ uzẹme na kpahe Jihova. Omọvo ilele riẹ jọ ọ ta kpahe Jesu nọ: “Kọ eva mai egbẹ ghariẹ okenọ ọ jẹ ta eme ko mai eva edhere, nọ o dhesẹ ikerakere na kẹ omai?” (Luk 24:32) Re ma sai wuhrẹ kpahe Ọghẹnẹ, ma re wo omaurokpotọ hrọ, yọ u re je no omai eva ze inọ a wuhrẹ omai. Jesu ọ ta nọ: “Wha gbe kurẹriẹ ze wọhọ emaha ha, wha sae ruọ eva uvie odhiwu vievie he.”—Matiu 18:3.

Fikieme eriariẹ kpahe Ọghẹnẹ e rẹ rọ kẹ ohwo evawere?

Ọghẹnẹ o re fi obọ họ kẹ omai riẹ ẹjiroro uzuazọ. Jesu ọ ta nọ: “Ahwo nọ a wo ẹzi iwhrori, eva e were ae.” (Matiu 5:3) Jihova o re wuhrẹ omai emamọ edhere nọ ma re ro yeri uzuazọ. Jesu ọ ta nọ: “Enọ i yo ẹme Ọghẹnẹ, [je bi] ru ei a wo eghale!”—Luk 11:28; Aizaya 11:9.

Rọkẹ evuẹ efa, rri uzou ọsosuọ orọ obe na Eme Ebaibol na O Gine Wuhrẹ?a

[Oruvẹ-obotọ]

[Uwoho nọ e rrọ ẹwẹ-obe avọ 6]

“Me dhesẹ odẹ ra kẹ ae.”—Jọn 17:26

[Iwoho nọ e rrọ ẹwẹ-obe avọ 6, 7]

Ma rẹ sai wuhrẹ kpahe Jihova ẹkwoma eware nọ ọ ma nọ ma re muẹrohọ gbe Ebaibol na nọ ma re se