Wuhrẹ no Ethobọ Emọ Izrẹl Ze

EMỌ IZRẸL a riẹ oware nọ Jihova ọ gwọlọ mi ai nọ a jẹ ruọ Ẹkwotọ Eyaa na. Ọghẹnẹ ọ rọ ẹkwoma Mosis juzi kẹ ai nọ: “Wha ve le ahwo kpobi nọ a be ria otọ oyena no aro rai, wha vẹ raha itho rai nọ a kare ereghẹ họ, jẹ raha emema rai, je kporo eria ikpehru rai no.”—Ik. 33:52.

Emọ Izrẹl a rẹ reọvọ kugbe ahwo ẹkwotọ na ha, yọ a rẹ ruọ orọo kugbe ai gbe he. (Izie. 7:2, 3) A vẹvẹ ahwo Ọghẹnẹ unu nọ: “Wha sẹro oma rai, re wha se ọvọ ba ẹre kugbe emotọ ẹwho nọ wha be nya na, re a se ẹta ba ẹ tejọ kẹ owhai.” (Ọny. 34:12) Rekọ, emọ Izrẹl a ghẹmeeyo kẹ Ọghẹnẹ a te kie ruọ ẹta. Eme o wha ekie rai ze? Eme ma rẹ jọ oware nọ o via kẹ ae na wuhrẹ?—1 Kọr. 10:11.

Usu nọ A Mu Kugbe ai U Su Kpohọ Ẹdhọgọ

Emọ Izrẹl a fi emo ọsosuọ rai kparobọ okenọ a ruọ Ẹkwotọ Eyaa na. Rekọ emọ Izrẹl a rehọ udu rai kpobi yoẹme kẹ Ọghẹnẹ hẹ. A le ewegrẹ na no otọ na ha. (Ibr. 1:1–2:10) Ukpoye, nọ emọ Izrẹl a kwa ruọ udevie “erẹwho ilogbo ihrẹ” nọ e rrọ ẹkwotọ na, a te ti mu usu kugbe ai fikinọ a jẹ rria kugbe. (Izie. 7:1) Eme onana o lẹliẹ emọ Izrẹl ru? Ebaibol e ta nọ: “A tẹ rọwọ emetẹ rai, a tẹ jẹ rehọ emetẹ obọ rai rọ kẹ emezae ahwo erẹwho nana rọwọ; ahwo Izrẹl a tẹ jẹ gọ edhọ rai. Emọ Izrẹl i te ru eware etọtọ evaọ aro Ọghẹnẹ, ỌNOWO na Ọghẹnẹ rai ọ tẹ thọrọ ae ẹro, a tẹ jẹ gọ edhọ Bale gbe Ashẹrọt.” (Ibr. 3:5-7) Nọ emọ Izrẹl a nya usu kugbe ahwo ẹkwotọ na te umuo jọ no, a te mu ohwohwo họ ẹrehọ je mu ẹdhọ họ ẹgọ. Nọ a mu ohwohwo họ ẹrehọ no, o tẹ te jọ bẹbẹ re emọ Izrẹl a le egedhọ na no ẹkwotọ na. A te ti gbe egagọ uzẹme ku, emọ Izrẹl a te mu edhọ họ ẹgọ.

Okenọ ahwo Ẹkwotọ Eyaa na a jọ ewegrẹ emọ Izrẹl, a jọ ọza kẹ ai keme a rẹ sae wọ ẹmo bru rai, rekọ nọ a zihe ruọ egbẹnyusu rai no ẹsiẹe a mae tubẹ jọ ọza kẹ ai keme a rẹ sae raha usu nọ emọ Izrẹl a wo kugbe Ọghẹnẹ. Roro oware ofa jọ nọ o wọhọ nọ u su kpohọ ogbekuo egagọ emọ Izrẹl.

Iruo Ọwhẹrẹ U Su Kpohọ Egagọ Ebale

Nọ emọ Izrẹl a ruọ Ẹkwotọ Eyaa na no, a gbe je no oria ruọ oria ha, ibuobu rai a zihe ruọ ewhẹrẹ. O wọhọ nọ oghẹrẹ nọ a je ru idhu u tho orọ ahwo Kenan nọ a jọ otọ na vẹre. U muẹro inọ orọnikọ ona nọ ahwo Kenan a je ro ru idhu ọvo a jẹ raro kele he. Usu kugbe ahwo ẹkwotọ na o lẹliẹ emọ Izrẹl jẹ eware nọ a rọwo kpahe iruo ọwhẹrẹ rehọ.

Ahwo Kenan a jẹ gọ Ebale buobu—edhọ nọ a rọwo inọ e rẹ lẹliẹ otọ na wo ẹvi. U te no idhu nọ a je ru no, emọ Izrẹl a te ti mu edhọ Kenan họ ẹgọ, inọ edhọ na e be lẹliẹ ekakọ rai woma. Fikiere emọ Izrẹl buobu a je ru ẹghẹ gheghe inọ a be gọ Jihova, rekọ edhọ a jẹ ginẹ gọ.

Emamọ Unuovẹvẹ k’Omai Nẹnẹ

Okenọ emọ Izrẹl a kake nyaku ahwo Ẹkwotọ Eyaa na, o jọ udu rai hi inọ a ti duomahọ egagọ Ebale avọ eware etọtọ riẹ. Rekọ oware nọ usu rai u su rai kpohọ oye. Kọ ma gbe rẹro inọ enwoma itieye na i re t’omai otẹrọnọ ma nya usu okpekpe kugbe enọ e rẹ gwọlọ whẹtiẹ omai họ oma, rekiyọ a bi lele omai gọ Ọghẹnẹ ọvona ha? Uzẹme o rrọ inọ ma rẹ sai kuomagbe enọ e rrọ ukoko na ha evaọ oria iruo mai, eva obọ isukulu, hayo makọ obọ uwou. Rekọ oriruo emọ Izrẹl na yọ unuovẹvẹ k’omai inọ ma te bi mu usu kugbe ahwo otiọye na, yọ uye ma bi si se omobọ mai na. Ebaibol e ta ẹme nana nọ a rẹ vro ho: “Usu uyoma o rẹ raha uruemu ezi.”—1 Kọr. 15:33.

Ma rẹriẹ ovao ku ebẹbẹ buobu nẹnẹ nọ e wọhọ erọ emọ Izrẹl. Akpọ inẹnẹ o wo ẹkẹ edhọ riẹ. Usu rai họ ugho, eware ẹkeriotọ, ahwo nọ e viodẹ evaọ eria aruọzaha, ikoko isuẹsu, isu egagọ jọ, avọ ahwo uviuwou dede. Ma gbẹ yọrọ oma ha, eware nana jọ e rẹ sae jọ enọ ma fi isiuru mai họ. Usu okpekpe nọ ma re wo kugbe enọ i you Jihova ha o rẹ sae raha usu mai kugbe Ọghẹnẹ.

Ọfariẹ-ogbe o jọ abọ ologbo ọrọ egagọ Ebale onọ u si emọ Izrẹl buobu urru. Egbefẹ itieye na i gbe bi gele ahwo Ọghẹnẹ jọ kie. Wọhọ oriruo, ohwo nọ ọ kare orimuo ọ tẹ nẹ oria jọ ọvo evaọ ekọmputa riẹ ọ rẹ sae raha iroro efuafo riẹ no fiki iwoho ẹbẹba. U re yoma kẹhẹ re ifoto ẹbẹba e raha iroro Oleleikristi.

“Oghale U te Otu nọ I bi Koko Isẹi Riẹ”

Ohwo kpobi ọ rẹ sae salọ kẹ omariẹ sọ o re yoẹme kẹ Jihova hayo o re yo ho evaọ ẹme ọ usu. (Izie. 30:19, 20) Fikiere, u fo re ma nọ oma mai inọ: ‘Amono mẹ be nya usu kugbe evaọ etoke uvẹ mẹ? Ẹvẹ uruemu rai o rrọ? Kọ a be gọ Jihova? Kọ usu rai nọ mẹ rẹ jọ o te tuduhọ omẹ awọ jọ emamọ Oleleikristi?’

Ọso-ilezi na ọ so nọ: “Oghale u te otu nọ edhere rai ọ kare afuẹwẹ, nọ e be nya eva ujaje ỌNOWO! Oghale u te otu nọ i bi koko isẹi riẹ, nọ ebe rọ eva rai kpobi gwọlọ iẹ.” (Ol. 119:1, 2) Evaọ uzẹme, “Oghale u te ahwo kpobi nọ a be dhẹozọ ỌNOWO, a jẹ nya evaọ idhere riẹ!” (Ol. 128:1) Evaọ ẹsalọ egbẹnyusu mai, joma wuhrẹ no ethobọ emọ Izrẹl ze re ma rehọ eva mai kpobi yoẹme kẹ Jihova.—Itẹ 13:20.

[Uwoho nọ e rrọ ẹwẹ-obe avọ 26]

Usu okpekpe kugbe enọ i you Jihova ha o rẹ sai su omai ruọ ẹdhọgọ