Ileta nọ I No Obọ Dominican Republic Ze

“Mẹ re Ruẹ Ọkpọ Uyoyou Utiona Ẹdọvo Ho”

NIURKA o ru ẹme ọsosuọ riẹ no Ebaibol ze evaọ ukoko mai oka nana. Ọ ruẹrẹ oma kpahe ẹkwoma eme na nọ o kere fihotọ evaọ Braille, oghẹrẹ nọ ahwo nọ a tuaro a rẹ rọ r’obọ te ẹme a vẹ riẹ oware nọ u dikihẹ kẹ, kẹsena o te fi eme na kpobi họ uzou. Mẹ jọ obọ eplatfọmo kugbei, mẹ keria kẹe wọhọ ẹsenọ mẹ rrọ ohwo nọ ọ gwọlọ wuhrẹ kpahe Ebaibol. Emaekrofonu mẹ jẹ rọ ta ẹme kẹe, u ve bi ru ẹme na do ruọ eware nọ a re ro yo ẹme nọ o fihọ ezọ. Nọ ma ku ẹme na họ no, abọ-ọtehe ogbotu na fiki eva nọ e were rai ọ ga te epanọ Niurka o ro yo edo na dede. Ohwẹ riẹ u dhesẹ nọ eva e were riẹ thesiwa. Eva e were omẹ re. Re a kpohọ iruo usiuwoma ota evaọ orẹwho ofa u woma kẹhẹ!

Mẹ kareghẹhọ ẹdẹ ọsosuọ nọ mẹ rọ nyaku Niurka ikpe ivẹ nọ i kpemu. Nọ ma dhẹ omoto iminiti 30 eva edhere iyẹrẹ nọ ovu ọ vọ no, mẹ tẹ kpare ovao ruẹ Niurka. Ọ keria ogebara uwou oruori riẹ—nọ a rọ ire gbe isimeti nọ a gwa kugbe ikolu bọ, avọ idhe nọ i mu ekagba no. Yọ who re yo ore gbe edo ewe, erakọ gbe iruke nọ a bi thuru. Niurka ọ keria gbovao hotọ, whọ rẹ nwane ruẹ nọ ọ rrọ goli avọ ọkora. Dede nọ ikpe 34 ọ rrọ, who re roro nọ ọkpako-soso jọ.

Mẹ tẹ robọ tei ẹkoko, ọ tẹ kpare ovao rri omai avọ aro nọ o tu, uwhremu na ma tẹ te riẹ nọ anwọ ikpe 11 na o tuaro. Me te go unu kẹle ezọ riẹ je do gaga fihọ iẹe ezọ fodẹ odẹ mẹ gbe orọ ọrivẹ mẹ gbe oware nọ o wọ omai ze. Uwhremuna ma tẹ te riẹ inọ Niurka ọ mọ ẹyao jọ nọ ọmọ ọ rẹ sai wo no oma ọsẹgboni riẹ ze nọ a re se Marfan syndrome, onọ o lahiẹ e riẹ gaga no. Niurka o wo ẹyao evẹ ọgaga re nọ o gwọlọ nọ a re muẹrohọ epanọ isugẹ e da azẹ riẹ te ẹsikpobi.

Nọ mẹ rehọ Ebaibol họ iẹe obọ, o vuhu rie, ọ tẹ ta nọ ọ jẹ hai se Ebaibol ziezi evaọ okenọ o rri tuaro ho. Kọ ẹvẹ mẹ te sae rọ rehọ Ẹme Ọghẹnẹ nọ ọ rẹ sasa oma na wuhrẹ ohwo ọhẹhẹ nana nọ ọ rrọ goli na? Ọ riẹ “a b d” Oyibo, fikiere mẹ tẹ jẹ hai fi ibiẹme “a b d” nọ a rọ irọba ru fihọ obọ riẹ re o vuhu ai. O raha oke he, o te mu ai ọvuọvo họ evuhu. Kẹsena, me te mu ei ẹvẹrẹ Obọ rọ t’Ẹme America họ ewuhrẹ, mẹ tẹ rehọ obọ mẹ ru oka ubiẹme jọ o ve dhobọ tei jẹ riẹ ubiẹme nọ oyena u dikihẹ kẹ evaọ “a b d” na. Ẹmẹrera na, o te ti wuhrẹ haro. Fikinọ me bi wuhrẹ ẹvẹrẹ obọ rọ t’ẹme na obọ re, mẹ jẹ hae rehọ euwa buobu ruẹrẹ oma kpahe kẹ uwuhrẹ kpobi. Rekọ fikinọ mẹ avọ Niurka ma wo ajọwha gaga kẹ uwuhrẹ na, o raha oke he ma tẹ te riẹ ẹvẹrẹ obọ rọ t’ẹme ziezi.

Oware jọ nọ u fi obọ họ kẹ Niurka gaga họ okwakwa nọ a re fihọ ezọ nọ u re fi obọ họ kẹ ohwo yo ẹme nọ ukoko jọ nọ u re fi obọ họ kẹ ahwo nọ uye o rẹ bẹ, a kẹ riẹ. Dede nọ u wo ẹgba tere he, u fi obọ họ kẹe gaga. Fikinọ o vrẹ ikpikpe soso no nọ ọ be rọ ruẹ ude je yo ẹme ziezi hi, o te dhugbe si oma no ahwo re ọ jọ orọ obọriẹ. Rekọ ẹzi Jihova ọ tẹ te jaja udu gbe iroro riẹ, e tẹ te vọ avọ eriariẹ, ẹruore gbe uyoyou. O raha oke he, Niurka ọ tẹ jẹ rọ umure du otọ be nya okegbe riẹ wariẹ be vuẹ amọfa uzẹme Ebaibol.

Niurka o bi ru uwuhrẹ Ebaibol kugbe oniọvo oni riẹ, gbe imoni ivẹ riẹ efa. Ọ rẹ ruẹrẹ oma kpahe ziezi, fi eware nọ a ti wuhrẹ na họ uzou taure oke uwuhrẹ na u te ti te. Ahwo nọ o bi wuhrẹ obe na a re se edhe-ẹme, kẹsena Niurka o ve se enọ na ẹkwoma abọ nọ o re ro te obe Braille riẹ. Ọrivẹ usiuwoma ota riẹ ọ vẹ vuẹ Niurka uyo nọ emọ-uwuhrẹ na a kẹ ẹkwoma ẹme na nọ o re do fihọ ezọ riẹ, hayo abọ nọ ọ rẹ rọ tẹme yọ Niurka ọ be rabọ rara abọ riẹ ro wo otoriẹ ẹme na.

Ukoko na kpobi u bi fi obọ họ jẹ kẹ Niurka uduotahawọ. Inievo Ileleikristi buobu a bi fi obọ họ kẹe kpohọ iwuhrẹ gbe ikokohọ. Inievo efa a be hae jọ kugbei evaọ usiuwoma ota. Niurka ọ ta kẹ omẹ kẹle na inọ: “Mẹ re ruẹ ọkpọ uyoyou utiona ẹdọvo ho.” O rrọ irẹro riẹ nọ ọ te họ-ame evaọ okokohọ ubrotọ notha.

Nọ ma dhẹ ruọ edhere iyẹrẹ nọ Niurka ọ be rria, ma tẹ rue riẹ nọ ọ keria ogebara evaọ uvo yọ ọ kpare ovao kpehru ohwohwẹ. Mẹ tẹ nọe oware nọ o soriẹ nọ ọ be rọ hwẹ. Ọ tẹ ta kẹ omẹ nọ: “Me je roro kpahe okenọ akpọ na ọ te rọ jọ Aparadase. Yọ iroro mẹ kpobi họ mẹ rrọ etẹe no.”

[Uwoho nọ e rrọ ẹwẹ-obe avọ 25]

Niurka kugbe ahwo ukoko mai jọ evaọ aro Ọgwa Uvie

[Uwoho nọ e rrọ ẹwẹ-obe avọ 25]

Niurka ọ be vuẹ amọfa eware nọ o wuhrẹ